فجر جديد

ياجموع الشعب المصرية
مصر بتتنفس حرية
والأرض بتتكلم مصرى
وبتدى دروس فى الوطنية
الله ع المصرى واصراره
الله على قوة أحراره
والكون بيتابع أخباره
مبهور بالثورة الشعبية
العالم واقف فى مكانه
نسى جنسه واسمه وعنوانه
مع فرح المصرى وأحزانه
بيردد تحيا الحرية
مصر ياحلاوتها يامحلاها
حلوانى صحيح اللى بناها
واختارها ربنا وحباها
بالنيل والشمس وبالميه
الفجر جديد هل علينا
ومفيش ولا عيد ح يعدينا
وح ناكل من كد ايدينا
وح نلغى عقود التبعية
ح نعمّر مصر ونبنيها
و ندافع عنها ونحميها
ونصون كرامتها ونفديها
وحياتنا عشان مصر هدية
المصرى اللى محدش أده
شال ايده خلاص من على خده
وح يصنع وح يزرع أرضه
وح يدخل تالت ألفية
محنش ح نضيّع ولا ثانية
وح تبقى الأولى مش التانية
وح ترجع تانى أم الدنيا
ولحضن الأمة العربية