طاجن الأرز المعمر وكيكة الجزر في عزومة "سفرة دايمة"

يوم الجمعة بتحلى اللمة على الأكل..
علشان كده حبينا نشاركك اللمة الحلوة دي..
ونكون معاكِ خطوة بخطوة وإنتِ بتحضّري لأحلى وأجمل عزومة في الدنيا..
ونقدّم لك كل يوم جمعة اقتراح لعزومة مكوّنة من العصير والطبق الرئيسي وطبق السلطة وطبق الحلو..
علشان تنوّعي لعيلتك.. وتبهريهم بأكلاتك الجامدة..
تعالي بقى نشوف هنعمل إيه النهارده..
*****************
المشمش من أفيد الفواكه للبشرة والشعر
عصير المشمش
المقادير:
1/4 كيلو مشمش
2 كوب ماء بارد
1/4 كيلو لبن حليب "اختياري"
معلقة عصير ليمون
1/2 فنجان سكر
مكعبات ثلج
الطريقة:
1- اغسلي المشمش كويّس، وشيلي منه النوى، وقطّعيه لقطع صغيرة.
2- اخلطي المشمش المقطّع مع السكر واللبن والمية وعصير الليمون، واضربيهم في الخلاط كويس أوي.
3- صفّي العصير بالمصفاة كويس.
4- حطّي عصير المشمش في أكواب العصير، وضيفي إليه مكعبات الثلج وقدّميه.. وبالهنا والشفا.
*****************
سلطة متكاملة العناصر الغذائية
سلطة الفراخ بالمايونيز
المقادير:
صدر فرخة مسلوقة
4 معالق كبيرة مايونيز
كوب خس مقطّع شرائح
1/2 كوب جزر مبشور
ملح وفلفل أسود
الطريقة:
1- أحضري صدر الفرخة المسلوقة أو أي بواقي فراخ مسلوقة عندك، وتبّليها بالملح والفلفل.
2- قطّعي الفراخ لقطع صغيرة، وضيفي عليها الخس والجزر وقلبيهم مع بعض.
3- ذوّبي المايونيز مع معلقة مية، وتبّليه بالملح والفلفل على حسب رغبتك.
4- ضيفي خليط المايونيز لخليط الفراخ، وقلّبيهم كويس مع بعض، وقدّميها باردة.. وبالهنا والشفا.
*****************
الكرفس يحتوي على الكالسيوم
شوربة الكرفس
المقادير:
حزمة كرفس
بصلة متوسطة
معلقة كبيرة زبدة أو سمن
3 كوب ماء
مكعب مرقة دجاج
ملح وفلفل
ورق لاورا
زعتر
معلقة كبيرة من الدقيق
كوب لبن
الطريقة:
1- اغسلي الكرفس كويس وقطّعيه هو والبصل لقطع صغيرة.
2- حطي الزبدة في حلة وحمّري فيها البصل والكرفس، وبعد كده غطيها وسيبيها على النار لمدة 10 دقائق.
3- بعد كده ضيفي الدقيق على الكرفس والبصل، وقلّبيهم مع بعض، وبعد كده ضيفي اللبن ومرقة الدجاج وورق اللاورا والزعتر والملح والفلفل.
4- غطّي الحلة، وسيبيها على نار هادئة لمدة 20 دقيقة مع التقليب.
5- بعد كده اضربي الخليط في الخلاط الكهربائي بعد ما تشيلي ورق اللاورا منه، وبعد كده حطي الخليط مرة تانية على النار وسيبيه لمدة دقيقتين.
6- وبعدين صبّي الشوربة في أطباق التقديم، وممكن تزينيها بالكرفس... وبالهنا والشفا.
*****************
طاجن الأرز المعمر
طاجن الأرز بالقشطة والخضار
المقادير:
2 كوب أرز
2 معلقة زبدة كبيرة
كوبين ونصف لبن ساخن
1/4 كوب قشطة
ملح وفلفل
1/4 كيلو بسلة وجزرة مقطّعة
بصلة صغيرة مفرومة
الطريقة:
1- اغسلي الأرز بالماء.
2- أحضري طاجن فخار وحطّيه على نار هادية، وحطي فيه الزبدة وربع كوب من القشطة، وقلّبيهم، وبعد كده حطي الملح والفلفل والبصلة المفرومة، وبعد كده ضيفي كل كمية الأرز، وضيفي اللبن تدريجياً مع التقليب، وسيبي الخليط لمدة 10 دقايق على نار هادية جداً.
3- بعد كده اسلقي البسلة والجزر.
4- بعد ما البسلة والجزر يستووا ضيفيهم على الأرز ودخليهم الفرن.
5- أوّل ما تحسّي إن الأرز بدأ يدخل في السوى، طلعي الطاجن وضيفي القشطة على سطح الرز، ودخليه الفرن مرة تانية وسيبيه لمدة 10 دقايق أو ربع ساعة.. وبالهنا والشفا.
*****************
كيكة خفيفة ولذيذة
كيكة الجزر
المقادير:
كوب ونصف دقيق منخول
3 بيضات
كوب زبدة أو سمن
كوب لبن
كوب ونصف سكر عادي
جزرة مبشورة
2 معلقة صغيرة بيكينج باودر
معلقة صغيرة ملح
فانيليا
الطريقة:
1- اخلطي الجزر المبشور مع السكر، وسييبهم لمدة ساعة، وبعد كده اضربيهم كويس في الخلاط.
2- بعد كده اضربي السمنة أو الزبدة بالمضرب كويس لغاية ما تلاقي لونها افتح، وبعد كده ضيفي معاها البيض والفانيليا والملح واضربيهم كويس جداً مع بعض.
3- ضيفي عليهم خليط الجزر والسكر، واضربيهم كلهم مع بعض مرة تانية لغاية ما تحسي إن الخليط بقى هش.
4- اخلطي الدقيق المنخول مع البيكينج باودر وضيفيه على الخليط السابق.
5- أحضري الصينية وادهنيها بقليل من الزبدة وغلفيها بطبقة خفيفة من الدقيق، وبعد كده صبي الخليط فيها.
6- دخلي الصينية في فرن ساخن على درجة حرارة متوسّطة، وسيبيها لمدة 45 دقيقة أو لغاية ما تتأكدي إنها استوت، وبعد كده طلعيها وممكن تزينيها بشيكولاتة بيضاء خام أو بالكريم شانتيه وقدميها.. وبالهنا والشفا.
وفي النهاية نتمنّى إن عزومة النهارده تكون عجبتِك..
وتجرّبي كل الوصفات وتبعتِ تقولي لنا على النتيجة..
وكمان لو عندك وصفة حلوة عايزة تشتركي بها معانا..
ممكن تبعتيها لنا على لينك...

"ورينا شطارتِك"
وإلى اللقاء في العزومة الجاية،،،