تدور في أروقة مشاهير السوشيال ميديا من المنتمين للتيار الإسلامي العديد من الحكايات عن فتاة تدعى "ميار العسال" إستطاعت خداع الكثير من مشاهير الفيس بوك من الإسلاميين لمدة 5 سنوات دون أن يشك بها أحد . وإستطاعت "ميار" - التي تم إكتشاف كذبها بالصدفة البحتة - أن تصنع رابطة مميزة من العلاقات المتغلغلة داخل التيار الإسلامي ، وخدعت الكثيرين تارة بإسم الحب ، وبإسم الصداقة تارة أخرى ، وأصبحت تعرف الكثير والكثير من الأسرار التي تخص الاسر المنتمية للتيارات الإسلامية وأسرار اخرى . يتهمها البعض انها "مريضة نفسيًا" والبعض الاخر يتهمها بأنها تتبع أجهزة سيادية أرسلتها لتعرف بعض المعلومات ، وفي هذا السياق تتعدد الحكايات . وقال "عبد الرحم جمال الدين" - ناشط وكاتب مقرب للتيار الاسلامي - في تدوينة تم تداولها على نطاق واسع : أينعم الفيس مليان اشتغالات كتير جدا بس موضوع "ميار العسال" ده بالذات مهم جدا ولازم ناخده على محمل الجدية والخطورة ولازم نلاقي اجابات لبعض التساؤلات المهمة.. قصتها باختصار قبل ما نطرح تساؤلاتنا.. " واحدة موجودة على الفيس من زمان من أكتر من 5 سنوات ..أمها تركية وأبوها مصري .. بنت جميلة كتبت كتابها على ولد وسيم وحياتها في بيئة وأسرة ثرية وبيوت وسيارات وبيئة تموج بالثراء الفاحش.. وبعد كدا جوزها عمل حادثة وتوفى.. طبعا قبل الحادث ووفاة زوجها كانت متبرجة زي أسرتها والبيئة اللي عايشة فيها .. لبنانيات بقى ومقضيينها.. بعد الحادث لبست الحجاب وبدأت توجهاتها تبقى إسلامية .. وفي هوجة الثورة المصرية أخدت توجه حازمون وكانت بتدخل في جدالات على الفيس بينها وبين أقاربها .. وكان بعضهم ملحدين وبتدخل في مناظرات معاهم في إثبات وجود الإله .. وكانت للحق فصيحة جدا ولديها من المنطق والحجة والفصاحة ما يُبهر المتابع .. وبدأت تتشهر من الجانب ده بطبيعة اختلاطها الشديد بالوسط الإسلامي بالذات النخب الإسلامية .. وعلى علاقة بزواجتهم .. وكانت حاضرة دائماً بتعليقاتها المميزة والذكية في البوستات السياسية والاجتماعية.. لدرجة إنها أحيانا كانت بتدخل في ارتجالات شعرية بين أقاربها وأصدقائها .. طبعاً الكثير تعلق بها عاطفياً .. وفيه قصص وحوارات وأفلام .. وفيه شخص معروف في الوسط الإسلامي وهو متزوج .. كان يصرح بحبه لها وكان يكتب لها على صفحتها كلمات توحي بالحب وكانت تبادله الكلمات والأمور كانت تتجه نحو الارتباط .. انتهى الأمر باكتشاف بعض الأصدقاء أن الصور التي تنشرها وتدعي أنها صورها هي صور لبنت لبنانية شيعية اسمها (نور شمس الدين) .. واتضح إن ميار أخدت صور (نور) وصورة أختها اللي تشبهلها .. وصور شخصيات تانية غير معروفة وعملت بيها اكونتات لوالدها وأخواتها وأولاد وبنات عمها وعائلة كبيرة وأصدقاء مقربون .. طبعا لما بعض الأصدقاء واجهوهها بالأمر أغلقت صفحتها وصفحة والدها وأخواتها وجميع صفحات أقاربها والدائرة المحيطة بها وكانت الصدمة لشباب كثير" العجيب بردو .. ان الشخص اللي كان قريب منها وهيرتبط بيها وده شخص حقيقي وأصدقاء يعرفوه شخصياً وقابلوه .. قفل الأكونت بتاعه بردو؟؟؟؟؟!!!! وحط مليون علامة تعجب وعلامة استفاهم ( ده ملخص شديد لقصتها المليئة بآلاف التفاصيل ) خلينا بقى نتكلم عن الموضوع بجدية شوية ونطرح تساؤلات مهمة .. * ايه الدافع لإن شخص يصرف من عمره سنوات يتفرغ فيهم لاشتغالة كبيرة زي دي؟ * إزاي شخص واحد يعمل أكتر من 30 أكونت بصور وأسماء وحياة كاملة علشان يخدم بيهم ويعضد من حقيقة أكونت مزيف يتغلغل بيه وسط تيار معين ؟؟ * أنا بكره نظرية المؤامرة وبخليها آخر الحلول والتفسيرات لأني بعتبرها ركون للضعف وتفسير سهل للأمور واستسهال وتكبير للمخ.. بس خلينا نتخيل كدا .. هيا كانت ساعات بتنزل بوست جدلي .. ولساعات كل أقاربها في وقت واحد يدخلوا في النقاش ويعلقوا ويهاجموا ويمازحوا ويلاطفوا ويتعصبوا ويتخانقوا ويتصالحوا في وقت واحد .. هل ممكن شخص واحد يدير الأمر ده كله في لحظة واحدة؟؟ * الاشتغالة دي مكنش ليها أهداف نصب مادي ولا عاطفي غالباً لأنها كانت بتظهر إن فيه مشاريع ارتباط مؤجلة وبتقفل أبواب الارتباط أمام أفواج الحكاكين .. والاكونت بتاعها مش بتضيف عليه أي حد .. كان بسهولة يبقى عندنا مئات الآلاف من المتابعين ..لكنها غالباً كانت بتختار المشهورين أو الفعالين في الوسط النخبوي الإسلامي.. طيب ايه كان هدفها بالظبط؟؟ * ياترى لو مكنش حد اكتشف الموضوع كان نهايته هتبقى إزاي؟ وكان هيقعد كام سنة؟ وكان هيوصل لإيه؟ أنا تذكركت دلوقتي إنها كانت دايماً كل فترة تقول إنها هتعمل عملية خطيرة في القلب .. وده أعتقد إنها كانت بتسيب الباب موارب لاحتمالية وفاتها .. ويبقى مبرر منطقي لما تقرر إنها تختفي .. كل دي تساؤلات ملهاش إجابة .. ومفيش داعي ان احنا نوجه النصح ونقول محدش يآمن لحد ميعرفوش على الفيس والكلام ده لأنه المفروض من المسلمات .. ولأن المرة دي فعلا غير كل مرة .. دي كان حواليها دائرة كبيرة من رجال ونساء وأسرار بيوت وشبكة علاقات لا تدع مجال للشك والريبة في شخصيتها .. كتبت البوست ده على السريع دلوقتي وأنا لسه مخلص كلامي مع أصدقاء لي كانوا متداخلين معاها في قصص ومواضيع وبعضهم كان مرتبط بيها عاطفيا .. وشخص يعرفها جيداً هو وزوجته وأسرارهم معاها !! وياريت لو حد عنده معلومة يضيفها أو يصحح لنا حجم الصدمة كبير بحجم الاشتغالة العابرة للقارات اللي بتقول إن إذا كانت دي اشتغالة شخص فاضي لا يملك إلا وصلة نت .. فما بالك باشتغلات أجهزة المخابرات العتيقة بأدواتها المتعددة وإمكانياتها الهائلة ؟؟!!! ده احنا وقعتنا سودة والله .. السؤال اللي هنهي بيه حديثي : كم "ميارعسال" بيننا ؟؟ "بحسب قوله" بينما قال "عمر التميمي" : الكلام دا مهم بخصوص موضوع ميارا سعد وقصتها .. القصه دي بتتكرر من سنين وقصة ميارا تحديدا من ضمن القصص اللي حصل بسببها نقاشات عميقه مع شخصيات كتير كانت متورطة بشكل او بآخر في القصة دي بدون ما تعرف .. الحكاية بالمختصر مصيده وبيوقع فيها ناس كتير وللاسف محدش بيسمع كلام ولا بيصدق إلا ما يوقع، عندي تجميعه من سنين ل ما يزيد عن 200 حساب لشخصيات وهمية مرتبطة ببعض في نقاط او صلات واهداف كتير، والشخصيات دي نشطه وليها علاقات في كل الاتجاهات ومتوغله في كيانات وتجمعات كتير جداا منهم مشاهير كتير واستهدافها بشكل عام مش على حد معين لا دا على الكل .. دور الناس دي استهداف اي خيط وتجميع اكبر قدر من المعلومات عن حاجات كتير من كل المصادر سواء كانوا اشخاص نافذين او علاقات حتى ولو من الدرجه العاشره .. اسماء وشخصيات كتير من مشاهير السوشيال ميديا والسياسيين والاعلاميين واقاربهم واصحابهم واقارب اصحابهم وحتى الجيران واي شخص ممكن يكون على علاقه ولو من بعيد بشخوص المستهدفين، مش عارف نقدر نسميها social engineering ولا لأ بس العملية دي ملهاش مسمى غير كدا، اعتقد! وفي المواضيع دي تحديداا إتكلمت مع اكتر من شخص من الناس اللي بيحصل معاهم الكلام دا واتدخلت في اكتر من مشكله بعد تورط البعض وفي مشاكل الحمدلله إتحلت وفي ناس اتلحقت وفي ناس للاسف لا! الشاهد من القرف دا كله ودا مش تشنييع او تلقيح على حد من اللي وقعوا او حد يفتكر انه مقصود بعينه والله بس فعلا في حالة سذاجه خطييره وخصوصا عند