عادي جداً إن المعتقل يفضل يتجددله 45 يوم * 45 * 45 بالسنه والسنتين على اعتبار انهم لسه بيشوفوا القضيه وكده وعادي جداً إن كل المعتقلين تقريباً نفس النظام !!! عادي جداً ... - إن سجن بالكامل يتمنع عنه زياره الأهالي تماماً لأكتر من شهرين ويتمنع إدخال أى أكل أو دوا وإن حتى في شهر رمضان الزيااره ممنوعه ! - إن الأهالي يبقى منتهى أملهم انهم بس يطمنوا ان حد شاف ابنهم ويطمنهم انه كويس ! - إنك تقف في طابور بالساعات وان الناس تسافر من محافظات مختلفه وتستني من قبل الفجر وأحياناً م الساعه 1 بالليل قدام باب السجن وانت ونصيبك بقى .. ممكن تدخل الساعه 12 ممكن بعد كده قبل كده .. ممكن بعد كل ده يتلكك على أى حاجه في التصريح ويمنعك من الدخول .. كل ده عشان في النهايه يتكرموا عليهم ويسمحولهم بالزياره فقط لمده دقيقتين ! - إنك لأكتر من سنه بتشوف المعتقل من ورا حاجز زجاجي وبتسمع صوته بالتليفون بس ومش مسموحلك بأكتر من كده نهاااااائي ! - إنك ماتقدرش تشوف المعتقل غير مره واحده كل شهر لمده دقيقتين ولو تكرموا عليك يبقى 3 دقايق بالكتير ! - إنهم لما سمحوا أخيراً بإدخال أكل للمعتقلين .. كميه الأكل المسموح بيها ماتشعبش طفل صغير - والأكل يدخل كله على بعضه فى كيس بلاستيك مش علب زى البني آدمين لاسمح الله ! ناهيك إن الأكل اللى بيقدم ليهم هناك سىء جداً وفيه سوء تغذيه رهيب سواء فى الكم أو الأنواع نفسها وده أحد أسباب الحاله الصحيه السيئه اللي عليها المعتقلين !! فيه معتقلين خسوا في الفتره الأخيره أكتر من 30 كيلو ! - إن اللي واقف ع التفتيش يشوف ان سمكه بحااااالها ده كتير أوي ع المعتقل ويصر انه يقسمها نصين ويدخل نص السمكه بس .. آه والله grin emoticon وبعد محايلات من اللي واقفين يوافق على مضض ... كتر خيره ! - إنك تروح تلاقي المعتقل شعره طويل وشنبه طويل بشكل ملفت .. أصلهم واخدين منهم مكن الحلاقه والمقصات وكل الرفاهيات دي ! - إن في موجه الحر الرهيبه دي المعتقلين عايشين في زنازين مغلقه ... خد ده بقى مع الإهمال الطبي المريع والأكل السىء جداً مع منع التريض وهتفهم ليه الأهالي بترجع منهاره ومكتئبه من منظر المعتقل وحاله الضعف والإعياء اللى بيكون فيها ! - إن الكانتين ممنوع والكافيتيريا مقفوله فمش من حق المعتقل حتى يطلب أى أكل زياده أو مياه معدنيه .. احنا جايين هنا نتدلع ولا ايه ؟! ....... اللي بيحصل في العقرب بإختصار اسمه قتل بطيء إن لم يكن قتل ممنهج .. وعلى سبيل المثال لا الحصر شفنا نبيل المغربي ودكتور فريد إسماعيل والشيخ مرجان وعصام درباله وغيرهم الله يرحمهم .. لما تبقى مريض ومحتاج مستشفى ورعايه طبيه وأفضل راميك في الحبس الإنفرادي وتموت يبقى استهبال لما نسميه(إهمال طبي) !!!! اسمه قتل بطىء بإمتياز .. كل اللى ماتوا هناك حالتهم كانت مترديه جداً قبل مايموتوا والمعتقلين اللى معاهم كانوا بيتحايلوا ع المسؤولين هناك ينقلوهم أى مستشفى ولا حياه لمن تنادي ! وأخيراً أنا مش بكتب الكلام ده استجداء عطف أو شفقه من حد أو رجاء إن صوتي يوصل للمسؤولين والجو ده ... بفضل الله يقيني في الله وحده إنه (خيرٌ حافظاً وهو أرحم الراحمين ) وإنه أرحم بيهم من رحمه الأم على وليدها زى ماأخبرنا الرسول عليه الصلاه والسلام .. ولكنه البلاء يصيب الأمثل فالأمثل .. انا بنقل واقع مش أكتر عشان لسه فيه ناس مصدقه دوله القانون وان فيه حقوق إنسان وان الكلام اللى بيتقاال عن المعتقلين إشاعات ومبالغات ! حتى لو كان كل اللي جوه إرهابيين وخطر على البلد .. برضه في النهايه في قانون المفروض انه يطبق !! برضه في النهايه في ظلم وافترا !!! في أعتى وأكبر السجون على مستوى العالم وأخطر المجرمين في جرايم حقيقيه مش التهم البلهاء اللي عندنا برضه ليهم حقوق وبيطبق عليهم قانون ! وبعد كده تلوموا الناس انها بتتنازل عن جنسيتها ! لاء المفروض يفضل قاعد في الجحيم ده عشان يبقى وطني وعنده ولاء لبلده grin emoticon كل الحاجات اللى كتبتها عاصرتها شخصياً وتأكدت منها وحدثت بالفعل في ال 3 شهور اللى فاتوا وكل الناس عارفين ان والدي خالد صقر أحد المعتقلين هناك ومش هكذب عشان أنصر موقفي أو أخلي حد يقتنع اني على حق !! حسبى الله لا إله إلا هو عليه توكلت وهو رب العرش العظيم .. #مقبرة_العقرب