من الأمن للجبلاية يا قلبي لا تحزن

اصل الحكاية

لجنة المسابقات باتحاد الكرة قررت العودة للعب علي استاد القاهرة.. القرار خاص بوادي دجلة فقط.. ليه دجلة؟ لأنه مش لاقي ملعب!! بس الأهلي والزمالك عندهم عشرات الملاعب.. صحيح مش عارفين يلعبوا في ملاعبهم.. بس الصيت ولا الغني.
الأمن طبعاً هو اللي رافض لعب الأهلي أو الزمالك علي استاد القاهرة.. خايف من الجماهير.. نفس الجماهير دي هي اللي حضرت السوبر الإماراتي بالقاهرة وبتحضر مباريات أفريقيا أندية ومنتخبات وبتعدي العملية بسلام.
الأمن لسه بيعذب فينا مع كل ماتش.. يمنع الصحفيين والمسئولين وأمن الأندية والنجوم من دخول الماتشات.. بس لو راجل أمن زميلهم حاول يدخل هاتنفتح له كل الأبواب
يعني سمير عدلي اللي بقاله 100 سنة بيدخل كل الملاعب مش عارف يدخل الماتش.. ومروان محسن لاعب الأهلي اسمه مش في الكشف ومينفعش يدخل الماتش.
نرجع نسأل إيه المشكلة لو الأهلي أو الزمالك لعبوا علي استاد القاهرة طالما المباريات بدون جماهير.. وهل دجلة هو من سيعيد الحياة لأهل الكهف في استاد القاهرة.
المهندس هاني أبوريدة وعد بحل أزمة الجماهير.. مش باين.. احنا نستني شوية لما نشوق هايحل ازاي أزمة الصحفيين وبعدين نشوف قصة الجماهير.
أنا لو مسئول في الأهلي أو الزمالك لن أتنازل عن اللعب في استاد القاهرة مهما حصل.. أو يكون هناك أسباب مقنعة لعدم اللعب أو تكون هناك خطة مدروسة ولها توقيتات ونعرف متي سيعود اللعب علي هذا الاستاد.. إما ان تكون القرارات متعنتة ودون سبب فهذا أمر محير.
وعلي فكرة قصة الخوف من الجماهير وهم كبير.. الجماهير مش هتتغير.. واحنا مستنيين الجماهير تتغير وده معناه ان الجماهير لن تعود للملاعب.
الأهلي وافق علي استاد بتروسبورت السيئ لتهدئة الأجواء.. ولو تنازل عن حق هيتنازل عن 100 حق وطالما القصة علشان مصر يبقي مش هنتقدم خطوة.. في ناس فاهمة ان جملة علشان خاطر مصر معناها ان احنا نستسلم لكل حاجة ونسكت ونطنش وفوت.. لا علشان خاطر مصر يبقي نقاتل ونحارب ونتصدي ونتقدم ونخترق ونكسر كل جامد علشان ننجح.. علشان خاطر مصر.. فهمتوا.