شرعية الليمون

لما قلت هروح احط اسمك في الصندوق .. مكنش قدامي غيرك .. عصرت علي نفسي اللمونة وقلت هحط اسمك .. ماهو اصل مينفعش احط اسم واحد بيني وبينه دم اخويا .. ولما قلت هروح احط اسمك .. قريت في وشك خير .. وقلت دا اللي علي ايده هشوف مصر احسن .. دا اللي هيجبلي حق اللي مات عشان هو يعد علي كرسي العرش ويربع .. دا اللي هيخلي الفقير اللي تحت بيتنا يلبس جزمة عشان البرد .. دا اللي ,, دا اللي ,, دا اللي .. .. .. ..
لكن ايه اللي حصل .. بعد لما حطيت اسمك في الصندق الاسود .. واعلنوك رئيس ليا .. مافيش يادوب كام اسبوع .. يقع اول 16 شهيد في عهدك مره واحده وياريتهم اي حد .. دول كانوا من خير اجناد الارض يا مرسي .. ساعة الفطار وهم صايمين ، وخرجت وقلت هتجبلي حق اخويا اللي مات وهتقطع ايد الغدر .. وأدي التقارير وادي العمليات وادي والتحقيقات .. طب وبعدين جبت حق اخويا يا ريس .. طب قطعت ايد الغدر ..
وزي عادة الشعب الغلبان اهو بينسي مع الوقت .. بس افتكر ان فيه ام ضناها واحشها .. واخت نفسها تشوف اخوها .. وعروسة كانت مستنيه عريسها .. واب نفس يرجع يتسند علي ابنه ..
ومرت الايام .. ونطلع من نقرة نقطع في دُحديره .. أصحي علي صوت صراخ ام في التليفزيون مات ليها 3 أولاد في حادثة قطر .. أصل المزلقان مكنش مقفول .. الله !! طب وايه اللي خلي سواق الاتوبيس يعدي بسرعة .. معلش المدرسة بعييييييد اوي عن القرية ومفيش وقت ..
طلع المسئول وقال جملته الشهيرة " ندين ونشجب ونحتج " هنطور المزلقان عشان اولادنا يبقوا في امان ..
حد شاف حاجة !!! !!
ها كفاية كدا .. ولا أحكي تاني عن حادثة كمان ..
أحكيلك بقي شوية عن أخواتي ..
شوف يا مرسي .. كان فيه جيكا اللي مات برصاص داخليتك لما كان نازل يطلب حق اللي مات في محمد محمود اول مره .. بس راح يجيب حقه قام مات .. جيكا انتخبك عشان تجبله حق اخوه بس للاسف خليته يلحقه اسرع .. ماهو اصل كان هيعد يستني وفي الاخر اللي موت اخوه هيطلع برائة ..
احكيلك علي الحسيني ابو ضيف اللي كان بيكشف جماعتك وفضايحهم قاموا قتلوه برصاصهم قدام قصرك ..
احكيلك علي كريستي والجندي اللي نزلوا في ذكري الثورة يطالبوا بحق اللي مات من سنتين وحقه لسه مجاش .. تقوم جمعاتك تقول علي واحد بلطجي والتاني خبطته العربية ..
طب احكيلك علي ايه كمان ..
كله موجود يا ريس .. كله شايف وكله سامع ..
حس يا مرسي ان شعبك عمل ضدك ثورة وطالب بإسقاطك بعد 7 شهور بس من حكمك .. اعد مع نفسك وأسألها ليه كدا .. ليه هم مبقوش عايزني ..
احكيلك علي مليشيات جماعتك .. ولا علي الفرقة 95 اخوان ..
طب انا عندي فكرة احلي .. تعالي نعد سوا قعدت سمر ونشرب شاي وافرجك علي فيديوهات التعذيب يمكن نفسك تتفتح كدا للشغل والرئاسة والكلام دا ..
للأسف يا مرسي .. خيبت ظن شعبك فيك .. كنا مستنين منك تبقي رئيس لينا كلنا ..
افتكر اني حطيت اسمك في الصندوق الاسود عشان تجبلي حق اللي مات وتبني .. من ساعه ما جيت عمال تقتل في اخواتي لحد ما قربوا يخلصوا .. ولقيتك بتهد مش بتبني ..
اتخونت واتكفرت ودخلوني النار وانا في عهدك ..
الحاجه اللي عملتها من ساعة ما جيت ."" انك خرجتنا من نقرة الحزب الوطني وقعتنا في دحديرة الاخوان المسلمين ""
يا تري يا مرسي هتفهم أصول اللعبة .. ولا هتعمل نفسك مسمعتنيش