بدأها بكذبة وعرفتِ إنه متجوز.. يبقى مش ممكن ترجعي له تاني

السلام عليكم.. ميرسي جداً على الموقع الهايل والمتميز..
أنا عندي 22 سنة، حبيت واحد من 5 سنين، وحبني، وشرح لي ظروفه إنه متجوز وعنده ولد وبنت صغيرين، وإنه منفصل عن مراته بس مش بشكل رسمي.. حبي ليه خلاني قِبلت ظروفه من غير ما أفكر في أي حاجة برغم رفض الدنيا كلها للارتباط ده؛ بس أنا وقفت جنبه لحد ما وافقوا عليه، وفعلاً اتقرأ فاتحتي عليه من سنتين.
ماعملش أي حاجة ولا قدّم أي خطوة، ودايماً كان فيه اختلافات على لبسي أو خروجي.. وبعدين انفصلت أنا وهو.
اتعرّفت على شخص اتكلمت معاه، وارتحت له، وحبيته، وقال إنه حبني، وكلم أهلي وإداهم ميعاد بعد العيد ييجي ويتقدم رسمي، راحوا سألوا عليه زي أي حد، وكانت المفاجأة إنه متجوز وعنده بنت، ولما أمي واجهته قال لي لأ مش أنا.. وبعد كده بعت لي رسالة طالب فيها إني أسامحه، وإنه كذب عشان يحافظ عليّ.
بعدها اتكلمنا وحاول يصلّح الموضوع مع أهلي.. وأنا دلوقتي أنا محتارة؛ خطيبي عايز يرجع لي وأهلي مرحّبين، وطبعاً التاني كله رافضه لأنه كذب عليهم وماصارحهمش من الأول؛ لكن أنا ميّالة ليه جداً؛ بس خايفة يكون الكذب ده طبعه؛ وخصوصاً إني ماعرفهوش كويس.. وخطيبي الأولاني بيعمل أي شيء عشان يرضيني وأرجع له.
مش عارفة آخد قرار.. يا ريت تساعدوني بسرعة، محتاجة حد فعلاً يقف جنبي.
جزيرة الشوق


لو عايز تفضفض لنا دوس هنا