هل تصبح حكومتنا مثل عرقوب ؟؟؟؟

بقلم طلال رسلان
هل تصبح حكومتنا مثل عرقوب .. عرقوب هو رجل كان يعيش فى يثرب وكان يمتلك نخلاً كثيراً وذات يوم جاءه رجل فقير يسأله أن يعطيه بعض التمر فقال عرقوب للفقير : لا يوجد عندى تمر الأن ..إذهب ثم عد حينما يظهر طلع النخل (أول الثمار) وحينما ظهر الطلع ذهب الفقير إلى عرقوب فقال عرقوب : إذهب وعد حينما يصير الطلع بلحاً فذهب الفقير وعاد إلى عرقوب حينما أصبح الطلع بلحاً فقال عرقوب : إذهب ثم عد حينما يكون البلح رطباً فجاءه الفقير حين أصبح البلح رطباً فقال عرقوب : إذهب ثم عد حينما يكون الرطب تمراً وحين أصبح الرطب تمراً قام عرقوب بالصعود إلى النخل ليلاً وأخذ منه التمر وأخفاه حتى لا يعطى أحداً منه فلما جاء الفقير ولم يجد تمراً فى النخل حزن لأن عرقوب لم يفى بوعده ...وصار عرقوب مثلاً فى إخلاف الوعود حتى ذم الناس مخلف الوعد بقولهم ... مواعيد عرقوب ...
يحزننى أن حكومتنا الموقرة لا تستطيع أن تقودنا نحو بر الأمان فنحن أشبه ما نكون فوق سفينة ويقودها نجار وليس ببحار .. هذا النجار لا يعلم كيف يقوم بتوجيه هذه السفينة نحو بر الأمان وياااا لكثرة الأمواج والدوامات التى تعترض طريقنا ...ورغم كل هذه المخاطر التى يجب أن تجمع كل ما يوجد على هذه السفينة من أشخاص تجدنا مختلفون ولا نتفق ولا نعامل الله فى أى شئ .... الجميع يسعى للظهور ..
لحظة أيها القارئ ... حط فى بطنك بطيخة صيفى وشتوى وربيعى وخريفى كمان .. إوعى تقلق ربنا هو اللى ساترها ...مصر مش هتكون زى أى بلد .. مصر طول عمرها وربنا رايد ليها الخير ...
نرجع لحكومتنا الأمورة ...
يقولولك هنواجه البلطجية بحزم بس المشكلة إن الحزام بتاع الحومة بتاعتنا محتاج يكون أطول شوية عشان البنطلون ميقعش.. يا حكومة حرام عليكم الشعب المصرى لحد دلوقتى حتى بعد الثورة طيب وغلبان فعلاً بس مش عبيط ... قولى إزاى هتتصدى للبلطجية وأنت سايب لحد دلوقتى حبايب البلطجية هما اللى متحكمين فى وزارة الداخلية ...
وسيبنا من الداخلية وندخل على بلطجية الإعلام اللى قاعدين يكرهوا الناس فى الثورة ويوجهوا الناس اللى عايزين يروح يمين ناحية الشمال واللى عايزين يروحوا شمال يمين ... ربنا يستر الإنتخابات اللى جاية هتكون أسوأ إنتخابات مرت على الواحد فى حياته ... عارفة ليه يا حكومة عشان إحنا كنا بنحلم بعد الثورة بحاجات حلوة بس يالا ... حسبى الله ونعم الوكيل ...
أنا عارف إن أنا رخمت عليكم .. معلش .. أخر حاجة ..
إخوانا السلفيين والإخوان والإسلاميين .. أنا بجد بسببكم حزين قوى وبقول لكل واحد منكم اللى أنتم بتعملوه هل فعلاً يرضى ربنا ولو سيدنا النبى ما بينا دلوقتى كان هيكون مبسوط باللى بتعملوه ... على فكرة بقى ... أنتم لعبتوا اللعبة غلط ... المفروض كان دوركم الحقيقى نشر الإسلام .. البلد مليانة شواذ وخيانات زوجية وربا ومعظم الشعب ضميره بينعس ...
كلمة أخيرة ... أنا على يقين إن الأيام الجاية هتكون مليانة خير ...