اتفاقية.. مع رئيس الحكومة الذكية

رحت وقلت له تعالى نعمل اتفاقية.. ونشوف مين المظلوم.. إيه رأيك تاخد المهية وتأكلنى كل يوم.. ولمدة شهر واحد نخلى الحال ده يدوم.. وبعديها نشوف العيب ف مين الحاكم ولا المحكوم.. بس عشان تبقى الاتفاقية طبيعية ومنطقية.. لازم تضيف فيها كل البنود الأساسية.. وتدينى كل احتياجاتى اليومية.. قدام اللى هتأخده مهية.. بتقول تحت خط الفقر ستة جنيه يومية.. لا ما تقلقش هسهلها عليك شوية.. والمهية اللى ف الاتفاقية خمستاشر جنيه يومية.. أكلنى 3 طقات.. وركبنى بينهم مواصلات.. مش لازم تاكسى ولا سرفيس.. ده أحنا بتوع الأتوبيس.. وما تنساش تدفع نور ومية.. دول من أساسيات الاتفاقية..
ولو رحت للدكتور مرة سيب حسابه عليا.. ولو قلتلك فسحنى يوم طنشنى ومتسألش فيا.. ولو قلتلك عايز هدمة جديدة مرة.. ما تسألش فيا بالمرة.. وإيه يعنى هدومى مرقعة.. ومفيش حته فيها مش متبقعة.. بس ومش هطلب منك حاجة أنا كدة سعيد.. عشان حاسس أنك هتجبلى هدوم جديدة ع العيد!.. ومصاريف العيال ما تنسهاش.. تعليم حكومى من أبوبلاش!..
وقبل آخر شهر.. جالى منه جواب.. بيقول إنه ف الإنعاش.. وما قالش إيه الأسباب.. ولما رحت له دار الفؤاد عرفت الأسباب إيه هية.. قاللى: وسط الشهر خلصت منى المهية.. وطلبت سلفة من الشهرية الجاية.. عشان أعرف أنفذ الاتفاقية!.. وساعتها بس عرفت.. العيب فيك ولا فيا!
remozeen@hotmail.com
محام عضو اتحاد المحامين العرب- الإسكندرية