لو نفسك تخس بجد.. جرّب ريجيم رمضان على "بص وطل"

في شهر رمضان المبارك هنتابع الريجيم مع الدكتور "محمد أبو الغيط".. اللي هيساعدنا إننا نجد حافز يدفعنا للانتظام في الريجيم، وخاصة إن "سفرة" رمضان وأطباقها الجامدة جداً بتخلّينا نضعف ونبطّل ريجيم... والحِجة "الدنيا صيام"، والجو حر "جوع" و"عطش"، هنعمل إيه؟!!
* أصعب حاجة في الريجيم قرار البداية... فما بالك في رمضان وبيوتنا تتنافس في المحمرات والحلويات.. إزاي نبدأ؟
رمضان شهر مهم جداً للناس اللي عاوزة تخس وتحقق رقم على الميزان، وخاصة من يلجأ للريجيم من أجل هدف محدد؛ بمعنى لو واحدة خطوبتها في العيد... بالمناسبة لاحظت من خلال عيادتي أن العيلة اللي منتظرة مناسبة بعد رمضان بيعملوا ريجيم مع العروسة ابتداءً من الأم وحتى بنات الأقارب علشان الفستان والصور والفرح والبحث عن عريس بالمرة!!
وكمان لو واحد بيدوّر على وظيفة وشايف إنه لازم ينزل شوية علشان يكون شكله معقول في البدلة.. وعلى كل الأحوال البحث عن حافز يساهم جداً في تحقيق معدلات مرتفعة في إنقاص الوزن.
وطبعاً رمضان فرصة مميزة وحقيقية؛ فنحن نمتنع عن الأكل لمدة تزيد على 12 ساعة.. في الأيام العادية بنستعين بالدواء علشان نقلل من شهيتنا للأكل.. لكن في الصيام الامتناع عن الأكل بيكون إجباري، وبكده نصف المهمة بتتحقق؛ يعني مش هاقدر "ألخبط في الأكل" خلال اليوم، وعلشان نستفيد عملياً لو ما فيش مناسبة بعد العيد تدفعنا للريجيم.. ممكن حط هدف تاني مهم.
* هل الصلاة بتساعد مع الريجيم؟!
لازم يكون في أذهاننا معلومة مهمة جداً؛ إن الجسم لا يحرق السعرات الحرارية بكفاءة في رمضان؛ لأن معدل الحرق بيكون أعلى في النهار، علشان كده كثرة الصلاة والعبادة بتساعد جداً الجسم في حرق السعرات الحرارية.
* يا ترى ممكن نحصل على وجبة حرة؟
طبعاً من الممكن أن نحصل على وجبة حرة في الأسبوع خلال الأيام الثلاث الأولى من كل الريجيم، وممكن "نأجّلها" ليوم فيه عزومة أو هنخرج مع أصحابنا أو عندنا إفطار جماعي أو أي مناسبة يتعذّر فيها أن نفطر وجبة ريجيم وناكل في الوجبة أي حاجة نفسنا فيها بحرية، لكن طبعاً دون إسراف.


والمفاجأة..
د."محمد أبو الغيط" بيقدّم لنا نوعين ريجيم لرمضان
هيستمروا معانا لمدة 4 أسابيع..
النوع الأول: ريجيم معقول ممكن نخس عليه لو اتبعناه بدقة من 2 - 3 كيلو، وهو مخصوص للناس اللي خايفة تتخن في رمضان، بس مش هتقدر تقاوم القطايف والخشاف والحاجات الحلوة.. هيكون للمجموعة دي نظام هيكون منشور على الموقع -وأرجو من قرّائنا إنهم يبعتوا بالنتائج أوّل بأوّل- ولو بتواجههم مشاكل يبعتوا علشان أقدر أساعدهم فيها، والمهم إننا في نهاية كل أسبوع نوزن نفسنا ونراقب النتيجة.
النوع الثاني: الريجيمات العادية اللي هنتّبعها في الأيام العادية، هذا الريجيم هو ريجيم قاسي شوية لو اتبعناه في رمضان؛ ولكن نتيجته مضمونة جداً، وممكن المريض يحقق رقم ممتاز، ويخس عدد كبير من الكيلوات بنهاية رمضان على أقل تقدير؛ ممكن يخس 5 - 6 كيلو أو أكتر بشرط أن يجعل وجبة الغداء هي وجبة الفطار، ووجبة العشاء الساعة 12، ووجبة السحور الساعه 4 وهي وجبة الإفطار في الأيام العادية، وممكن يتخلى عن وجبة السحور ويكتفي بوجبة العشاء ويعتبرها السحور.
وعلشان تتابعوا الريجيم معانا اضغطوا على اللينكات التالية:
* ريجيم معقول 2 - 3 كيلو
* ريجيم عادي 5 - 6 كيلو