قراء «المصري اليوم » فى «عيد الميلاد»: نفديكم بأرواحنا.. ونفتح صدورنا لنموت قبلكم

استجاب قراء «المصرى اليوم» لمبادرة «أرسل بطاقة معايدة بعيد الميلاد» التى أطلقتها الجريدة على بوابتها الإلكترونية بعد تفجير كنيسة القديسين بالإسكندرية تحت شعار «بإمكاننا أن نقاوم الحزن والألم بالاحتفال معا، مسيحيين ومسلمين، بأعياد الميلاد».
واستقبلت «المصرى اليوم» مئات البرقيات عبر البريد الإلكترونى وعلى صفحاتها الرسمية على الشبكات الاجتماعية، كما لم تتوقف الاتصالات التليفونية التى أعربت عن تقديرها للمبادرة وللدور الذى تؤديه الجريدة، ليس فقط فى تغطية الحدث، ولكن لمقاومة الحزن والألم واستعادة أجواء الاحتفال بعيد الميلاد.
«المصرى اليوم» تنشر نماذج من برقيات المعايدة
كل سنة وأنتم طيبين لازم نحاول نفرح، ونرجع الفرحة بالعام الجديد.. كل سنة وكلنا طيبين
لازم نقاوم ونقف كتفاً فى كتف ونورى اللى عمل كده أننا مع بعض متقويين ببعض، ومش هيمنعنا من الفرح أبدا، ربنا هو اللى خلق العيد علشان الناس تفرح فلنحقق إرادة الله فى كونه، كل سنة وأنتم طيبين.
الرفاعى
ميلاد نبى الله عيسى هو عيد للبشرية جميعاً مسلمين وغير مسلمين، نحن نؤمن بالله وحده وبجميع الرسل والملائكة واليوم الآخر لا نفرق بين احد من رسل الله وهذه عظمة الإسلام فكل عام والمؤمنون بخير.
محمد فاضل
احنا حاجة واحدة مش اتنين، احنا كلنا طيبين، متقولوش مسلم ومسيحى، قولوا احنا المصريين.
أحمد رأفت
إخوتى فى الإنسانية والمواطنة
يؤسفنى ألا أستطيع أن أقدم تهانىَّ بعيد الميلاد المجيد، إلا وهى ممزوجة بالألم والعزاء الحار لنا جميعاً فى شهدائنا ومصابينا الذين سقطوا فى العدوان الإجرامى على كنيسة القديسين بالإسكندرية، عشية رأس السنة.
فلنلتف جميعاً حول المطالبة بمحاسبة وإقالة المسؤولين الذين ساهم إهمالهم وتقصيرهم فى وقوع الجريمة النكراء، وبسرعة إصدار قانون موحد لإنشاء دور العبادة فى مصر.
أسامة أحمد
اقتل بهدل فجر ولع يا إرهاب زى ما تحب، بس مش هتعرف تشيل طوبة من بيت حسن ومرقص، لأن حسن ومرقص واحد بطاقتهم مكتوب فيها مصرى، إنت بطاقتك فيها ايه؟ أكيد أنا مصرى مسيحى، ومش مسيحى مصرى، مهما عملت مصر فى كيانى وقلبى، اقتل بهدل ولا يهمنا.
رامى رزق
أقول كلمه وليشهد الله على ما فى قلبى لو كنت بمصر ليلة السابع من يناير كنت سأذهب إلى أصدقائى المسيحيين وأجعلهم خلفى حتى أحميهم لكى يحتفلوا، وينتهوا من عيدهم وسأفتح صدرى لأى عدوان غاشم قد يصيبهم ليصيبنى قبلهم، لأن من فعل ذلك ليس من المسلمين ولا يعرف شيئا عن الإسلام.
وليد هندام
كل سنة ومصر كلها بخير ويبعد عنا شر الفتن والأعداء وكل سنة واخواتنا المسيحيين بخير وسعادة وأمان ويبعد عنهم كل شر.
لولا عبدالفتاح
كل سنة واخواتنا المسيحيين بخير ويارب تكون كل أيام الشعب المصرى خير وسعادة.
وليد سالم
كل وعام وأنتم بخير وعيد سعيد لكل شعب مصر العزيز سنظل أبد الدهر شعباً واحداً وكياناً واحداً وجسداً واحداً كلنا مصريين عايشين مع بعض على الحلوة وعلى المرة ومهما حاول الفرقاء الحاقدين على شعب مصر أن يفسدوا هذه العلاقة فلن يستطيعوا لأننا جسد واحد له قلب واحد. على الجميع أن يتحلى بالصبر والهدوء والحكمة ولا ينساق إلى من يصطادون فى الماء العكر لانهم لا يريدون الخير لمصر. علينا جميعا أن نكون يدا واحدة فى مواجهة هذه الحملة الهوجاء التى لا تعرف لها سوى الخراب والفرقة بل تستهدف مصر وسوف تظل مصر مظلة الأمن والأمان، ولمن لا يعرف قيمة ونعمة الأمن فى بلده عليه أن يتعلمها من مصر حفظك الله يا مصر من كل سوء وشر، عاشت مصر للمصريين حاضنة للعالم أجمع وشكرا.
