السلام عليكم ورحمة الله وبركاته. أنا شاب عندي 24 سنة, تقدّمت لخطبة فتاة ووافق أهلها على الخطوبة، وقرينا فاتحة, في فترة قبل الخطوبة كانت ساكتة دايماً، وكلامها ناشف جداً، وكان أهلها دايماً يقولوا إن الخجل ده طبعها ومع الوقت هتتعود. وقعدت معاها 4 شهور على نفس الوضع ده؛ المشكلة إن بعد الخطوبة استمر الوضع على ما هو عليه.. الرد يا دوب على قدر السؤال, ما بتهتمش بيّ ولا تسأل عليّ إلا نادراً، أو لما ألفت نظرها. ما بتتكلمش؛ حتى والدتي عشان تسلّم عليها من وقت للتاني, باحاول أعمل كل شيء عشان أرضيها من التعبير عن الحب والهدايا إلخ؛ لكن دايماً بتعاملني ببرود، وكتير أوي كلمتها في الموضوع ده, كانت في البداية تقول لي لما أتعود، ومؤخراً قالت لي إنها كانت ما بتفكّرش أبداً في موضوع الجواز ده، وبتخاف من المستقبل، وكل ما حد يكلّمها في الموضوع بتاع الجواز بتتضايق جداً، وكمان بتقول لي إنها حاسة إن مخي أكبر منها، وباتكلم في حاجات هي مش فاهماها؛ لكن هي مش هتسيبني؛ لكن للأمانة هي في بعض الأوقات القليلة بتبقي كويسة وباحس إنها بتحاول تتأقلم. دلوقتي فات على خطوبتنا 6 شهور والوضع لسة زي ما حكيت, أنا بحبها جداً، وفاهمها جداً، وهي بنت ممتازة؛ لكن هي مش حاسة بيّ خالص، ومش مقدّراني، وباحس منها إن أنا زي أي حد, مش عارف أتصرف إزاي، وتعبت جداً من كتر التفكير, يا ترى أصبر تاني ولا أعمل إيه؟ أنا تعبت أوي لكن ما أقدرش أعيش من غيرها. k.k صديقنا العزيز: ما تقدرش تعيش من غيرها, طيب هتقدر تعيش عمرك كله تشحت منها الحب والحنّيّة، أو حتى أقل درجات الاهتمام؟ مستني إيه علشان تفهم إن البنت دي مش بتحبك؟ مستني إيه علشان تفهم إنها بتحاول تقول لك إنها مش موافقة عليك، وإن أهلها أجبروها عليك؛ لأنك عريس ما تترفضش؟ أهلها بيفسروا تصرفاتها إنها خجل!! طيب ده وأنت قاعد معاها لوحدكم.. طيب ده كان في أول أسبوع وفي أول شهر.. طيب هل هي خجولة لدرجة إنها ما تكلمش خطيبها تتطمّن عليه وعلى أهله وترد عليهم لما يتّصلوا بيها بعد ما مرّت ستة شهور على الخطوبة!! أخي العزيز, طالما طلبْتَ نصيحتنا؛ يبقى لازم تتأكد إننا هننصحك بما يرضي الله، ولازم تصدّقنا وتصدّق إن اللي بيهمّنا هو مصلحتك حتى لو قلنا لك كلام قاسي أو صادم. وهاذكر لك تجربة عاصرتها بنفسي، وهي تجربة شاب قريبي خطب بنت حبها جداً، وما قصّرش معاها في أي حاجة, وهي دايماً كانت بتقابله بكل برود مهما عمل أو قال؛ لا كانت بتردّ على مكالماته، ولا بتتطمّن عليه لو غاب عنها حتى لو بالأسبوعين, وأهلها كانوا بيفسروا تصرفاتها دي بأنها مشغولة في امتحاناتها, وأنها خجولة، وأنها تعبانة، وأنها لسه يا دوب متخانقة مع أخواتها، وأنها وأنها... أعذار وحجج فارغة، وهو للأسف صدّقها, وللأسف هو ما صدّقش كلام كل اللي نصحوه يسيب البنت دي؛ لأنها واضح جداً إنها مش بتحبه؛ لأنه من المعروف أن البنت بتموت من الفرحة لما تتخطب لشاب كويس، وبتفرح بهداياه وبمكالماته, ومع الوقت هي اللي بتلاحقه بالمكالمات والرسائل لو غاب عنها ساعة, ولو ما حلصلش كده يبقي فيه حاجة غلط. وللأسف الشاب ده اتجوزها من حوالي خمس شهور, ويؤسفني أقول لك إنه بيعيش أسوأ أيام حياته, لسه لحد دلوقتي بتعامله بكل برود وعدم تعبير, لا بتهتم بأكله ولا بلبسه ولا حتى بتتطمّن عليه لو اتأخر؛ طبعاً ناهيك عن إنها لا يمكن تسمع كلامه أو تعمل أي حاجة بيطلبها منها. والموضوع واقف حالياً على الطلاق.. هو بنفسه قال خلاص ما عدتش عاوزاها, هو اتأخر.. اتأخر كتير قوي.. كان لازم يشوف الحقيقة دي من البداية، ويعرف إنها ما حبتهوش أبداً، ولا عندها استعداد تحبه، ولا حتى بتحاول تبذل مجهود علشان تحبه. وأحب أقول لك إنه خطبها سنتين, وطول السنتين كان بيضحك على نفسه؛ طبعاً الغلطة هنا مش بس غلطته لوحده, كمان هي غلطة أهله اللي شافوه بيغرق، وكانوا للأسف بيقنعوه بمبررات أهلها. طيب هي ليه كده؟ إيه السبب في طريقتها دي معاه؟ ما حدش عارف.. مع أنه شاب وسيم ومهذب ولطيف، ومركزه مرموق، ومن عيلة، ومقتدر مادياً؛ يعني فيه كل مواصفات فتى الأحلام؛ بس هي الوحيدة اللي مش شايفة ده. طيب إيه الحل؟ الطلاق.. طيب ولو ما حصلش طلاق؟ هتبقى علاقة مكسّرة ملصّمة زي ما بيقولوا، ماشية بدعاء الوالدين, طيب هل الشاب اللي بيخطب وبيتجوز بيبقى عاوز يعيش كده؟ بتبقى دي نهاية حبه وتعبه؛ فأرجوك فكّر كويس.. أنت لسه على البر؛ صحيح بتحبها؛ بس صبرك له حدود. ففكر كويس، إنت من حقك تتجوز اللي تقدّرك، وتفهمك، وتحترمك، وتحبك؛ فاتكلم معاها هي بصراحة، بلاش أهلها لأنهم هيقنعوك ويبرروا لك؛ كلّمها هي وقل لها إنك مش هتقدر تكمّل كده، ولو مش هتتغير هتسيبها. وإذا لاحظت منها تغييراً واستجابة وخوفاً من أنك هتسيبها؛ يبقى خير, ما لاحظتش ده، وحسيت إنها بتقول بركة يا جامع جت منه؛ يبقى خلاص كفاية لحد كده؛ ففكر كويس وواجهها، بلاش تسكت على الوضع ده؛ لأنه وضع ما يرضيش حد, وابقى طمّنا عليك، وربنا يقسم لك الخير.