وفّري وقتك في رمضان.. طريقة حفظ اللحوم والشوربة والصلصة

زي ما وعدناكم إننا على مدار الشهر هنتكلّم مع بعض عن التحضير لرمضان والاستعداد له..
علشان تكون ست البيت عندها الوقت الكافي إنها تعمل لأسرتها أحسن الأطباق..
وفي نفس الوقت تلاقي الوقت الكافي للعبادة، والاستفادة من شهر رمضان الكريم...
والنهارده هنكمّل كلامنا اللي بدأناه الأسبوع اللي فات...
*******************
اللحوم..
طبق أساسي على السفرة الرمضانية

على الرغم من ارتفاع الأسعار، فإن كل الأسر بتحاول على أد ما تقدر إن السفرة الرمضانية تكون عليها نوع من أنواع اللحوم يومياً؛ سواء كان سمك أو فراخ أو حمام أو بط أو لحوم حمراء...
ودلوقتي هنتكلّم على كل نوع من أنواع اللحوم، وهنعرف إزاي نحفظه بالطريقة المناسبة علشان يكون جاهز في ثلاجتك على الاستخدام على طول...
××××××××××
الأسماك تحتوي على مادة الأوميجا 3 اللي بتحمي الجسم من تكوين الجلطات
* الأسماك
من الأطباق اللي بتكون خفيفة جداً على المعدة وخصوصاً في الصيف، وكمان فيها قيمة غذائية عالية جداً؛ لأنها بتحتوي على نسبة من البروتينات والأحماض الأمينية المفيدة جداً للجسم، وكمان بتحتوي على مادة الأوميجا 3 اللي بتحمي الجسم من تكوين الجلطات، بالإضافة إلى إنها بتحتوي على اليود والفوسفور والكالسيوم، وكمان فيتامين أ، د.
وخدي بالك وإنتِ بتشتري السمك.. إنك تبصّي على عين السمكة واللي لازم تكون بتلمع، وما فيش عليها أي سحابة بيضاء، وكمان الخياشيم لازم تكون حمراء وما فيش عليها أي مخاط أو سوائل لزجة، ويكون جلد السمكة وجسمها مشدود وبيلمع وما فيش عليه أي ترهلات، وممكن تختبري السمك إذا كان طازة ولا لأ بإنك تضغطي بإصبعك على جسم السمكة، لو لقيتي المكان اللي ضغطتي عليه زي ما هو وما اتأثرش بالضغط تبقى السمكة دي طازة، أما لو لقيتي إن المكان اللي ضغطتي عليه دخل لجوه وفضل زي ما هو يبقى السمك ده مش طازة.
ولما تيجي تنظّفي السمك.. بتجيبي السمكة وتمسكيها من الوسط، وتبدئي بعد كده تشيلي القشر من عليها باستخدام سكينة مش حادة أوي، وبتمشي بالسكينة في الاتجاه من الذيل وحتى الرأس، وبعد كده قصّي الزعانف بمقص حاد، وافتحي السمكة من الجنب بالسكينة، وابدئي نظّفي السمكة من جوه كويس جداً، وطلّعي منها كل الأمعاء وتكتلات الدم اللي بتكون موجودة، وركّزي جداً على المنطقة اللي بيكون فيها العمود الفقري؛ لأن بيكون فيها تجمعات دم كتير، وممكن إنك تستخدمي فرشة أسنان قديمة لتنظيف السمكة من جوه.
وبعد ما تنظّفي السمك اغسليه بمية من الحنفية، وبعد كده انقعيه في مية وخل وليمون لمدة 20 دقيقة، وبعد كده افركي السمك تاني من جوه كويس، واشطفيه بالمية مرة كمان، وسيبيه على مصفى لغاية ما ينزّل ميته.
بعد كده قسّميه في أطباق فِل؛ بحيث إن كل طبق تكون به كمية تكفي ليوم، وغطي الطبق ده بكيس بلاستيك، بس اتأكدي إنه يكون نظيف تماماً وغير مستعمل قبل كده، وتفرغي منه كل الهوا.
وخلّي بالك لما تيجي تستخدمي السمك المجمّد ده إنك تطلعيه من الفريزر قبل الاستخدام بحوالي ساعتين، وتحطيه في رف الثلاجة من تحت لغاية ما يدوب، وبعد كده تبليه وتقليه أو تعمليه صينية على حسب ما إنتِ عايزة وعلى حسب نوع السمك اللي عندك.
وعلى فكرة إنتِ ممكن تتبلي السمك قبل ما تشيليه في الفريزر، بحيث إنه يبقى جاهز على الاستعمال على طول، وقت ما تحتاجيه، ودي مكونات تتبيل السمك وهي عبارة عن: "ملح + فلفل أبيض + كمون + كسبرة ناشفة مطحونة + ثوم مفروم + فلفل أخضر مفروم + ليمون" وبتخلطي كل المكونات دي مع بعض وبالكميات اللي تكفيكي، وبعد كده تاخدي من الخليط ده وتحشي به قلب السمكة، وسيبي السمك بالتتبيلة في الثلاجة لمدة ساعتين، وبعد كده قسّميه على أطباق فِل، وغطيه بكيس بلاستيك بنفس الطريقة اللي قولناها، وبكده السمك يكون جاهز عندك على الاستخدام على طول.

