نبيل معتوق يكتب : كتر خيرك ياعمدة بلدنا

انا كنت فى مرة باعزى
فى جنازة ابو عنايات
واحد كان ساكن فى شارعنا
واهو جالة اجلة ومات ...
وقابلت هناك بلدياتى
وقعدنا نحكى ونهاتى
وشوية شوية وقالى
هنسافر لازم بدرى
علشان الانتخابات ...
اترشح واحد فى بلدنا
تقريبا م الحزب الوطنى
وسألتة دة واحد م العيلة ؟
فهمس لى ف ودنى وقالى
دة كبير العزبة ياسيدى
واهى فرصة نقابل قرايبنا
ونقضى الليلة ف سلامات ...
اناكنت صراحة متردد
ماهو لازم اسافر واصوت
وسألتة هيحصل اية
لو فعلا كبرت دماغى
وارتحت وقولت وانا مالى
راح قالى اوعى تتأخر
لغرامة تجيلك على محضر
دة قرار واتقال فى المجلس
اللى ما يروحش اللجنة
يدفع لة عشر جنيهات ...
مانا اصلى موظف على قدى
وماهيتى يادوبك بتقضى
مش حمل غرامة ولا دياولو
خلصها وريح بالك
بالمرة اشوف الحاجة
واخدلها صنفين فاكهة
وشوية حلويات ...
اول ما وصلت العزبة
انا قلت اروح اللجنة
فقابلنى العمدة وقالى
سلامات يامحمد افندى
خفنا احسن تتأخر
فعملنا الواجب واكتر
والواد ابن ابو عباس
كان فية الخير والبركة
ودخل فى اللجنة بدالك
وهبش لة خمس ميات ...
انا قلت له كتر خيرك
وحلفت ياعزبة ماجيلك
ولا ليلة فيكى ابات