حادث الإسكندرية .. يوم السواد على الفيس بوك

" في بلدنا وجع و صراخ و دموع و آهات و كتار بيقولوا اخ يادي المتاهات عايشين من غير أفراح ما في حد ارتاح بلاوينا
بالملايين شعبنا مسكين و بعدين يجي يقول وحدة وطنية طب ما انا عارف ايه هي و احمد و محمد صحابي و جيراني لكن انتي يا بلدي اللي علمتيني كلمة مسلم و مسيحي لما فرقتي بينا و مدتنيش حقي و لما سألت ليه قولتي مسيحي انتي اللي زرعتي الخصام و جايه دلوقتي تقولي وحده "
بهذه الكلمات بدأ مجموعة من الشباب جروبا على الموقع الاجتماعي الشهير " الفيس بوك " تحت عنوان " 1 / 1 / 2011 يوم السواد " ووصفوا الجروب بجملة " كلنا مدعوون إلى أن نناجي ربنا مسلمين وأقباط أن يزيح عن مصر شبح الفتنة .. فلنتوجه كلنا لله بالدعاء أن يحفظ مصرنا من كل سوء " .
وبلغ عدد أعضاء الجروب 6.911 عضوا حتى مساء أمس الاثنين .
واشار الشباب الى هدفهم لنبذ الفتنة بمجموعة من الاشعار كان من بينها " سكت الكلام فى لسانى و الوضع مش انسانى .. مسلم و مسيحى مين ما كلنا مصريين
لا عمر فرق بينا عدو ولا دين .. وهنفضل دايما ايد واحدة عايشين .. وانصرنا يا رب دايما على الخاينين .. و اوعى تقول انا مين و انت مين .. قووول كلنا مصريين " .
الريحاني و خيري
واشار العضو عمر فراج بقصة تدعو الى الوحدة حدثت بين نجيب الريحاني وبديع خيري " نجيب الريحاني كان بيكتبله كاتب عبقري اسمه بديع خيري. وفي يوم أم بديع خيري ماتت نجيب الريحاني راح يعزي لقى صوان وقرآن استغرب وسأل بديع هو انت مسلم .. قاله : آه
قاله طب ومقلتليش ليه قبل كده؟ قاله بديع : أصلك مسألتنيش
وكتير ما كانوش يعرفوا ان نجيب الريحانى مسيحى
ما كانش حد بيسأل حد ديانتك ايه ؟
صعب ان حد يقدر على ناس متحده ...مع بعض لكن لو فرق بينهم من السهل انه يتحكم فيهم
زى ما حصل مع الدول العربية وبقى كل واحد همه نفسه.. ضعفنا واتحكموا فينا
وزى ما عملوا بين الطوائف فى العراق وبين الشمال والجنوب فى السودان
وزى وزى مش عايزين نبقى متقسمين .
قانون ضد التمييز
طالب العضو كريم عامر بقانون ضد التمييز قائلا " ليه ما يتعملش قانون ضد التمييز في مصر ؟ ليه المواطن المسيحي لا ياخذ حقه ؟ ليه مافيش قانون ينظم بناء الكنائس ؟ خاصة ان الاسلام لا يحرم بناء الكنائس ؟.
فى كنيسة القديسين
دم عيسى مع ياسين
جرح واحد. قلب واحد
فيه نصارى ومسلمين
سيدنا عيسى نور عيوننا
...«وحنانا من لدنا»
حُبه فرض وُجوب وسنة
عند كل المؤمنين
ستنا العدرا اصطفاها
ربنا وبارك خطاها
اقروا مريم. واقروا طه
ياللى مالكوش أى دين
مين يقول القبطى كافر؟!
دا اللى يؤذى القبطى كافر
واللى عقله خلاص مسافر
موش هانتبع مجذوبين
اللى يقتل موش مجاهد
ده جبان وخبيث وجاحد
مصرهاتعيش قلب واحد
فيه نصارى ومسلمين