اسأل رشا :مش فاهم هتتعلمي أمتي؟؟؟؟؟

خبيرة العلاقات العامة
زي ما كلكم عارفين اني بعمل صالون شهري ... و كل شهر بتكلم في موضوع جديد يهم الشباب ... وفي الفاصل ، جاتلي وطلبت تتكلم معايا عن مشكله تواجهها ...
قعدنا في جنب و بدأت تحكيلي ...بأشتغل في شركة استيراد و تصدير ، خبرتي كلها علي بعضها سنتين يعني مش كتير اوي وخريجة تجارة... بشتغل سكرتيرة ومحاسب و امين مخازن وتسويق ... و مش عارفه هيشغلني ايه تاني ؟؟؟
لحد كده مفيش مشكله خالص .. المشكلة اني كل ما ادخل أودي حاجه ... يقرأ بتأني وبدقة و يطلع الأخطاء و انا أعدلها .. وعلي الرغم اني بعمل بالضبط اللي بيطلبه مني ، لكن ما ينوبني بعد كده غير سم بدني بكلمتين ... هو انتي هتتعلمي امتي ...نفسي مره تكتبي الجواب زي ما أنا بكتبه وتريحيني ...
انا فعلا مش عارفه اعمل ايه ؟؟؟؟ مع اني بعمل كل حاجه ليه بس مركز علي السلبيات و ساب كل الايجابيات الي بعملها ؟؟؟؟ يا ريت تقوليلي اعمل ايه ؟؟؟؟
شوفي يا ستي ... نمسك الموضوع من أوله ...
أول حاجه ...
أنتي بتشتغلي كل حاجه في المكتب و خبرتك كلها سنتين ... طيب لأنك بتشتغلي كل حاجه اكيد بتتعلمي وبيثقل مهاراتك يعني انتي بخبرة سنتين ممكن تكوني افضل من واحده بتشتغل 5 سنين لكن متعرفش تعمل الي انتي بتعمليه دا غير ان اصلا انك بتشتغلي حاجه في مجالك و هي الحسابات ... انا شايفة انك ضاربة عصفورين بحجر واحد ... يعني بتمارسي شغل المحاسبة ... و في نفس الوقت بتكتسبي خبرات تانية .. و دا مش حاجه وحشه ... انتي لسه صغيره ولو متعبتيش و انتي لسه في اول السلم هتتعبي امتي؟؟؟؟
الحاجه الثانية :
احنا دايما بناخد كلام المدير علي انه نقد هدام ... لكن انتي ليه متبصيش لنص الكوب المليان بلاش النص الفضي ... يعني هو شايف واحده شاطره شايله كل حاجه ليه متفكريش انه صعبان عليه ان حد بالشطاره دي ميكونش شاطر في كل حاجه ؟؟؟؟
أو زعلان انك كل شويه بتاخدي حاجه تكتبيها ... و ترجعيله ... و مكلفتيش خاطرك تدرسيها علشان تعرفي دي بتتعمل ازاي؟؟؟
احسن حاجه تعمليها هيا انك تجمعي كل المراسلات و العروض و الججات الي بيكتبها و تذاكريها كويس ... أكيد هتعرفي من خلال الي انتي قرتيه بتتكتب ازاي لان غالبا بيكون فيه تشابه بين خطابات و العروض ..
عايزاكي تعملي بحث عن كيفية كتابة المراسلات .. و شوفي نماذج منها و شوفي ممكن تتطوري ازاي وبالشكل دا هو هيكون راضي عنك ...
واحمدي ربنا انه انتقدك علشان تتعلمي حاجات جديده ... ربنا معاكي...