ما فائدة الحب إذا لم يؤدِ للزواج وللاستقرار

السلام عليكم ورحمة الله: أولاً بحب أشكر بص وطل جداً لأنه أكتر موقع بارتاح للفضفضة فيه، ودايماً كنتم معايا في مشاكل كتير أدخل في الموضوع على طول، أنا عندي 21 سنة، في آخر سنة في الكلية.
بحب واحد جداً وهو كمان بيحبني جداً، وأنا متأكدة من ده بس للأسف فيه حبة حواجز بيننا:
أولاً: فرق السن أنا أكبر منه بسنة.. السنة دي إحنا مش حاسّينها خالص؛ وخصوصاً إن أنا شكلي بيدّي أصغر من سني بكتير، وهو كمان شكله مش صغير؛ ده غير إننا متفاهمين ومتفقين جداً في كل حاجة.
ثانياً: إن كليته خمس سنين يعني لسه قدامه سنتين عقبال ما يخلّص دراسة أنا مش مشكلة بالنسبة لي خالص، وموافقة جداً إني أستناه.
ثالثاً: وأعتقد إن هي دي المشكلة الكبرى، إن والده عيان جداً، وهو المسئول عن رعاية والده؛ فطبعاً تعب والده مع ضغط الدراسة، وإنه كمان بيشتغل جنب الدراسة عشان يكوّن نفسه؛ كل ده ضغط كبير جداً عليه.
ده خلاه يطلب مني ما أكلمهوش وأسيبه في حاله.. بس أنا مش قادرة أشوفه بيتعذب كل ده وأفضل واقفة أتفرج أو أبعد وأروح أعيش حياتي.. عاوزة أساعده أقف جنبه.. أخفف عنه اللي هو فيه.. بس مش عارفة أعمل إيه ولا أعمل ده إزاي؟ وخصوصاً إنه في محافظة غير اللي أنا عايشة فيها.
يا ريت تقولوا لي أعمل إيه؟

a.f

لو عايز تفضفض لنا دوس هنا