وشوشت نفسى بكل أحزانى ورسمتها بالدم ع الجدران مع إنى عارف إن سجّانى عمره ما فك الخط من جرنان جانى الشيطان بشماتة ماليه عنيه قال لى بتعمل إيه ؟!!! هو أنت فاكر حد بيك مهتم !! مستنى مين يجى ويقرا الدم ؟!! مالك يا عم ؟!! هو أنت مابتزهقش مبسوط بحالك والقيود ف إديك مهما تقول.. ناسك مابتصدقش والدنيا هى الدنيا من حواليك .. الناس ف سوق التلات واقفين بيتباعوا والحلم جوّه السُكات بيدارى أوجاعه والزنزنات ماليانه بالحكايات والليل مخبّى الشمس بدراعه أما الشاشات ماليانه بالفوازير والحق زى العمر .. سر ف بير ما تعيش لنفسك والّا ناوى تضيع وإنت اللى قبلك ياما ضاعوا كتير كان الكلام منطقى .. قال م الحقيقة كتير وحاجات كتير خبّاها وماقلهاش .. ماقلشى مثلاً إن أنا عايش وإن الحياة ف الدنيا مش ببلاش وماقلشى إن الكلمة حمّالة والأمهات ف بلدنا حبّالة وإن الميدان ستات ورجالة واقفين ف وش الظلمة والأوباش وإن التاريخ بيتابع الحالة وف إيده صفحة لسّه ماكتبهاش وإن اللى يكتب ع الحيطان بالدم عمره ما يبقى باللى كان مهتم ف عيونه دايماً اللى جاى أهم ويشوف حاجات غيره مابيشوفهاش