××××××××××
يُفضّل إنك قبل ما تشيلي اللحمة في الفريزر تقطّعيها لقطع صغيرة
* اللحوم الحمراء
يُفضّل إنك قبل ما تشيليها في الفريزر إنك تقطّعيها لقطع صغيرة مناسبة مع الحجم اللي إنتِ بتطبخي به، وبتشيليها في الفريزر من غير ما تغسليها؛ لأن الرطوبة العالية ممكن تتسبب في إن اللحمة تفسد بسرعة، وكمان يُفضّل إنك تشيلي قطع الدهون اللي تكون موجودة على اللحمة من بره.
ولما بتيجي تطبخيها يُفضّل إنك تطلعيها وتحطيها في الثلاجة قبل الوقت اللي هتطبخيه فيها ب10 ساعات؛ يعني ممكن تطلعي كيس اللحمة أول ما تصحي من النوم الصبح، ولما ترجعي من الشغل تشطفي اللحمة بالمية، وتسوّيها على النار بالطريقة اللي إنتِ عايزاها سواء مع الخضار أو تعملي بها كباب حلة أو أي صنف إنتِ عايزاه.
بس خلي بالك وإنتِ بتقسّمي اللحمة في أكياس الحفظ أو في الأطباق الفِل، إنك تحطي في كل كيس الكمية اللي تكفي لوجبة على حسب عدد أفراد أسرتك، علشان ما تضطريش إنك تجمّدي اللحمة اللي هتتبقى بعد ما تسيح؛ لأن تجميد اللحمة بعد تسييحها ممكن يسبب إن اللحمة تتلف أو يتغيّر طعمها.
وبعد ما تقسّميها تخلّصي من الهواء الزيادة اللي موجود في الكيس، وحطيه في الفريزر، ويُفضّل إنك تحطي اللحمة على سطح الفريزر مباشرة.
وعلى فكرة إنتِ ممكن تغسلي اللحمة وتشوّحيها على النار لمدة 5 دقايق قبل ما تشيليها في الفريزر مع شوية ملح وفلفل، وبعد كده تسيبيها تبرد خالص، وبعدين تقسّميها في الأكياس وتشيليها في الفريزر بنفس الطريقة اللي قولنا عليها، وبكده تبقى اللحمة جاهزة عندك، ولما تحتاجيها في أي وقت هتطلعيها من الفريزر وتحطيها على النار مباشرة ومش هتستني لما تسيح، وتعمليها بعد كده بالطريقة اللي إنتِ عايزاها.
أما اللحمة المفرومة فإنتِ ممكن تعصّجيها وتسيبيها تبرد قبل ما تشيليها في الفريزر، وتقسّميها على أكياس وتفرّغي منها الهواء، وبكده تبقى جاهزة عندك علشان تعملي بها صواني المكرونة بالبشاميل والجلاش باللحمة المفرومة والمسقعة وكمان تقدري تحشي بها البطاطس.
ودي طريقة تتبيل اللحمة المفرومة وهي إنك تجيبي بصلة وتقطّعيها لقطع صغيرة وتشوّحيها على النار في سمن أو زيت، وبعد ما البصل يتحمّر شوية حطي اللحمة المفرومة والبهارات والملح وسيبيها على النار لغاية ما تتعصج.

