رفقا بالشباب «2»

العربية وقفت ونزل منها ظابط بلبس ميري وتوجه ناحيتي وزعق فيا وقال: الواد دا ماله عمل إيه، قالولو: دا عمال يزعق فينا ومش عاجبه حد يا باشا بادرت بالرد، وقولتله: يا فندم أنا مغلطش في حد ومحصلش مني حاجة، قالهم خرجوه.. طلعوووووووووه.
وركب العربية ومشي.. واصطحبوني كلهم ناحية الباب الخارجي للاستاد وفي أثناء الطريق من قصاد بوابة الصالة المغطاة للبوابة الخارجية للاستاد بدأت حفلتهم معايا بالتهديد والتخويف ومهما وصفت لحضرتك مش ها أقدر أحط حضرتك في المشهد الحقيقي اللي حصل فالشخص اللي حصلت معاه المشكلة قاللي: شوفت ها تعيط أهو.. قولتله: أعيط ليه أنا ما عملتش حاجة وبعدين إيه اللي يخليني أعيط؟!.. فرد وقال للظابط اللي ماسكني وماشي معايا: إحنا نطلع علي قسم أول مدينة نصر. قولتله: أنا معملتش حاجة عشان أروح القسم أساسا والموضوع ما يستحقش، فا اللي ماشي معايا قاللي: بتزق ظابط مباحث، قولتله: أنا أصلا ما اعرفش إنه ظابط مباحث وبعدين حتي لو ظابط أو أي شخص تاني مالوش حق إنه يمد إيده عليا أبدا.. رد عليا وقال: هو فعلا مالوش حق إنه يمد إيده، وبعدين قولت للشخص اللي كان معايا إحنا رايحين فين قاللي: رايحين للباشا يشوف ها نعمل فيك إيه، قولتله: أنا واحد قاطع تذكرة عشان أدخل أتفرج علي الماتش، قاللي: لا.. انسي الماتش إحنا نحطك في البوكس ونشوف ها نعمل إيه.. قولتله: ها تحطني في البوكس إزاي يعني وعشان إيه وبأي تهمة؟!.. رد وقالي: لا دي شغلتنا بقي ما تشغلش بالك.. طلب مني الضابط البطاقة (وكل دا واحنا في الطريق) اديته البطاقة وبص فيها وقاللي: من عين شمس أنت عارف يا ابني مين اللي نزلك من العربية دا؟.. قولتله مين سعادتك؟.. قالي: دا مساعد أول وزير الداخلية قولتله طيب أنا اعمله إيه أنا اللي نزلته من العربية، وبعدين هو نزل من الجنة يعني، رد عليا وقاللي: أنت باين عليك لمض وبتاع مشاكل قولتله كل دا عشان مسيبتش حقي!.. قاللي: إحنا نروح للباشا وهو يتصرف معاك، ورحنا للباشا وكان لابس بدلة وهو جسمه ضخم وشبه حضرتك بس بشنب وقالهم ماله دا، قالولو يا فندم الواد دا عمال يزعقلنا جوا وزق فلان ومش عاجبه حد!.. قولتله يا فندم مفيش أي حاجة من الكلام دا حصل حضرتك تسمع اللي حصل بقي (عقدة الأجهزة الأمنية الأبدية).. وللواقعة المؤسفة بقية.