"المخلوع" على شاشة "CBC" قريباً

الثورة و"الخيال العلمي" .. "دونت ميكس"

استكمالاً لرسالتها الإعلامية "الثورية"، التي تؤديها منذ تأسيسها بعد ثورة 25 يناير كإحدى أبرز القنوات التي كانت منبراً قوياً للثورة، نجحت قناة سي بي سي "الثورية جداً"... في أن تقدم لجمهورها الحبيب سبقاً إعلامياً كبيراً .. حين تمكنت عبر الإعلامية "المناضلة" لميس الحديدي من إجراء أول حوار مع الرئيس "البريء" حسني مبارك بعد إخلاء سبيله وعودته بيته ولسريره ول "فوطته" وبشكيره،،، وهو الحوار الذي تحدث فيه عن ذكرياته مع الثورة واحتضانه لها ولمبادئها منذ اليوم الأول لها .. وإليكم نص الحوار "هواة أفلام الخيال العلمي يمتنعون"!!:
لميس: اليوم ده بالنسبة لنا كفريق عمل .. يوم غير عادي .. فكرنا كتير واشتغلنا الأيام اللي فاتت كتير علشان نقدر نطلع في الاخر ليكو بالحلقة الاستثائية التاريخية لبرنامجنا .. مش بس لبرنامجنا انما كمان للإعلام المصري "الحر" .. النهارده إحنا في حضرة رجل ... نعم رجل .. اختلف معه او اختلف .. انما هو رجل .. صنع تاريخ لبلده .. وقف معاها في أشد المحن .. يمكن يكون له أخطاؤه .. إنما أخطاؤه "البشرية" لا يمكن تغطي على تاريخ الرئيس الطيار بطل اكتوبر محمد حسني مبارك...
اهلا بيك سيادة الريس .. نقول السابق بقى معلش ... ههههههههههه
- مبارك: "ضحكة صفرا"... لا أنا هاقول ولا إنتي هاتقولي .. التاريخ هو اللي هايقول ..
- لميس: اسمحلي اقول سيادة الطيار،، لإن طيارتك الأولى اللي شقت السما يوم 6 أكتوبر هي اللي كانت مفتاح النصر...
- مبارك: بس أنا مطلعتش بطيارة يوم 6 أكتوبر .. أنا كنت في الأرض.
- لميس "محرجة": أنا عارفة طبعا بس القائد بيعتبر كأنه هو اللي عمل أول ضربة بخططه وأفكاره...
- مبارك: طبعا .. طبعا ... ده كان يوم له العجب .. يومها كنت صاحي من بدري جداً ماكنتش عارف أنام عمال أفكر في كل تفصيلة في المعركة .. حتى لما الاولاد علاء وجمال صحيوا وجولي المكتب علشان أفطر معاهم قبل مايروحوا المدرسة .. ماحستش بيهم .. ومخدتش بالي غير لما جمال خبط بكتفه في المكتبة .. ما انتي عارفاها بقى غاوي "اكتاف" حتى اسألي يوسف الحسيني .... هههههه
- لميس: هههههه .. وقومت معاهم تفطر ولا المعركة خدت سيادتك من جو الأسرة ؟ .. انا عارفة انك بتحب الجو العائلي جدا وقريب من أولاد ...
- مبارك: أومال .. البيت طول عمره عندي رقم واحد .. قومت فطرت رغم انشغالي بالإعداد للمعركة ... بس علشان مازعلش الأولاد.
- لميس ب "اندهاش في الذاكرة": فطرت .. هو مش كان يوم العبور في شهر رمضان.
- مبارك: وهو أنا عقلي دفتر .. يا ستي كبري مخك
- لميس: طبعا يا فندم كان يوم صعب وشاق جدا... بس سؤال خبيث مني وسيادتك عارفني بقى "ضحكة لميسية" ... أيهما كان يوم أصعب.. يوم العبور ولا يوم التنحي ولا يوم المحاكمة....
- مبارك: يوم الأربع بتاع "الجمل"...
- لميس: قصد سيادتك "يوم موقعة الجمل"؟ ..
- مبارك: أها .. انتوا سميتوه كده .. انما انا سميته يوم الاربع بتاع الجمل ... ده بجد كان اصعب يوم مر عليا... لانك لما تتعرضي لطعنة من الضهر بعد ما بتكوني ظبطتي امورك بتحسي بمرارة وان جهدك راح هدر.. يعني انا أبقى مستف الكلام صح للشعب يوم التلات ومنيمهم وشادد عليهم اللحاف .. قوم ييجي جمل "سياحة" من ابو عشرة جنيه في الساعة .. يبوظ كل اللي انا عاملته ... ده شيء خطير جدا ...
- لميس: بس سيادتك كانوا بيقولوا ان دول انصارك اللي نزلوا يعلنوا تاييدهم ليك
- مبارك: وهو انا انصاري جِمال وأحصنة؟!!... ما انكرش ان ليا مؤيدين كتير في مجال السياحة .. انما هايطلع في مظاهرة تأييد ما يخدش عدة الشغل بتاعته معاه.. يعني مثلا لو ليا واحد بيأيدني شغال طيار ،، ييجي المظاهرة بميج 21 ولا اف 16 ..
- لميس: بمناسبة الطيار.. الفريق شفيق كان قايل ان الجمال والاحصنة كانوا رايحين يرقصوا ..
- مبارك: شفيق راجل فايتر وجاد جدا.. وده اللي خلاني أثق فيه دايما .. بس لو أعرف انه هاييجي اليوم اللي يقول فيه كده .. كنت نزلته الميدان يوم التنحي علشان يرقص مع الأحصنة !!!.
- لميس: الناس كلها بتسأل .. مبارك بعد ما القضاء قال كلمته ... بيرسم ايه لمستقبله السياسي والخاص...
- مبارك: انا تحت امر بلدي في اي وقت .. وانا قولتها وكررتها كتير .. انا هاعيش واموت في البلد دي ... ولو الشعب عايزني ارجع للحياة السياسية تاني انا معنديش اي مانع، لاني "فايتر" ... ودي شغلتي ... ومش عايز اقول ان الشعب عرف غلطته وانه ما سمعش كلامي لما قولتلهم انا او الفوضى اهو اديني رجعت تاني وبقيت أنا والفوضى .... هههههههههههه
- لميس: ههههههههههههههه
- المشاهدون: ماتوا طبعاَ