فارق شاسع بين الاحترام والانطواء

أنا مشكلتي كبيرة موت. أنا بنت عندي 21 سنة، وعمري ما ارتبطت، وده لأني ما بحبش أعمل حاجة غلط؛ بس المشكلة إني حبيت مرة بس حب في صمت، وطبعا اتجرحت لأن الحب فضل جوايا لحد الحد اللي بحبه ما اتجوز.
وبعدها ما باحاولش أقرب من حد تاني عشان ما اغلطش وما اتجرحش، وأصلا ما باديش لحد الفرصة إنه يقرب مني أصلا، والكارثة إن الأولاد لما باقول رأيي ده ليهم بيقولوا عني معقدة.
أنا مقتنعة إني محترمة بس المشكلة إن الرجال دلوقتي أغلبهم لما بيجوا يتجوزوا بيدوروا على البنت اللي -سوري على الكلمة- (اللي تعرف توقعه) وما يفرقش معاه أي حاجة لأنه بيبقى متصور إنها محترمة؛ بس بتعرف تتعامل كويس! والمحترمين يروحوا فين بقى؟ مش مهم.
واللي زود الكارثة عندي إني دلوقتي بحب واحد جدا جدااااا لأنه حد تتمناه أي بنت فعلا أدب وأخلاق ودين ومستوى مادي واجتماعي وهو قريبي؛ بس كالعادة أنا ما باعرفش أبين الحب ده، وطبعا كالعادة هيسيبني ويتجوز واحدة تانية وأنا قاعدة باتفرج. الظاهر إن أهلي من كتر ما ربوني عقدوني!!! لو حد يعرف لي صرفة يرد عليّ.
س