ندمك جه متأخر أوي.. واحترامه لكِ صعب بعد اللي كان بينكم

السلام عليكم.. أنا مشكلتي إني مخطوبة لشخص بقالي سنتين، عن قصة حب أيام الكلية، ولسه باقي زيهم على الجواز، وهو حالياً سافر بلد عربي.
أنا كنت أيام الكلية حاسة بحبه ليّ جامد، وكنت مستريحة معاه جداً، ماكانش بيعدّي يوم وإحنا متخانقين غير لما يصالحني.. أسلوبه كان محترم وبيحبني جداً.. وبعد الخطوبة حصلت بينا حاجات غلط؛ لكن وقررنا ماتحصلش تاني.
هو معاملته بقت وحشة جداً معايا، نتخانق بالأسبوع مايكلمنيش، يشتمني شتايم وحشة، ويقول لي: مخنوق منك.. مابقيتش حاسة بحب خالص.
وصّلني إني أكرهه بالتدريج.. باحاول أتكلم كويس عشان لو عنده مشاكل في الشغل ما أضايقهوش؛ يكلمني وحش ويستفزني، ويخرّجني عن شعوري.
مابقاش فيه حب، وبقالنا سنة ونصف في خناق؛ لو اتصالحنا ساعة نتخانق بقية اليوم، أنا بحبه جداً؛ لكن هو بيكرّهني فيه.. بقيت حاسة إني لما أتجوزه هتبقى عيشتي وحشة، ومش هابقى مبسوطة.
أنا حالياً على طول باعيّط، وعلى طول مكتئبة، وبيشكّ فيّ؛ مع إني مراعية ربنا أوي فيه، وعمري ما خُنته، ومحافظة عليه.. مش لاقية حل: هل أبعد، ولا أكمّل؟
ساعدوني، أنا كتبت الموضوع عشان مش لاقية حدّ أكلمه، وأنا تعبت وبدأت أندم.
h.sh


لو عايز تفضفض لنا دوس هنا