عزومة 13 رمضان

عصير المشمش المجفف بالبرتقال
عصير مفيد وصحي ولذيذ جداً..
المقادير:
* 1/4 كيلو مشمش مجفف
* كوب عصير برتقال
* 1/2 كوب سكر
* كوب مية
* 1/4 معلقة قرفة "للتزيين"
الطريقة:
1- هاتي المشمش وانقعيه في مية لمدة 5 ساعات، وبعد كده ضيفي إليه عصير البرتقال قبل أذان المغرب بربع ساعة، وحطيه هو والبرتقال والسكر والمية في الخلاط واضربيهم مع بعض كويس، وبعد كده قدّميه.. وبالهنا والشفا.
**********************
شوربة الكرفس
شوربة الكرفس
المقادير:
* حزمة كرفس مقطّعة قطعاً صغيرة
* 4 ثمرات بصل أخضر مقطّع قطعاً صغيرة
* 3 ثمرات طماطم مقطّعة قطعاً صغيرة
* فلفل اخضر مقطّع قطعاً صغيرة
* بصلة مقطّعة قطعاً صغيرة
* كيس شوربة بصل "من السوبر ماركت"
* ملح وفلفل
* أوراق خس "للتزيين"
الطريقة:
1- اخلطي جميع المقادير مع بعضها ماعدا أوراق الخس، واسلقيهم على النار لغاية ما يستووا، وبعد كده اطفي النار، وسيبي الشوربة لغاية ما تبرد، وبعد كده اضربيها في الخلاط.
2- بعد كده رجعي الشوربة تاني على النار وسيبيها تسخن، وبعد كده حطيها في أطباق الشوربة وزيني الطبق بأوراق الخس.

**********************
سلطة الطحينة بالخضراوات
سلطة الطحينة بالخضراوات
المقادير:
* 1/2 كوب طحينة
* 3 ثمرات طماطم مقطّعة قطع صغيرة
* فلفل رومي ألوان
* 1/2 كوب مية
* 3 معالق خل
* معلقة صغيرة ملح
* معلقة صغيرة كمون
* عصير ليمونة
* 3 فصوص ثوم مفرومة ناعم
* بقدونس مفروم "للتزيين"
الطريقة:
1- دوّبي الطحينة في المية وضيفي إليها الليمون والخل والثوم المفروم وقلّبيهم مع بعض.
2- قطّعي الطماطم والفلفل الرومي لمكعبات صغيرة وضيفيهم للطحينة، وبعد كده ضيفي إليها الملح والكمون وقلبيهم مع بعض.. وبالهنا والشفا.

**********************
صينية السمك البلطي المحشي
صينية السمك البلطي المحشي
المقادير:
* كيلو سمك بلطي
* بصلة كبيرة مقطّعة قطعاً متوسطة الحجم
* 3 قرون فلفل أحمر مقطّعين قطعاً صغيرة
* بقدونس وكزبرة وكرّات مقطّعين قطعاً صغيرة
* زيت زيتون
* بهارات سمك
* ملح وكمون
* نص رأس ثوم مفرومة
* بطاطس مقطّعة مكعبات صغيرة
* عصير 3 ليمونات
* شرائح ليمون
* جزر مقطّع شرائح
الطريقة:
1- هاتي فصوص الثوم وقرن فلفل أحمر مقطّعا قطعاً صغيرة، وحطيهم في الهون، ومعاهم الملح والكمون والبهارات، واطحنيهم كويس مع بعض، وبعد كده ضيفي إليهم الليمون وقلبيهم مع بعض.
2- هاتي السمك واغسليه كويس، وبعد كده ادهنيه من الخارج والداخل بالخلطة اللي إنتِ عملتيها وسيبيه لمدة نص ساعة علشان يتبّل كويس.
3- هاتي البصلة وقطعيها قطعاً صغيرة، وبعد كده تبليها بالملح والليمون، وضيفي إليها باقي الفلفل الأحمر والبطاطس والكزبرة والبقدونس والكرّات، واخلطي كل الحاجات دي مع بعضها، واحشي بيها السمك.
4- هاتي صينية الفرن وحطي فيها السمك، ودخليه الفرن، وسيبيه لغاية ما تلاقي إن السمك لونه احمرّ واستوى، طلعيه وحطيه في طبق التقديم، وزيّني الطبق بشرائح الجزر والليمون.. وبالهنا والشفا.

**********************
أرز باللبن
أرز باللبن
المقادير:
* 3 أكواب رز
* 3 أكواب لبن
* كوب نشا
* معلقة صغيرة فانيليا
* 6 أكواب مية
* 2 كوب سكر
* 1/2 كوب جوز هند
* 1/2 كوب زبيب "اختياري"
* 1/4 معلقة صغيرة ماء ورد
* معلقة صغيرة قرفة مطحونة
* أعواد قرفة سليمة "للتزيين"

الطريقة:
1- هاتي حلة متوسطة الحجم وحطي فيها 5 أكواب مية وحطيها على النار، وأثناء ما المية بتغلي هاتي الأرز واغسليه كويس، وبعد كده صفيه من المية اللي فيه.
2- بعد ما المية تغلي ضيفي إليها الأرز، ولما تلاقي الأرز بدأ يستوي ضيفي إليه السكر، وقلبيهم مع بعض كويس، وخدي بالك إنك في الوقت ده تخلي النار هادية علشان الأرز يستوي من غير ما يلزق.
3- بعد ما الأرز يستوي ضيفي إليه اللبن، وفي الوقت اللي اللبن والأرز بيغلوا هاتي كوباية مية، ودوبي فيها النشا وضيفيه تدريجياً إلى الأرز واللبن مع التقليب المستمر أولاً بأول، وضيفي إليه معلقة صغيرة فانيليا وماء الورد، وسيبيه على النار لغاية ما تلاقي إن الأرز قوامه بقى سميك، وبعدين اطفي البوتاجاز واغرفي الأرز باللبن في أطباق التقديم.
4- سيبي الأرز لغاية ما يبرد، وبعد كده زيني الأطباق بجوز الهند والزبيب والقرفة.

**********************
وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة...
واستنينا بكرة في عزومة جديدة، ومن هنا لبكرة أوعي تنسي تبعتي رأيك وتعليقك..
كمان لو عندك أي استفسار أو لو عايزة تعرفي تعملي أكلة جديدة، ومش عارفة تعمليها ابعتي وقولي لنا عليها واحنا هنقول لك على الطريقة على طوووول..
وإلى اللقاء غدا إن شاء الله
مع أطيب التمنيات بصوم مقبول وإفطار شهي بإذن الله
سلااااااااام
*********************
للتعرف على مزيد من الوصفات الشهية
اضغط هنا "سفرة دايمة"
*********************