أيمن مجدى
كل سنة وأنتم طيبين.. وفى عيون مصر موجودين دا احنا أهل من سنين ولا نفرق بين مسلمين ومسيحيين، وربنا واحد هو رب العالمين ويخلينا لبعضنا قول آمين.
طاهر أباظة
اللى حصل بعد الجريمة القذرة دى هو أحسن رد على السفاح اللى فكر وخطط ونفذ وربنا يصبرنا جميعا وكل سنة ومصر كلها بخير.
شيماء أحمد
على أرض بلدنا المحروسة.. تلقى الجامع جنبه كنيسة، وايد الشيخ فى ايد القسيس.. وأحمد حاضن أخوه رمسيس، بس ابعد عنهم إبليس.. واحفظهم يارب أمين، مصريين وادينا واحدة.. بينا محبة وألفة ووحدة، وادينا ديه ساعة الشدة.. تصبح واحدة مش اتنين، لو عايزين إثبات لكلامى.. ألف دليل موجود قدامى، لما عبرنا فى حرب أكتوبر.. استشهد جرجس مع سامى، ما اتفرقش ما بين الاتنين.. ده مين ده ويطلع ده مين، وحنفضل اخوات عايشين.. والله وليوم الدين، على أرض بلدنا المحروسة.
الشاعر محمود فايد - دمنهور
أنا مسلم أنا ضد الإرهاب.. أنا مسلم أنا ضد تفجيرات الإسكندرية أنا مسلم أنا مصرى.
أحمد أمين
كل عام ونحن وطن واحد
لا تتركوا النار تأكلنا وتأكلكم
أحمد الشريف
كل سنة واحنا مع بعض
كل سنة واحنا مصريين رغم أنف الحاقدين.
إسلام سلامة
ولدته مريم تحت الأيكة، كريم بهى جميل الهيئة، كليم الصغر رسول الكبر عظيم الشأن كثير العبر عيد سعيد لإخواننا المسيحيين.
عامر حسين
مهما العمر يجرى.. ميلادى أو هجرى تبقى محبتكم فى دمنا تجرى كل عام وانتم بخير.
أحمد قاسم
رسالة الإسلام.. أنشودة المسيح على الأرض السلام وبالناس المسرة شعب مصر (وحدة فى تنوع).
ياسر الشوربجى
عيد ميلاد مجيد لجميع الأخوة الأقباط ولجميع شعبنا المصرى ولا عزاء لدعاة الفتنة.. لكم يوم.
شادى نجم
الله محبة.. كل سنة وأنت طيب يا بيتر وكل سنة وانت طيبة يا مريم.
ندى مسعود
مصر مش هتشوف أعداءها من غير عين يمين وعين شمال، ولا هتدحرهم من غير إيد يمين وإيد شمال ولا هتتقدم من غير رجل يمين ورجل شمال، فيارب كل عام ربنا يقوى عنيها وإيديها ورجليها اللى هم شعبها المسلم والمسيحى، اللى لو فقدت جزء منهم هتدبل وتختفى، يا رب احمى مصر واحفظها دايما يا رب.
هبة عرفات
مصرى مسلم وأصحابى مسيحيين.. غلابة مساكين اللى فاكرين إن لما هيقتلوا 21 من المصريين أننا هنخاف ونضرب فى الباقيين لا احنا تاريخنا مليان مواقف واسأل التانيين طول عمرنا أخوات مينا ومحمد وفادى وحسين فاكرين إنكم فرقتونا يا مساكين أحب اقولكم شكرا عشان وحدتونا وحدة السنين، واسألكم سؤال قتلتوا واحد وعشرين هتعملوا ايه فى 82 مليون باقيين؟؟
ياسر الجمال
أقول لإخواننا الأقباط كل عام وأنتم بخير ولن نخسر بعضنا البعض بسبب الفتنة الخارجية.
الحسينى داوود
يالله نزرع ورد الأمل فى قلوب أسر الضحايا
خضر عوض
إنتم اللى مديين لمصر طعم خاص وجمال وتنوع تحسدنا عليه كل الأقطار.. كل عام ومصر بخير
كل عام وأنتم بخير.. وعيد سعيد عليكم وعيد جديد لينا وليكم بيجمعنا فى فرحة واحدة.. هى فرحتنا بعيدكم أو فرحتكم بعيدنا.. يا ريت تصدقوا أن تهنئتنا دى مش مجرد كلام، ، لكنها إحساس بجد ومش مجبرين إننا نعترف بيه قدامكم لكنه إحساس بنفرح لما نبينه، إحساس رافض أن الإسلام يتحمل مسؤولية اللى حصل يوم الجمعة، إحساس رافض إنكم تعتبروا المسلمين اللى عيشين معاكم همه اللى منظمينه، إحساس بإن اللى حصل ده كان مصيبة لينا كلنا.. مش للأقباط وأهل اللى ماتوا بس يمكن بنختلف فى دينا وعقيدتنا لكن عمرنا ماهنختلف إننا عايشين على أرض واحدة.. أخوات وصحاب عايشين فى وطن واحد.. فرحنا واحد.. وجرحنا واحد.
