فراخ مشوية بطريقة مفتكسة على "سفرة دايمة"

عايزة تبقي مبتكرة في أكلك، ودايما تجددي فيه وتبهري كل ضيوفك، هنقدّم لك النهارده طريقة جديدة لشوي الفراخ بطريقة مفتكسة وسهلة، جرّبيها، وماتنسوش كل اللي عنده افتكاسة جديدة يبعت يقول لنا عليها.
فراخ مشوية
المقادير:
* فرخة كاملة
* 2 فلفل أحمر حامي مجفف
* ملعقة صغيرة فلفل أسود
* ملعقة كبيرة ريحان مجفف
* ملعقة كبيرة زعتر مجفف
* 2 ملعقة كبيرة سكر
* ملعقة كبيرة كمون
* ملعقة كبيرة ملح
* ملعقة كبيرة قرفة
* علبة مياه غازية (كانز)
* عصير ليمون
الطريقة:
1- اطحني كل المكونات الجافة (السكر - الملح والفلفل - فلفل أحمر - كمون - زعتر - ريحان - قرفة) في مطحنة أو خلاط علشان يختلطوا كويس أوي.
2- نظفي الفرخة كويس أوي، وخدي نصف كمية التتبيلة اللي عندك وتبلي بها الفرخة كويس، وحاولي تركزي التتبيلة تحت الجلد علشان الفرخة تبقى متتبلة كويس، وحطي عليها عصير ليمون من الخارج.
3- حطي الفرخة في كيس بلاستيك، ودخليها التلاجة وسيبيها لمدة 4 ساعات، ويفضل إنك تسيبيها طوال الليل.
4- سخني الفحم في الشواية أو سخني الجريل -على حسب اللي هتستخدميه- وسيبيها لحد ما توصل للدرجة حرارة عالية، وممكن تستخدمي شواية البوتجاز.
5- افتحي الكانز، وخلّي فيها نصف الكمية، وحطي فيها نصف كمية التتبيلة اللي كنت مجهزاها وقلبيهم مع بعض، وبعدين دخلي العلبة جوه الفرخة وخليها واقفة.
6- حطيها على الشواية وهي واقفة وغطيها، وسيبيها لمدة ساعة أو لحد ما تحسي إنها استوت، سيبيها تبرد وبعدين قدّميها بالهنا والشفا.

خلصت وصفتنا النهارده..
استنونا مع وصفات جديدة كل يوم..
سلام،،،