السلام عليكم ورحمة الله وبركاته.. أنا خاطب بقالي 9 شهور، وبحب خطيبتي من قبل ما نتخطب، ومش عارف أقول لكم أنا بحبها قد إيه، ولكم أن تتخيلوا، وكلمة بحبها قليلة أوي عليها. المهم اتخطبنا واتفقنا على كل حاجة، وقبل الخطوبة أنا قلت لها أنا عندي شقة صغيرة نبدأ فيها حياتنا وربنا يكرمني وأعوّضك بالأكبر والأحسن؛ مع العلم إن الشقة في حدود 67 متراً تقريباً.. وإحنا بنتفق مع أهلها والدي قال لوالدها: إن شاء الله هنورّيكم الشقة بس كمان أربع شهور من الخطوبة؛ على أساس إني أوضّبها وأورّيها لهم عشان هي كانت متبهدلة تراب، وكان فيها بواقي عفش. المهم وريتها لهم بعدها بحوالي سبع شهور، وماعجبتهاش الشقة، وبتقول لي صغيرة أوي، ومش هينفع، وطلّع من دماغك إني أعيش في شقة قد دي.. قلت لها: طب أنا هاعمل إيه؟ أنا مش هاقدر أجيب شقة.
تقول لي خلي والدك يساعدك؛ مع العلم إن والدي هيوضّب لي الشقة ويجيب لي الأجهزة، وأنا اللي هاجمع المهر؛ يعني والدي مساعدني بنسبة 90%، وهي بتتهم والدي إنه كده مش مساعدني.. تقول لي: جيب شقه ولو ب30 ألف، المهم تكون أكبر منها شوية.. طب بالله عليكم هل فيه بالسعر ده وأكبر من كده؟ ولو أكبر من كده هتبقى في عشوائيات والخدمة فيها هتبقى مش كويسة؛ مع العلم إن شقتي في مكان كويس. وكل ما أقول لها: خليكي معايا نكمّل في دي، وربنا يرزقني وأجيب لك الأحسن. تقول لي: لأ، أنا لو بنت غيري ماكنتش هتوافق؛ بس أنا متمسكة بيك؛ بس انسى إني أتجوز في الشقة دي. كل اللي عاوز أعرفه: هل كده أنا أجرمت إني عاوز أتجوز وأنا إمكانياتي محدودة؟ هل كده أنا ظالمها معايا؟ ولو أنا مش ظالمها عاوزكم توجّهوا لها رسالة تنصحوها فيها باللي تمليه عليكم ضمائركم، عشان دايماً بتتهمني إني عاوز أرضي نفسي وبس.. وأنا والله العظيم باتكلم في حدود إمكانياتي. أنا في انتظار ردّ ضروري وفي أسرع وقت. boogy