حبك مزعوم وعودتك لها ستضرّها

السلام عليكم.. أنا أوقعت نفسي في مشكلة أنا السبب فيها.. أنا مرتبط ببنت من 3 سنين، والبيت عندي عارفين؛ بس الظروف عندي مش تساعد إني أتقدم وأخطبها دلوقتي بسبب الالتزامات اللي هتكون عليّ، وبحبها وباقدّرها وباثق فيها، وعارف ومتأكد إنها بتبادلني نفس الشعور وممكن بتحبني أكتر ما أنا بحبها.
بس كان فيه مشكلة بتواجهنا شوية إن أنا وهي مش بنكون متفقين دايماً أو يعني فيه مشاكل كتير بسبب عدم توافقنا ده.
وحصل من فترة إن أنا كلّمت بنت على النت وخدنا على بعض بسرعة؛ مع إن أنا مش بحبها، ممكن تسمي ده تضييع وقت، ممكن تسمّيه خيانة ممكن تسميه أي حاجة.. واللي أنا مرتبط بيها عرفت وزعلت وبِعدت عني.
أنا عملت حاجات قبل كده غلط، وجيت عليها كتير، وكنت بابقى شديد معاها عشان بابقى خايف عليها عشان بحبها، وهي خجولة وعندها حياء؛ فما كانتش بتتكلم كتير فما كنتش باحس بحبها ده؛ مع إن أنا عارف إن هي بتحبني أوي.
أنا عارف إن أنا غلطان وعارف إن غلطي كبير، وإن هي من حقها إنها مش تسامحني أو تبعد عني؛ بس أنا ما اقدرش أعيش من غيرها، وبحبها بجد، واتغيرت وباتغيّر أكتر عشان أحاول أسعدها أكتر؛ بس أنا خايف أوي إنها مش تسامحني.
أنا غلطت كتير وهي استحملت كتير، وهي كانت بتعمل غلطات صغيرة جداً بالنسبة لأي حاجة أنا عملتها، وما فيش إنسان معصوم من الخطأ.
وأتمنى أن يكون الرد في أسرع وقت وتساعدوني على إني أعمل أي حاجة عشان أكون معاها وإنها تسامحني.
fast as ablink

لو عايز تفضفض لنا دوس هنا