جمالك بالألوان مع "جيلان".. الملابس الفضفاضة موضة صيف 2010

أهلاً بكل بنات "قمر 14"، أنا "جيلان عاطف" خبيرة ميك أب ولفات طرح واستايلست..
بجد أنا سعيدة جداً إني هاكون معاكم ومع فريق "قمر 14"؛ علشان نتعرّف مع بعض على كل الحاجات اللي تهم البنات والستات..
هنتكلّم مع بعض في كل حاجة جديدة؛ في الموضة ولفات الطرح، وهنتعلّم مع بعض الخطوات الصحيحة اللي أي بنت ممكن تعملها بنفسها علشان تعمل ماكياج زي المحترفين بالظبط، وكمان مش هننسى عرايس "قمر 14" اللي هنقدّم لهم أحدث موضة في لفات الطرح والميك أب الخاص بالعرايس..
ودلوقتي يلّا بينا نبدأ مع بعض في أول حلقة من حلقات...
"جمالك بالألوان.. مع جيلان"
حلقتنا النهارده هنتكلّم فيها عن موضة صيف 2010 وهنعرض فيها طريقة بسيطة لعمل ربطة حجاب مناسبة للنهار، لكن بشكل مختلف وجديد، وكمان هنشوف مع بعض إزاي نقدر نختار اللبس المناسب، ونقدر نداري به عيوب جسمنا، وكمان هنشوف أحدث خطوط الموضة السنة دي...
ربطة حجاب سهلة ومختلفة
دلوقتي هنشوف بالخطوات إزاي نعمل ربطة حجاب سهلة وبسيطة، وفي نفس الوقت شكلها مختلف وجديد ومناسب لفترة الصبح.. والخطوات هي:
- أول حاجة هنعملها إننا نغطي الشعر بباندانا قطن، علشان تثبّت الطرحة، وكمان بتحافظ على فروة الرأس، وخصوصاً إن الشعر بيكون متغطي لفترة طويلة.
- بنحاول نداري منطقة الرقبة والأذن بإننا ندخّل الباندانا في رقبة البادي اللي إحنا لابسينه؛ لأن ده بيدي شياكة أكتر، وكمان مناسب من الناحية الدينية.
- بعد كده بنجيب طرحة موف سادة خامتها شيفون استرتش، والخامة دي بتكون موجودة في محلات القماش، ونقدر نجيبها بالمتر على حسب احتياجنا، والطرحة اللي هنستخدمها دي عرضها تقريباً متر ونصف، وبنثبّتها على الباندانا ونربطها على ورا، ونخلي ناحية قصيرة وناحية طويلة، ولازم ناخد بالنا إننا نتني طرف الطرحة وخصوصاً الطرح الشيفون؛ لأنها بتدي شكل أفضل وكمان بتدينا ثبات أكتر للطرحة.
- بنثبّت عليها بعد كده طرحة شيفون مشجرة، فيها من نفس ألوان اللبس اللي الموديل لبساه، وبنربطها على ورا، وبنثبّتها بحيث يكون عندنا ناحية طويلة وناحية قصيرة.- بنجيب الطرف الطويل من الطرحة السادة ونلفه على أدام، ونثبته تاني من ورا، وبعد كده بنجيب عليها الطرف الطويل من الطرحة المشجرة ونثبته من تحت، وأهم حاجة إننا نثبت الطرحة كويس علشان نكون واثقين من إنها هتفضل مظبوطة معانا لفترة طويلة.
- بعد كده هنلف الجزء الباقي، ونثبّته على ورا بشكل بسيط خالص.
وبالخطوات البسيطة دي نقدر نعمل لفة طرحة رقيقة وجديدة في نفس الوقت، والربطة دي على فكرة بتناسب الوش الطويل والرفيع؛ لأننا عملنا لفة الطرحة من أدام بدوران بسيط من غير أي كروسات، وكمان لما جينا نلف الطرحة السادة عملنا فيه كثافة بسيطة من ورا ومن الجناب؛ علشان يدينا امتلاء ودوران للوجه، وكمان بيبعد العين عن إنها تلاحظ نحافة واستطالة الوش.