××××××××××
ممكن تقسمي الفراخ قبل ما تحفظيها
* الطيور
لما بتيجي تحفظي الطيور الطازة غير المجمدة بتجيبيها وتغسليها كويس جداً من جوه ومن بره، وبعد كده تسيبيها لغاية لما تنشف، وبعد كده تحطيها في أكياس الحفظ الجافة، وتتأكدي إنك تفرغي الهوا كله منها.
ولما تيجي تطبخيها بتطلعيها من الفريزر، وبتسلقيها على طول مش لازم تستني لما تسيح.
وفيه حركة جامدة جداً ممكن تعمليها وهي إنك تجيبي الفراخ، وتخلي الفرارجي يقسّمها لك، ويخلي لك الصدور علشان تعمليها بانيه.
وبعد كده تاخدي وراك الفراخ وتغسليها وتشيليها في الفريزر، أما صدور الفراخ فبتتبليها وتشيليها متبلة في الفريزر، وبكده تبقى جاهزة عندك علشان تعملي بها طبق فراخ بانيه محمّر مع شيبسي ومكرونة أو تقطعيها لقطع ضغيرة وتعملي بها صينية نجرسكو أو طبق أرز بالفراخ والخضراوات.
ودي طريقة تتبيل الفراخ البانيه... وهي إنك تجيبي بصلة مفرومة وتحطي عليها ملح وفلفل أسود وبهارات وزبادي وعصير ليمون وخل، وبتقلبيهم كويس مع بعض مع عصر البصلة المفرومة علشان تنزل ميتها في التتبيلة، وبتحطي كل التتبيلة دي على الفراخ وتقلّبيها كويس، وتسيبي الفراخ بالتتبيلة في الثلاجة شوية، وبعد كده تقسّمي الفراخ المتبلة على الأكياس البلاستيك وتحطيها في الفريزر بنفس الطريقة اللي قولنا عليها قبل كده.

*******************
الشوربة والصلصة..
عامل مشترك في كل الأكلات

الشوربة من الأطباق الأساسية على سفرة رمضان
* الشوربة
بتعتبر من الأطباق الأساسية على سفرة رمضان، وعلشان توفّري وقتك ممكن تعملي أنواع مختلفة من الشوربة وتقسّميهم على أكياس بلاستيك وتقفليهم كويس، بحيث إن الكيس ما يكونش فيه أي هوا، واحتفظي بهم في الفريزر، وكل يوم تطلعي كيس الشوربة اللي هتستخدميه وتحطيه على النار وفي خمس دقايق تكوني جهزتيها.
ومن أنواع الشوربة اللي ممكن تحفظيها الشوربة العادية أو المرق واللي بتطلع من سلق الفراخ أو اللحمة، بس قبل ما تحطيهم في الأكياس صفي الشوربة كويس من بواقي البصل والحبهان اللي فيها.
كمان ممكن تحفظي شوربة البطاطس وشوربة العدس وشوربة الخضار، بس دي بقى بتضربيها في الخلاط، وبعد كده تحطيها في أكياس بلاستيك في الفريزر وعند الاستعمال بتطلعيها وتحطيها على النار ومعاها كمية من اللبن، وبكده تقدري تعملي نوع شوربة كل يوم في رمضان في أسرع وقت.
ولما تيجي تطلعيهم عند الاستخدام حطيهم على نار هادية وهما مجمدين، وبكده يبقى طبق الشوربة جاهز معاكِ في خمس دقايق وبس.

××××××××××
ممكن تعملي كمية من الصلصة المتسبكة وشيليها في أكياس في الفريزر
* صلصة الطماطم المسبكة
الصلصة عامل أساسي بيدخل مع معظم أصناف الخضار اللي ممكن تعمليها زي البامية أو الفاصوليا أو البسلة، وعلشان تسهلي على نفسك ممكن إنك تعملي كمية من الصلصة المسبكة وتشيليها في أكياس في الفريزر.
ودي الطريقة اللي بتسبّكي بها الطماطم.. وهي إنك تجيبي الطماطم وتضربيها في الخلاط، وبعد كده تصفيها وتحطيها على النار، وممكن تضيفي معاها كمية صغيرة جداً من السمنة، وتسيبيها على النار لغاية ما تتسبك أو كميتها تقل وتتسبك على النار، وبعد كده سيبيها تبرد، وبعد كده وزّعيها في الأكياس، وفرّغيها من الهوا واقفليها كويس وحطيها في الفريزر.

×*×*×*×*×*×*×
اقرأ أيضاً:
وفّري وقتك في رمضان.. طريقة حفظ الخضار والفاكهة والعصاير
ولغاية هنا خلص كلامنا النهارده...
واستنونا في العدد الجاي علشان نكمل باقي استعداداتنا لرمضان.. وما تنسيس تبعتي لنا نصايحك الجامدة اللي بتعمليها وإنتِ بتستعدي لرمضان..
علشان كل أصدقائنا يستفيدوا منها...
سلام،،،