عايز أورث شقة أهلي.. أعمل إيه؟

أولا: أنا بجد باشكر الموقع، وكل الموجودين فيه.
ثانيا: آسف إن كنت هاطول شوية في الكلام.. دلوقتي أنا والدتي ووالدي عايزينّي أتجوز وأعيش معاهم في الشقة، وهي إيجار قديم.
أنا بقى باسأل.. ينفع أتجوز بره بإيجار جديد، وبعد كده أرجع أعيش معاهم وأورث الشقة عادي، ولا لازم أتجوز في الشقة الأول عشان أورثها؟
وحاجة تاني.. لو اتجوزت في الشقة الأول لمدة معينة -ولتكن شهر أو اتنين أو أكتر- وأخدت شقة بره إيجار جديد، هل أقدر برضه أرجع أورث الشقة، ولا لازم أفضل قاعد معاهم وأنا متجوز عشان أورثها؟
وشكرا ليكم
a.chico
عزيزي.. ليمتد إليك عقد الإيجار -بالنسبة إلى شقة الوالد- عليك بالزواج فيها، والاستمرار في الإقامة الدائمة حتى وفاة الوالد -بعد عمر طويل إن شاء الله- وذلك أمام الجيران، وهذا هو الحل الأضمن للفوز بالشقة؛ فالقانون أعطى الحق للمقيم إقامة دائمة ومستقرة، وليس على سبيل الاستضافة.
أنا باشكركم على الموقع الجميل ده اللي مش سايب حاجة تحيّر الإنسان إلا وعنده إجابتها.. وأنا باستعين بكم بعد الله لكي تفيدوني في مشكلتي؛ وهي إن إحنا عندنا شقة إيجار قديم استأجرها واحد من سنة 62، وفجأة عُزل هو ومراته إلى مكان تاني، وبعد سنة بالضبط توفي هذا الرجل، وتوفيت زوجته بعده ب21 يوما في المكان التاني اللي انتقلوا فيه. ابنهم بيقول إن حقه إنه يسكن في الشقة؛ مع العلم إنه متزوج منذ 15 سنة في سكن مستقل.
إحنا رفعنا قضية وتم الحكم فيها لصالحنا أول درجة، وهو استأنف وجاري الاستئناف حاليا.
المهم إنه أثناء سير القضية الابن عمل محضر بشهود زور وقدّمه إلى المحامي العام، والمحامي العام أعطاه حكم بالتمكين، ونحن تظلّمنا من هذا التمكين بالقضية، وتم الحكم فيها لصالحنا بعدم تمكين الابن، وغل يد طرفيْ النزاع إلى أن ينتهي النزاع في القضية الأساسية؛ فالابن استأنف هذا الحكم، وقد حكم لصالحه في الاستئناف بتمكينه من الشقة.
أرجو أن تفيدوني؛ ما هي الخطوة القادمة الواجب اتخاذها لكي نُلغي هذا التمكين، أو نؤخره إلى أن يتم الحكم في الاستئناف في القضية الأساسية، التي حُكم لنا فيها بفسخ العقد وتمكيننا من الشقة؟ أرجو الإفادة وفقكم الله لما فيه الخير.
zeko moza
عزيزي.. وفقا لسير الدعوى فالأمر يسير بالاتجاه السليم لصالحكم، أما بالنسبة إلى قرار التمكين فيمكن رفع دعوى أمام قاضي الأمور الوقتية تُسمى "إشكال موضوعي في التنفيذ"، وهذه الدعوى تستغرق وقتا طويلا نسبيا؛ حتى تتمكن من الحصول على حكم نهائي بالاستئناف في دعوى الفسخ، والحقيقة أن التنفيذ يعتمد على استغلال ثغرات القانون التي تُطيل من أمد النزاع، وهناك من الحِيَل القانونية ما يمكّنك من عرقلة التنفيذ حتى صدور حكم لصالحك في الاستئناف، والأمر مكلّف لكن الفائدة أكبر.