إضغط لمشاهدة الفيديو:
الملابس الفضفاضة موضة عالمية
أكيد مع الصيف ودرجات الحرارة العالية كلنا بنلجأ للشيفونات والأقطان والحراير، وكل الخامات السهلة والبسيطة اللي ما تزودش من حرارة الجو علينا وخاصة للمحجبات..
والميزة السنة دي إن فيه تصميمات كتيرة مناسبة للحجاب؛ زي السراويل الواسعة والفضفاضة والأقمشة القطنية، وده هو اتجاه الموضة العالمية من السنة اللي فاتت، والموديلات البسيطة المهدلة اللي بيكون فيها انسيابية دي بتكون مناسبة أكتر مع الأجسام الممتلئة؛ لأنها بتدينا شكل متناسق وبتدي طول للجسم..
وزي ما هنشوف في الفيديو إن الموديل معانا لابسة بادي وعليه "سالوبت" نازل على واسع وماسك على الساق من تحت زي السروال..
ودلوقتي تعالوا نتكلّم بالتفصيل عن الاستايل اللي هنشوفه مع بعض...
* الدرابيه للبنت النحيفة من فوق
تصميم السالوبت اللي هنشوفه فيه قَصة درابيه عند منطقة الصدر، وده بيناسب أكتر البنت اللي عندها منطقة الصدر صغيّرة، أما البنت اللي بيكون عندها منطقة الصدر كبيرة يُفضّل إنها تبعد عن أي تصميمات فيها قصات كتير من فوق علشان ما تلفتش الانتباه للمنطقة دي.
* البوليرو موضة في صيف 2010
طبعاً البوليرو موضة جداً السنة دي، ونازل بألوان وتصميمات كتيرة، وأنا فَضّلت إن الموديل تلبس "بوليرو" على السالوبت؛ لأن تصميم السالوبت بحمالات، وعلشان كده من الأفضل إننا نلبس بوليرو أو أي حاجة بكُم واسع؛ لأن الذراعات مش بيكون شكلها حلو وإحنا لابسين بادي ضيق.
* الحزام
الحزام من الإكسسوارات الضرورية، واللي بيدي شياكة وأناقة سواء كان الحزام العريض على الوسط أو الحزام الساقط، لكن لازم ناخد بالنا إن البنت الممتلئة من منطقة الوسط مش هينفع إنها تحددها بحزام ضيق على الوسط، والأفضل إنها تلبس حزام ساقط شوية عن منطقة الوسط، أما البنت اللي منطقة الوسط عندها صغيرة أو متوسطة فما فيش مشكلة إنها تلبس حزام على الوسط.
وإحنا اختارنا الحزام باللون البني، واللون البني بيليق على ألوان كتيرة زي الزيتوني الفاتح والبيستاج والموف والزيتي والبيج.
* الكعب العالي عنوان الأنوثة
أنا باشوف إن الكعب العالي بيدي شياكة وأنوثة، لكن مش شرط في كل وقت أو في كل مكان، يعني الكعب العالي مش بيكون مناسب مع الجامعة أو الشغل، وأهم حاجة إننا نختار الكعب المريح اللي بيكون حتة واحدة علشان يدينا توازن.
وزي ما هنشوف الصندل اللي معانا لونه بني علشان يليق مع لون الحزام، وهو عبارة عن "سيور استك" والاستايل ده مريح جداً في اللبس.
* الإكسسوارات
بالنسبة للإكسسوارات إحنا اختارنا حاجات بسيطة ورقيقة تكون مناسبة للصبح، واختارنا عقد قصير علشان يبان من الدرابيه الموجود في السالوبت.

إضغط لمشاهدة الفيديو:
وكده زي ما شفنا مع بعض، قدرنا نحصل في النهاية على مظهر بسيط ورقيق، وفي نفس الوقت أنيق نقدر نخرج به بعد الظهر أو الصبح وإحنا رايحين الشغل.
وفي النهاية احب اشكر كل الناس اللي ساعدوني علشان اقدر اقدم لكم كل الجديد في موضة صيف 2010:
ملابس: "منال فلاورز" - تليفون 0108255551
إيشاربات: محل "scarfobia" - تليفون 0105246632
إكسسوار: مدام مها - تليفون 0125671899 - 0126767583
وبكده تكون خلصت حلقتنا النهارده..
نتمنّى إنها تكون عجبتكم..
واستنونا الحلقة الجاية..
علشان نكمل كلامنا عن موضة صيف 2010
وهاستنى تعليقاتكم وأسئلتكم..
وإلى اللقاء في الحلقة القادمة،،،