أنس محمد رفعت
ماتقلش مسلمين ومسيحيين ولكن قل مصريين
وكل عام وكل المصريين بخير.
محمد على دياب
بصوت أذان ورنين جرس
كلنا لمصر فداء وحرس.
ياسر الشوربجى
كل عام وإحنا بخير.. عيدى عيدك جرحى جرحك وأن غضبت أغضب معاك ما إنت مصرى وأنا مصرى وياما جمعتنا حكايات.. نفسى أضمك جوه صدرى وأحضنك وأصرخ بحسى إنت أخويا إنت صاحبى إنت أغلى حاجة عندى حتى لو مسلم عدوك طب مافى مسيحى عدوى بس ليا أكتر صحاب وإنت واحد بس منهم يلا بينا يا صديق يلا بينا إيد فى إيد كلنا ضد الإرهاب.
محمد زيدان
أخى جورج أختى نيفين.. نيابة عن شباب مدينتى إيتاى البارود. سنكون درعاً بشرية أمام كنيسة العذراء مريم.. يوم عيدنا.
محمد إبراهيم
كلنا مصريون على اختلاف الديانة ندين الهجوم الأعمى الذى تعرضت له إحدى دور العبادة فى مصر والله أنا معظم جيرانى من المسيحيين وعمرى ماحسيت إنهم غيرنا لأنهم معانا فى الأعياد وفى الواجبات قبل الأفراح.. حسبنا الله ونعم الوكيل فى الإرهاب الذى لا دين له.
أشرف قناوى
امسحى دموعك يا أمى.. واغسلى دم المسيح النهاردة برغم همى وبرغم إنى أنا الجريح هأمسح دموعك دول بكمى.. واترمى فى حضنك طريح وانده أخويا وابن عمى وندفن الفتنة فى ضريح، دم مينا هوه دمى، مينا كان عاشقك صريح.
بيومى أفندى
بكل الحب والوفاء بحق الجيرة والصداقة والعشرة الطيبة.. أتقدم بخالص التهانى بأعياد الميلاد.
أخوكم عبدالقادر حسن
إلى كل قبطى مصرى.. كل عام وأنتم بخير وصحة وسلام وأمان.. كل عام وأنتم أهلنا وأحباؤنا.
أمانى كمال
معدن المصرى الصلب يظهر ويبرق لمعاناً عندما يدخل التجربة مثل المعادن النفيسة عندما تدخل كور الانصهار، وإننى كلى ثقة كمسيحى بأن مصر ستظل صفاً واحداً وستصبح أكثر ترابطاً فى الأزمات والمحن. كما كنا فى أكتوبر 1973 وما قبلها يخرج المسلم ليحمى المسيحى ويقف المسيحى بجوار أخيه المسلم ونتبادل التهانى ونربت على كتف كل منا فى الأحزان ستظل كما هى صفات المصريين رغم أنف من لا يريدون ذلك أبوا أو قبلوا، إنها سماحة مصر.
ميشيل شنودة صليب
و الله ما هو مسلم.. الإسلام يحض على الأمان والسلام وحسن المعاملة وحسن الجوار، يبقى إزاى اللى عمل كده مسلم أدعو رعاة الكنيسة الأرثوذكسية فى مصر إلى إعادة النظر فى إلغاء احتفالات أعياد الميلاد وهمه هايشوفوا المسلمين الحقيقيين هايعملوا إيه كلنا إن شاء الله هنكون أمام الكنائس يا نحتفل معاهم يا نموت معاهم من ينكر المسيح عليه السلام ورسالته لا هو مسيحى ولا هو مسلم.. كل عام وأنتم بخير
خالد الغندور
مصرى مسلم
صباح المحبة والتسامح إلى شركاء الوطن الإخوة المسيحيين عزاء واجب فى شهداء إسكندرية، أود وبصدق تام أن تتقبلوا تهنئتى بعيد الميلاد المجيد وأسفى على أى ممارسة من سفهاء من يدعون الغيرة على الإسلام والإسلام منهم برىء سأشترى الشموع وأتوجه يوم الجمعة إلى أقرب كنيسة لمنزلى وأطلب الإذن بالدخول وأضىء الشموع لسيدة نساء العالمين سأترجم قناعاتى فى حرية أى إنسان فى اعتناق ما يشاء سأصطحب ابنى حتى أغرز فيه المحبة والتسامح وإننا جميعا مصريون قبل أن نكون مسلمين، ومسيحيين، فأرجو ممن يقرأ دعوتى أن يحذو حذوى يا سادة، الله محبة وليس من حق مخلوق أياً كان أن يفتش فى صدور الآخرين ويحاسبهم على مكنوناتها، وكل عام وأنتم بخير وسلام وأدعو الله أن ينعم علينا جميعا بالمحبة والتسامح.
نضال محمود حسن