خلّيكي معاه لو عايزة تضيّعي كام سنة كمان من عمرك

أولاً باشكركم على الموقع الجميل ده، وباستفيد منه كتير؛ بس يا ريت تساعدوني في حل مشكلتي..
أنا بنت عندي 22 سنة، حبيت واحد جداً، وكنت صريحة معاه في كل حاجة، وهو قال لي إنه بيحبني، وفضلنا سنتين على إننا لبعض.. جه في مرة وقال لي إنه مش حاسس من ناحيتي بحاجة، وإني مش حاسة بحاجة، ولما باقول له وحشتني باقولها بالعافية، عاوز مني أحسسه بأكتر من كده؛ بس أنا كنت مهتمة بيه جداً؛ بس في غاية الأدب؛ اهتمام في السؤال عليه، وكنت جنبه في كل حاجة.
المهم رفضت أفضل جنبه لحد ما يسرح بيّ، ويا يحبني يا لأ.. رفضت علشان كرامتي، واتفقنا نكون أصحاب؛ بس بصراحة أنا ماقدرتش أكلم واحد حبيبي على إنه صاحبي، وهو متأكد من كده.
بعد كده خطب وأنا معاه؛ فبقيت أبعد واحدة واحدة، يكلمني ويقول لي إنت ليه بتعملي كده، أنا مش بارتاح في الكلام غير معاكِ، ويا ريت ماتبعديش، إنت عارفة غلاوتك عندي، ويتصل ويبعت في رسايل، وأنا من جوايا مكسورة، ومع كل ده واقفة جنبه، وباقول له: أنا مش عاوزة أكون موجودة، وخطيبتك لو عرفت إنك بتكلمني على إننا إخوات هتضايق، وأنا مش عاوزة يحصل بينكم زعل بسببي.. يقول لي: لو عاوزاني أعرّفها هاعرّفها؛ بس ليه؟ ويزعل مني جامد لو ماطمنتهوش عليّ؛ مع إن نفسي أتطمن عليه؛ بس غصب عني لازم أبعد.
أرجوكم أفيدوني، أعمل إيه؟ وأتصرف إزاي معاه؟ ومتشكرة جداً على استماعكم لي.

Bs.ma


لو عايز تفضفض لنا دوس هنا