اللي عندهم متلازمة الشهرة والفولوورز الكتير او اللي بيمسكوا سلطة او منصب في اي كيان بقى وانعدام مسؤوليه كمان عند 90% من الحالات المستهدفه دي، لان اغلبهم بيكتشف بعد مراجعة الحوارات او تفاصيل الحوارات اللي كانت بتدور انه يا إما كان مصدر معلومات قيم او كان سبب في ضياع ناس او تدمير خطط أو احداث كتير والكلام دا من وقت 25 يناير بيتم على فكره مش من حاجه جديده ولا حاجه ! دي عمليه منظمه ومدروسه ومش لعبه او شوية عيال بتهري وبتتسلى وسواء كان حساب ميارا مرتبط بالتجميعه اللي معايا دي او الحوارات السابقه ولا لأ، بس الموضوع دا تحديدا مش عشوائي ابدا ومنظم ومدروس وللعلم، مش كلهم مصريين اللي شغالين في الحوارات دي وفي جنسيات تانية والليله فعلا كبيرة بس محدش عايز يستوعب . لو مش هاتكونوا على قدر المسؤوليه ماتفتحوش حسابات سوشيال ميديا ولا تكونوا علاقات مع كل من هب ودب وتسلموا رقابكم حتى لو كان الشخص دا مشهور او معروف او ليه مواقف حلوه وجو المحن دا عشان دا مابيأكلش عيش بيأكل حاجات تانيه الأيام دي "بحسب تعبيره" بينما قال حسام سرحان - إعلامي - : فيه فتاة موجودة على الفيسبوك ومنتشرة في اوساط شباب الاسلاميين تحديدا اسمها هو ميار العسال ، الفتاة دي مزيفة ومفيش حد اسمه ميار العسال وصور بروفايلها اصلا بتاعة بنت تانية موجود بروفايلها للي حابب يتأكد، و ميار دي في كذا حد واجهها بحقيقة الامر واتضح انها مفبركة بروفايلها وبروفايلات عائلتها كلها، الاخت ميار المزيفة بقالها خمس ينين ماشاء الله مكونة شبكة علاقات عظيمة جدا، منها ماوصل لانها ارتبطت عاطفيا بكذا شاب و رجل من ضمنهم متزوجين اصلا وهما اتعلقوا بيها وكده. موضوع البروفايلات المزيفة اللي بتخلق تعاطف بقا منتشر جدا بدءا من وسام ابراهيم اللي بقالها تلات سنين بتتعالج وطلعت مش موجودة اصلا و ليس انتهاء بالاخت المذكورة فوق خدوا بالكوا وماتتعاملوش مع شخص بهذا القدر من الثقة و التعلق محدش قابله عالحقيقة عالاقل "بحسب قوله" فيما قال "أحمد خيري العمري" : تواصلت معي منذ أيام إحدى الأخوات لتطلب مني الكتابة عن فتاة اتضح أنها شخصية وهمية تصول وتجول منذ خمس سنوات على الفيس ، وتتلاعب بعواطف الشباب ممن تنتقيهم على نحو دقيق. رغم أن قصتها تحتوي على دراما لفلم هندي كان يجب أن يثير شك الشباب ، لكن على ما يبدو عواطفهم أعمتهم..خاصة أنها كانت قد وضعت صورا شخصية لفتاة ( ربما هي وربما لا علاقة لها بها إطلاقا). الأمر انتهى بقلوب مكسورة فحسب ، ولم يكن هناك نصب أو احتيال مادي او ابتزاز من اي نوع...وغالبا الفتاة تعاني من اضطراب نفسي ومن حياة كئيبة تعوض عنها بحياة أجمل تكون فيها هي المعشوقة المرغوبة التي يتعلق بها اكثر من شخص. حدث أن تواصل معي شخص لسنة ونصف تقريبا ثم اتضح أنه وهمي ، ولكن بسبب ارتكابه لأخطاء تمكنت من معرفته والوصول له..في البداية اتصل بي ليساعد في إنقاذ عائلة منكوبة ثم استمر بالتواصل متحدثا عن بطولات لم تحدث..مرة أخرى لم يكن هناك أي سبب مؤامراتي ( لا طلب مال ولا معلومات خاصة ولا شيء)...فقط حالة نفسية للتعويض عن حياة رتيبة بالعيش في حياة بديلة أكثر إثارة وفيها رضا أكثر للذات. أكرر : عندما أقول اضطراب نفسي أو حالة نفسية ليس المقصود السب أو التعريض ، ليس المعيب الإصابة باضطراب ، المعيب هو عدم محاولة علاجه... ***** الحذر الحذر..الشباب والفتيات ، لن افهم ابدا كيف يمكن لعاطفة أن تنشأ اونلاين لكنها تحدث على ما يبدو، ويجب أن يكون هناك حدود افتراضية يقف عندها الأمر بدل التمادي.... يمكن ان تكون الخسائر أكبر..من مجرد قلب مكسور "بحسب تعبيره"
