حُكم القَدَر

السلام عليكم.. أنا بنت وعندي مشكلة تكاد تكون كبيرة شوية؛ أنا مخطوبة، وبحب خطيبي وهو كمان بيحبني، بس الحب لوحده مش كفاية، أنا من النوع إني دمي حامي شوية ودايما متحمسة، وعندي مبدأ إن أي مشكلة لازم يكون لها حل..
هو بقى عكس كدا، وبالرغم من إني حاولت أغيّره وأقف جنبه وأساعده إنه يلاقي شغل مناسب له وأفضل، لكن عمري ما حملته فوق طاقته، ووقفت جنبه في كل حاجة من الكبيرة للصغيرة، ولا همّني ماديات، ولا هو جاب إيه، ولا الكلام ده خالص، دايما راضية وعندي قناعة، وعمري ما عاملته بالمِثل، وأهله باعاملهم كويس، وهم بيحبوني علشان أنا كويسة معاهم، وكنت باقف معاه في أزماته.
ولكن المشكلة إنهم ماقدّروش كل ده، وطلعوا بيكدبوا علينا في حاجات كتير؛ زي ميعاد الجواز، ومكان الشقة، يعني من الآخر بيلاوعوا في الكلام، هو بقى لا حول به ولا قوة، ولا اتكلم ولا عمل أي حاجة غير إنه بيزعل بس زعل من غير رد إيجابي على اللي بيحصل، وماما وبابا كانوا راضيين بأقل حاجة؛ لأنهم عارفين إني مرتاحة له، وعلشان كمان هما عينيهم مليانة وناس محترمة جدا، عكس أهل خطيبي خالص، أنا بس تعبت وصعبان عليّ إنه وقف يتفرج وماعملش حاجة غير إنه زعل وبس.. خلاص خطوبتنا على وشك الفسخ، وأنا زعلانة على اللي بيحصل.. بالله عليكم ردوا عليّ أنا مش عارفة أكتب أصلا، وطوّلت عليكم.. شكرا.

flower

لو عايز تفضفض لنا دوس هنا