لو كانت مكانك.. هل تفعل نفس أفعالك؟!!

أنا عندي 17 سنة وبجد مخنوق وحاسس إن الدنيا ضاقت بيّ أوي، والمشكلة إن أنا في سنة تانية ثانوي يعني سنة مصيرية وكنت على طول من الأوائل والبيت عندنا متوقع مني أول جمهورية!!! شفتم لدرجة إيه..
سبب الخنقة إن أنا كنت بحب واحدة كانت بالنسبة لي كل حياتي كنا بنذاكر وبنعمل كل حاجة علشان بعض يمكن تكون سبب من أسباب التفوق اللي كنت فيه، وسيبنا بعض وحاسس بعدها بفراغ رهيب ماليش نفس أعمل أي حاجة، ومش عارف أركز في مذاكرتي وما بقاش في أي حاجة تفرق معايا.
أنا مش عارف أعمل إيه؟! بس مستحرم إني أضيع مستقبلي علشان حاجة زي كده وإني بدل ما أدخل كلية الطب اللي أنا عايزها أضيع حلمي لمجرد إن أنا سبت واحدة كنت بحبها.
والمشكلة كمان اللي لسه حاسسها قريب إن أنا ليّ واحد صاحبي مات في حادثة عربية من أسبوع زعلت عليه وحسيت بعدها إن الدنيا مش مستاهلة وما بقاش ليّ نِفس لأي حاجة، أنا خلاص ما بقتش قادر أستحمل تعبت على الآخر، يا ريت لو تساعدوني بس بليز بلاش حكاية إنك في مرحلة مراهقة والحوارات دي؛ لأن أنا سمعتها كتير ومش هي سبب اللي أنا فيه معلش سوري لأن الرسالة ملخبطة بس فعلاً أنا حياتي دلوقتي كلها داخلة في بعضها.. ومش عارف أعمل إيه!!

أ.م