فيس بوك: فايزة أبو النجا مدوباهم أربعة !!

نشرت صفحة " كلنا خالد سعيد" اليوم الأحد صورة للدكتورة فايزة أبو النجا وزيرة التعاون الدولي وهي تؤدي حلف اليمين منذ عام 2001 في حكومة الدكتور عاطف عبيد، وانتقدت الصفحة اختيار الدكتور كمال الجنزوري رئيس الوزراء لها بعد تواجدها ب 4 حكومات متعاقبة وهي حكومة الدكتور عاطف عبيد وحكومة الدكتور أحمد نظيف، وبعد الثورة حكومة الفريق أحمد شفيق، والدكتور عصام شرف.
وتوالت تعليقات الأعضاء مستنكرة ذلك الاختيار ومنهم العضوة كريمة المصري :"نعمل ايه يعني الشعب المصري مفيش فيه شخص قادر علي تحمل المسئولية غير الناس دي، سؤال بس هي لو توفاها الله النهاردة قبل بكره مين هيمسك الوزارة مكانها طالما الشعب انتهي؟؟".
وأضاف مصطفى المليجي :"مفيش فى مصر سيدة تنفع غيرها - ايه السر ؟ - العلم عند الله – "تخلف".
وقال العضو محمد سليم : "تقريبا محدش بيعرف يتعاون دوليا غيرها، عاملة زي مستر إكس لا نهاية لها".
وأضاف محمد عاطف :" مدوباهم اربعة اسألوني انا ... مع الاعتذار للفنانة القديرة ماري منيب".
وقال محمود موسى :"أصلا فايزة أبو النجا هي اللي بتغير الرؤساء والحكومات".
وأضاف عمرو كامل :"ما هي الوزارة مكتوبة باسمها!!"، بينما قال إسلام كامل : "حاسس انهم هيكتبوا في الدستور تعيين فايزه ابو النجا وزيرة للتعاون الدولي وتلغى الوزارة بوفاتها".
وأضاف محمود الضوي : "أكيد حاطة غرا شديد علي كرسي الوزارة"، بينما قال على بكر ساخراً :"رجل ..قصدي إمرأة لكل العصور"، وأضاف محمد حجاج :"كلاكيت خامس مرة، مفيش غيرها خلاص البلد مافيهاش كفاءات، انا حاسس ان الناس دي بتشتغلنا او مفكرانا عبط هما لسه عايشين في وهم أيام مبارك الشعب نايم الشعب مات الشعب متخدر اقول ايه ناس فاقدة الزمن".
وأضافت ريم يسري غاضبة :" إيه يعني كل الشباب بتوعنا دول فاشلين ؟!! امتى هنتغير ونلاقى حد من عمرنا نشوفة مسئول يعنى احنا مش هنتعلم ونبقى عندنا خبرة زيهم وياريتهم عملو شئ لينا او للبلد".
ومن ناحية أخرى أبدى بعض الشباب انزعاجهم من انتقاد معظم التعليقات لأبو النجا، حيث قالت داليا عبد الله : "طالما تؤدى واجبها بكفاءة ايه المشكله فى استمرارها؟ و شغلها كله مع الجهات المانحة و المعونات والإتفاقات الدوليه و ده مصدر رئيسى للدخل حاليا و بوابة لفتح الإستثمارات الخارجية"، وأضافت منى عادل:" كونها كانت تؤدى واجبها ايام مبارك بكفاءة لا يمنع انها تستمر و الا حنستبعد كل موظفى الحكومة الأكفاء لأنهم ميراث عصر مبارك و نبدلهم بشباب".
وقالت بسنت لطفي :" هذه الوزيرة تتقن اربع لغات تحدثا وكتابة وملتزمة جدا، مين فيكوا البديل ليها، ولا هو تغيير لمجرد التغيير، احنا كده مابيعجبناش العجب وأحسن شعب يتكلم عالفاضى"، بينما تساءل هيثم محمد : "في حد شايف حد أكفأ منها ؟"، وقال محمد السيد : "عشان هى محترمة وشايفة شغلها يبقى تمشى ؟ هى أنسب واحدة فى الوقت ده وكلها 6 شهور وهتمشى".