قراصنة فى القناة| قبطان بحرى يكشف فضائح عن "قناة مارلبورو" "قناة السويس سابقًا"

ويؤكد مآساة فى الرشوة أثناء العبور

كشف قبضان بحرى يدعى أمين وهب، عن فضيحة كبيرة أثناء عبور قناة السويس، وعلى الرغم من أن ظاهرة الرشوة أثناء المرور منتشرة فى أكثر من مكان حول العالم، إلا أن تلك الأمور عندما تحدث فى مكان كقناة السويس تُعد من المصائب الكبرى، فى منطقة إلتقاء وربط العالم.
ووصف القبضان قناة السويس ب"قناة المارلبورو والشيكولاتة"، وقال أن الفساد وصل لمرحلة لا يمكن السكوت عليها في هيئة قناة السويس هذا ما كشف عنه البحار أمين وهبة عبر حسابه الشخصي بموقع "فيس بوك" .
البحار أمين وهب والذي حكى عن مأساة عبوره لقناة السويس منذ أيام ، كشف عن كارثة ، قناة السويس أصبحت في يد عدد من المرتشين و القراصنة الذين يفرضون الإتاوات على السفن التي تمر بالقناة ، حيث يفرضون الحصول على "خراطيش سجائر مارلبورو" و "مكسرات" و "شيكولاتة" بأعداد كبيرة كرشوة .
وإلى نص التدوينة التي أثارت جدلا واسعا على مواقع التواصل الإجتماعي وصلت إلى حد المطالبة بإقالة الفريق مميش بشكل فوري :
مأساة عبور قناة السوس اليوم
بشتغل فى شركة ملاحة دولية, وكنت معدي من قناة السويس النهاردة والمفروض إن الواحد يكون مبسوط وفخور ببلدي وبقناة السويس وهو معدي أهم ممر ملاحي في العالم مع طقم أجانب ولكن اللي حصل إني بقيت عمال اقول ياريتني ما عديت ولا أعدي من قناة السويس تاني خالص بسبب مرشدين هيئة قناة السويس اللى مقدرش أقول عليهم غير حسبي الله و نعم الوكيل من رئيس الهيئة اللي سايب أشكال ضالة في القناة تسئ لكل مصرية ومصري.
أول مرشد طلع يدخل المركب من منطقة المخطاف إلى أول القناة وهي منطقة قصيرة جدًا يعني في حدود ساعة فقط ولما دخل المرشد أول ما طلع طلب من القبطان 6 خراطيش سجاير مارلبورو طبعا عشان هو مرشد.
قناة المارلبورو ده اسم القناة عالميا بسبب شوية رعاع القوات البحرية اللي الباشا مهاب مميش مسيبهم علينا ومحتلين مناصب وتخصصات مش بتعتهم بس عادي هنعتبرها زي كل حاجة في البلد المهم المرشد خد اللي هو عايزة ودي مش المشكلة انما المشكلة بقي لما أول مرشد سلمنا للسفاح مرشد القناة
سيادة الرتبة اللي عمري ما شوفت في حياتي نقص ولا بجاحه ولا سفالة ولا حقارة ولا كل الصفات القذرة متجمعة في شخص.
أول ما طلع سيادة الرتبة المرشد بدأ بالأسلوب الرخيص وهو بيتلكك للمركب على حاجات أصلا مش موجودة ولما لاقي المركب كله تمام الحمد لله, قال للكابتن انا عايز 17 خرطوشة سجاير مارلبورو عشان ميعملش مشاكل للمركب ويدفعها غرامة ويعطلها, يعني من الأخر اتاوة, المهم اتفقوا على 15 خرطوشة ودي برضو مش مشكلة دا الطبيعي بتاعهم والكابتن عارف ده ومحضر الخراطيش, انما بعد شوية سيادة الرتبة المرشد طلب ياميش رمضان وزعل قوي لما الكابتن قاله لسة مجبتش فقاله ازاي معندكش وانت عندك ضباط مصريين لا إنت عندك وأنا عايز ياميش رمضان علشان اخده للعيال فى البيت.
قام مطلع من جيبة عينة فسدق وعينة حبهان, والله العظيم جايب معاه حباية وحباية واداهم للكابتن وقاله انا عايز من دة للبيت.
بعد شوية طلب تين مجفف و طلب اللنش بتاع هيئة قناة السويس علشان يجي ياخد الغنيمة بتاعته اللي اتحصل عليهم ووصل اللنش اللى حيلم الغنايم, عشان ياخدها ويوديها للمرشد لحد البيت, واتفقوا انه هيحاسب اللي هيوصل الغنائم, فالسجاير محطوطة فى كيس قمامة كبير, يقوم سيادة الرتبة المرشد يعمل اية؟؟؟.
فتح التلاجة بتاعة الكابتن الى في غرفة القيادة وقام مفضي اللي فيها في الكيس اللي فيه الغنائم, والله العظيم انا بقيت واقف عمال اقول يا ارض انشقي وابلعيني, لما ابقي واقف المصري اللى في وسط زمايلي الى معايا اللي من سبع جنسيات مختلفة, والحقير سيادة الرتبة المرشد الجعان الى عمرة مشاف لحمه يعمل كدا, وعلى فكرة لو حد عارضه هو عنده صلاحية يوقف المركب ويحجز عليها ويدفعها غرامة لا تقل عن 20 ألف دولار لأي سبب هو يقول للهيئة الفاسدة بتاعته هتصدقوه.
المهم قبل ما ينزل السجاير فا بيقول للقبطان اية رأيك أبيعلك السجاير؟!! المفروض السجاير دي اللى هو شاحتها من على المركب اللى واخدها اتاوة عايز يبيعها للكابتن تاني وياخد فلوس, المهم الكابتن وصل لمرحلة لا تسر تماما.
المهم نزلت السجاير بس السفاح لسة موجود
شوية وطلع كيس من الشنطة بتاعته وعايز شوية فاكهة للبيت...
وشوية وجاله العشا فا كان العشاء فيه رز بالخلطة والخلطة فيها مكسرات وشاف المكسرات وبدأ يتعصب عشان الكابتن قاله اننا معندناش مكسرات والرز طلع فيه مكسرات, المهم شوية وطلب حاجة ساقعة ياخدها معاة البيت, والاغرب كمان عايز ماية معدنية للبيت.
والله العظيم عمري ما شوفت فى حياتي احقر من الشخص دة, واللى بعد ما عمل كل دة قام يصلي ودى كانت الكارثة بالنسبالى علشان خلي الناس كلهم يقولوا هما دول المسلمين ؟؟!!.
لعنة الله عليك يا سيادة الرتبة المرشد.
علشان حضرتكوا تعرفو حاجة, المركب دافعة رسوم عبور القناة حوالي 350 الف دولار غير شوية مصاريف تدخل فى 20 الف دولار, يعني هيئة غنية بس جايبة شوية سفاحين مسيباهم يفضحوا مصر اكتر ما هي مفضوحة.
اسف على الاطالة بس حبيت انقل صورة من صور الفساد اللى فى البلد.
هذا وتفاعل العديد من البحارة و القباطنة مع المنشور الذي نشرها البحارة أمين وهبي مؤكدين أن كل ما جاء به صحيح بل ونشروا مقاطع فيديو وصور يؤكدن به صدق كل ما جاء بالتدوينة .