رثاء قتلى استاد الدفاع الجوي رحمهم الله ..شباك تذاكر

والدنيا بتحدّف وجع
جوه القفص
يعني الوطن هو القفص
والتذكرة تمن اللي فات
ندفع كمان التذكره
ومدرعه
بتسيب ايدينا مكسرة
والباقي مات !!!
جوه القفص
باقي الوطن
والموت على حافة قفص
حالف يبات
والدنيا بتحدف وجع
خلينا انا
وحدي هنا
والحلم تذكرتين سكات
.........................
بين الشوطين
والروح ترفرف في السما
شوف كم نفوس اتكفنت
شوف كام عيون. اتيتمت
وايدينا لما اتكسرت
حسب الحكم لمسة ايدين
.................
الماتش قرب ينتهي
والموت هناك
واقف وبيوزع تذاكر
وقف الحكم على جثتي
وانا روحي
بتعدي ف دواير
رمية تماس على دمعتي
ولاعيبه واقفه ف سكتي
مافيهمش غير ابنك
يا (جابر)
حسب الحكم ضربة جزا
موجوع بيتسول دوا
مستني رحمه م العساكر
على جثتي واقف وطن
شابك رصاصه بجتتي
يا دنيتي!!!!
طلع الوطن ...شباك تذاكر