حسام الشاعر وقصيدة: (صوت فلسطين)

لما تيجي تطلعني من بيتي
وتقولي ملكش بيت
ولوشكيت هتبقي علي نفسك جنيت
مش هسكت وهقولها باعلي صوت
انا فلسطيني عمري ما اعرف السكوت
هاخد علم بلدي واحطه فوق بيتي
واقول الصهاينه سرقوا مني بيتي
اتكاتروا علي الاغراب
والعرب قفلوا في وشي الباب
علوا صوت الاذان في الاقصي
وسمعوا كل البلاد
وقولوا فلسطين قتلوا فيها الولاد
قتلوا الاطفال في بلادي بدم بارد
وطلعونا من المساجد
خبروهم الدموع عزيزة علي الرجال
الاقصي ينزف من الاحتلال
قطعوا اغصان الزيتون
والارض أصابها السكون
فين الرحمة اللي في الاديان
فين حقوق الانسان
دول ميعرفوش دين
عمرنا ما هننسي مذبحة دير ياسين
سال دم الاطفال
وفي المعتقلات حبسوا الرجال
الليل حزين علي فلسطين
والشمس طالعة من غير حرارة
صعبان عليها المرارة
خايفة تحرق قلوب
اتحرقت من صبر ايوب
وراء كل شهيد مات
انقطعت قلوب الامهات
ادعولي بكره اكون شهيد
وده هيكون عيد
علشان اروح لربنا واشتكيله
وقوله يارب سرقوا مني الارض
ولما دافعت عنها قتلوني
وانا طول عمري منها
ادفنوني بدمي وبلغوا امي
تدعي في الليل الحزين
يطلع فجر فلسطين
انا مش اغلي من الملايين
اللي ضحوا علشان فلسطين
عدت عليا السنين يابلادي
وامتي تعودي يا ارض اجدادي
ايوه احنا المستضعفين
احنا اهل فلسطين
هندافع عنها بالحجارة
وهنخرج في انتفاضة
وتكتب لينا الشهادة
عدت السنين وضهري انحني
من الحزن يا فلسطين