محمد مصطفي الهلالي يكتب : رثاء ...للشاعر الخالد ..محمد عفيفي مطر

شاعر موجوع بالوطن
بنلف خيطان العمر الدايب
نتسر سب جوه حيطان الهم فرادي
ونشوف أصحابنا كفوف بتسلم
وورود دبلاته بتموت
......وبتنزف في عبير الروح
والسكة خلاص ما بقتش بعيده
شبابيك ع القلب المجروح
تتصور
ما قدرنا ش
حتى نغير فكرتنا عن بكره
أو حتى نمس العرش الحاطط
رجليه فوق رقابينا
ويسد طاقات النور
ما قدرنا ش
وقدرت أنت لوحدك
تفر
من بر الملح لبر الملكوت
وتفوت وسبقت الصوت
مخرج واحد للدنيا
مخرج واحد هوة الموت
وسبقت بخطوه
سبتنا في المحنه
وعديت
رصيت كل كلامنا
ورسمته حواديت
فتنا لآلامنا في بكره وعديت
قبل ما يهل علينا الموت الجارح
ما عرفنا ش يومنا من امبارح
كنا مطرح ما يهل علينا اليوم بنبوح
ونقول الشعر ف حواديت
للأمل الصابح
للضحك
للغدر البايت
لوشوش الناس والنيل
او حتى لضفاير بنت نسايه
ورموش من تيل
لكن وشك لما يهل علينا
بالفرح الطالل منه كما الأطفال
والحلم الضامم بكره بكل جوانحه
كنا نشيب من قوه صبرك
من جلدك
من جدك وقدره جسمك
علي شيل الأحمال
علي قول الموال
سبتنا كده
زي بساطه شعرك
والدهشة
بتلم بكف ايديك الناعمة أوهامنا
وتسجل في دفاتر أشعارك
تفضحهم وتفضح أسرارهم
وتقول
والقول من شعرك بواح
وتقو ل و الفكر في شعرك فضاح
خطايا الفهم
واللمه والهمة
واللقمة المشحونة جراح
وكلام الشعر الموزون أوجاع
كان الهم كلام يتقال
وتحسه الناس
وتلمس بيه أوجاعهم
فتحل العقدة المربوطة علي دماغهم
فتطير عصافير الهم
المربوطة علي أصداغهم
ويفكو المربوط في رجولهم
تتنطط كل خيولهم قدامهم
جاهزين للغزو خلاص
****
جهات أربع
وأنت جهة واحده دايما للخير
واستغربتا أزاي هتفوتنا
ف عز ما جاي موعدنا
نتلم خطاوي حزينه
تستني الصبح هيطرح مطرح للناس
والجوع النهاش
مرمي في بطون الأطفال
وأيديك ويانا تلم الدمع من الطوابير
*******
فكرت ازاي تعملها وتسافر وحدك
وإحنا علي رجلينا وراك ماشيين
حسستنا بالعجز
كلامك عايش
جوه قلوب الناس
الفقرا ايوه الفقرا
مش جوه قصور الظالم
ولا صور العاج و الالماظ
شايفك في صواني الأكل مع العمال
بالقصعة علي سلم بكره
بتبني للحب أساس
طوبه في جدار الحب في مصر
حلم اخضر وبلون الطمي
حلم النور اللي أتغرب في الدلتا
شايفك وبطول النيل
ترسم أحلام لولاد الناس
وعيال بكره وعيال لسه ما سميتهاش
عارفك
كل حكايتك دهشه
تتصور جوه كلامنا كل كلامك
وكلامك هو كلامنا زى ماهوه
نفس الدهشة
لسانا بنقعد نستنا ورودك
زى النفس الطالع من صدر الزهئان
وتهل علينا بأحلامك زى الأسفار
وتلف علينا بهمه وتسال
وتمد أيديك لسنين العمر
الدايخه تداوي جراحنا
وتجيب لجروحنا ورق من شجر الجنة
وتحط التوت علي عوراتنا
وتداري في توهه أحزانا
دلوقتي محدش بيطاردك في الليل
لا الموت ولا ضل الأشباح
شفت
لساك بتحط اللقمة في بق الناس
والجوع واكل بطنك
لساك إنسان يا أبو قلب ملاك
عديت كل الأفلاك
بصيت واتسعت بيك الرؤيا
بتشوفنا
شايف خطاوينا أزاي بتوه
********
مين غيرك يرشد خطاوينا ويرشدنا
ويحط للشعر دليل
علي قد ما بعدت منا المسافات
علي قد ما ضاقت بينا الحكايات
شايفينك
في حروفنا المجنونة
مستني يرصد في القصص
لون الخطا وحلاوة الأناشيد
قصتك
شاعر بلون الطمي شبه السنبلة
واقف بينحت في الصخور
نتلم في الصحبة
ونفترق
حواديت وقلمك رصها
حواديت قلتها في شعرك عشانا
زي النور هتسهر في سهرنا
ونبص معاك للجاي من طاقه النور
من خرم في طاقه حيط
نلضم أحلام ونفسر كل كلامنا لبعض
ونعدي لبكره معاك
تسبقنا ونلحق
بطول الوطن المغتال
نفتل أحلامك ضي
ونهد سدود الحزن بهمه
ونقول لأولادنا
ازاي صحيت الناس
بجرس وناس
بيدق في كل حكايتك
مش بس وداع واحد
وداعات
الشاعر المعجزة مات