من بعد موت أمي بازعل من كل الناس

أنا أول مرة أشارك في حاجة زي دي، وأتمنى الرد على مشكلتي.. أنا مش عارفة أبدأ منين؛ بس أنا حالتي النفسية وحشة خالص؛ لدرجة إني مش قادرة أتعامل مع الناس، وبافهم أي حد غلط؛ ماعرفش ليه، مع إني من جوايا صافية جدا؛ بس أنا بقيت كده من يوم وفاة أمي الله يرحمها.. هي توفيت من أكتر من سنة، ودي كانت أكبر صدمة في حياتي، وماكنتش متوقعاها واتصدمت بعدها.
أنا كنت بحب واحد زميلي في الكلية، ولما خلصنا جه يتقدم لي، وقبل ما ييجي يتقدم بيومين أمي توفيت؛ فكرهت الدنيا كلها؛ لدرجة إني كرهته هو؛ بس جه تاني بعدها بشهرين واتخطبنا بقالنا سنة تقريبًا؛ بس دايمًا باقفش على أي حاجة هبلة ماعرفش ليه بقيت كده.. وممكن يكون بيهزر وأقلب الموضوع جد وأزعل، وأرجع أقول لنفسي: خلاص بقى الموضوع مش مستاهل؛ بس برضه مش قادرة.
ومن يوم وفاة أمي مش لاقية حد أثق فيه ولا حتى والدي؛ لأنه بيجبرني إني أقرّب من إخواته (عماتي)؛ بس أنا مش عايزة أقرّب أوي؛ لأنهم كانوا مش كويسين مع أمي، وباحس بالذنب لأني باكلمهم، وكل لما أزورهم أخويا يعاتبني إني باروح لهم، ويقول لي: دول السبب في مشكلاتنا، ولما والدي يشوفني بابعد عن أهله يبعدني عن أهل أمي..
وكل ده كوم ومشكلات الخطوبة والجهاز والعفش كوم تاني؛ أهل خطيبي مكبّرين دماغهم، ومش عايزين يساعدونا، ولا حتى بمليم أحمر، وأنا وخطيبي متخرجين لسه من سنة بالظبط، إزاي هيكوّن نفسه لوحده؟!
أعمل إيه؟ نفسي أرتاح نفسيا.. أنا كنت مرحة جدا، وبحب الضحك والهزار اتقلبت 180 درجة.

hashkobly

لو عايز تفضفض لنا دوس هنا