ع المصطبة

قنوات تليفزيونية لأهداف معينة

عقد مجلس برلمان المصطبة جلسته الأسبوعية لمناقشة مخاطر القنوات الفضائية بناء على طلب مقدم من الفلاح الفصيح.
الرئيس: حضرات الاخوة والأهل الأحباء لدى طلب من كثير من أبناء الشعب يطالب باغلاق نصف القنوات الفضائية علي الأقل لأنها وسيلة تخريب للشباب وليست وسيلة ترشيد.
العضو الفلفوس: حضرات الأعضاء أبناء مصر المحروسة لقد كثر عدد محطات التليفزيون الرسمية والأهلية لدرجة مخيفة وكلها تشتغل لمصالحها الخاصة ولمصالح أطراف أخرى تريد تدمير خيرة أبناء مصر من الشباب من بثها أفكاراً غريبة ودخيلة على عاداتنا وأفكارنا فلابد من وضع حد لهذه القنوات.
العضو النمرود: يا عالم القنوات بقت من مهامها تذيع حاجات غريبة علينا واحنا شعب طيب وأولادنا عليه العوض فيهم لأنهم بدل ما يذكروا دروسهم يسهروا قدام المدعوق التليفزيون للصبح وبتنا زي أمريكا عندنا قناة لكل محافظة من ناحية العدد.
العضو زعيط: كان أهالينا بيشتكوا من الراديوهات أول ما طلعت واليومين دول إحنا بنشتكي من القنوات اللي كلها هجص في هجس وقنوات الهشك بشك والعيال قاعدين قدامها وربنا يستر علي بناتنا والصبيان.
العضو معيط: أنا عاوز أقول إيه الحكمة إن الحكومة تسمح لهم يطلعوا من مصر ما يروحوا بلاد تانية ويطلعوا منها لازم ورا الحكاية ملعوب ضد بلدنا.
العضو نطاط الحيط: يا جماعة لازم تعرفوا إن أصحاب القنوات من رجال الأعمال والقنوات بتاعتهم بتدافع عن مصالحهم من بعيد لبعيد يعني تلاقي ناس كبار بيتكلموا عن قضية معينة والحدق يفهم يعني مثلاً مفيش داعي للكلام في الموضوع ده أحسن الناس يزعلوا منك.
العضو بهلول: والله الحكاية دي بقت هيصة وبرنا يستر على البلد ويحفظ ولاة الأمور من كل مكروه.
الرئيس: يظهر اننا سندخل في الغويط ومفيش داعي للمواضيع دي.
الفلاح الفصيح