لو إنتِ حامل جديد، ولسه ما عندكيش أي خبرات في الموضوع ده، يبقى أنتِ أكيد حيرانة وقلقانة، ومش عارفة تاكلي إيه ولا تشربي إيه في فترة حملك دي. والنهارده في "قمر 14" حبينا نريحك من الحيرة والقلق، ونقول لك على مجموعة وجبات وأكلات بينصحك بيها الخبراء والمتخصصون تقدري تاكليها وإنتِ حامل؛ علشان تفيدك إنتِ وطفلك... ساندويتش اللحمة بالسلطة الخضراء خذي بالك إنك وإنتِ حامل بتحتاجي نسبة حديد أكبر من اللي بتحتاجيها في الوقت العادي مرة ونصف، وعلشان تحصلي على نسبة الحديد دي ممكن تعملي ساندويتش لحمة (بقري أو ضأن) بالسلطة الخضراء اللي تراعي إنك تحطي فيها كل أنواع الخضار الموجودة في السوق زي الخيار والطماطم والخس والفلفل والبنجر والجزر والبقدونس والبصل والجرجير؛ لأن الأكلة دي هتديكِ كمية الحديد المناسبة ليكِ وأنتِ حامل، وكمان هتوفّر لك نسبة مناسبة من عنصر الزنك. وخذي بالك من إن الحديد مهم جداً في آخر 3 شهور من الحمل؛ وده لأن مخازن الحديد في جسم طفلك بتبدأ تتبني. ساندويتش السردين بالعيش الأسمر لو قدرتي تحصلي على أكلتين أو ثلاث أكلات بحرية في الأسبوع يبقى إنتِ كده وفرتِ لنفسك ولحملك مكوّنات غذائية وفيتامينات مهمة جداً؛ زي الحديد والزنك والدهون الأساسية واليود، ومن الأكلات السهلة واللذيذة اللي ممكن تعمليها وتاكليها هو ساندويتش السردين أو السالمون، بس تحطيه في عيش أسمر أو بلدي، وتحطّي عليه شرائح الطماطم الطازجة علشان تبقى أكلة متكاملة... وبألف هنا وشفا. عصير الفواكه باللبن والزبادي الكالسيوم من العناصر الغذائية المهمة اللي بيحتاجها جسمك؛ لأنه بيساعد في بناء عظام وأسنان وعضلات طفلك بشكل سليم وكمان جهازه العصبي. وأخطر حاجة إنك لو ما حصلتيش على وجبات غنية بالكالسيوم ولو ما قدرتيش توفّري الكالسيوم لطفلك فهيضطر يمتصه من عظمك إنتِ!! وعلشان كده ممكن تعملي العصير ده، واللي بيتكوّن من خليط من اللبن والزبادي وأي فاكهة إنتِ تختاريها وتضربيهم مع بعض في الخلاط، والعصير ده هيوفّر لك نسبة جيدة من الكالسيوم اللي إنتِ محتاجاه. فايدة البرتقال بتزيد لو أكلتيه أو شربتيه مع وجبة فطار متكاملة البرتقال مع الإفطار بيحتوي البرتقال على حامض الفوليك والكالسيوم، ومليئ كمان بفيتامين "سي" اللي بيبقى مهم جداً، ليكِ وإنتِ حامل وكمان مهم لطفلك. وفايدة البرتقال بتزيد لو أكلتيه أو شربتيه مع وجبة الفطار المتكاملة، واللي لازم تراعي إن يكون فيها بروتين (موجود في البيض والفول)، والحديد (موجود في حبوب الكورن فليكس والجرجير)، والكالسيوم (موجود في الجبنة). ساندويتش البيض بالعيش الأسمر لو كنتِ يوم تعبانة ومرهقة ومش قادرة تطبخي ما تشيليش هَم؛ لأنك هتحصلي على العناصر الأساسية والمغذية في أكلك بمجرد إنك تاكلي بيض سواء كان مسلوق أو مقلي أو حتى أومليت؛ وده لأن البيض بيوفّر لكِ نسبة جيدة جداً من البروتين والحديد واليود، بس أهم حاجة إنك تاكلي البيض بالعيش الأسمر؛ علشان يوفّر لك الألياف المهمة جداً ليكِ وللجنين، ويا سلام لو كان معاه شرائح الطماطم علشان تزيد من نسبة امتصاص الحديد في الجسم. مشروب الزنجبيل الساخن من المعروف إن الستات في أول الحمل بتمر بنوبات من الدوخة والغثيان؛ علشان كده خبراء التغذية بينصحوكِ بأهمية شرب الزنجبيل الساخن، وخصوصاً أول لما تصحي الصبح، وكمان بين الوجبات بمعدل 9 أكواب متوسّطة يومياً؛ علشان يقلل عندك الإحساس ده، وكمان يمد جسمك بالسوائل المهمة خلال فترة الحمل. ما تاكليش إيه؟! خدي بالك إنك لازم في الفترة دي تركّزي على إنك تاكلي الأكل المفيد، وتبعدي عن كل أنواع الأكل الضار أو غير المفيد؛ زي المشروبات الغازية والشاي والقهوة، وتحاولي إنك ما تكتريش من أكل الحوادق والمخللات، ده غير طبعاً بُعدك التام عن التدخين أو أي مصدر تدخين، يعني لو كان زوجك بيدخن أو أي فرد في عيلتك يبقى لازم تبعدي عنه تماماً؛ لأن ده هيضر حملك بشكل كبير. وفي النهاية يا رب يكون الموضوع عجبك... وفي انتظار رأيك ومشاركتك... تابعينا علشان هايكون معانا قريّب حاجات أكتر عن الحمل والولادة.. وكمان طرق للاهتمام بطفلك،،،
