المصرية امرأة استثنائية

أنا الشرقية وكرمها
وأنا الغربية بغناها
أنا اللى دينها كرمها
وعمر الحزن ما حناها
أنا اللى راسى مرفوعة
وأنا الكلمة اللى مسموعة
أنا الشعبية وبنت الناس
أنا اللى قلبى حتة ماس
أنا الشرعية بنت النيل
أنا القمرة أم رمش كحيل
وأنا السمرا بشعر الخيل
أنا السكر فى عز المر
وأنا اللى ربيت ابنى حر
على الطيبة على أهله
وعلى العدو طوفان بيمر
أنا اللى بيتى متعمر ولو حتى بقليل المال
أنا اللى مزينة بلدى بأحلى عيال
أنا اللى بلدى شيلانى جوة نن العين
ولو مرة أقول الآه
ألاقى حبايبى على الصفين
أنا النص اللى حلى الكل
أنا الفرحة أنا الطرحة وعقد الفل
أنا القسوة وأنا الطيبة
وأنا اللى ما أعرف العيبة
وأنا اللى لو غابت
ما بتطولش فى الغيبة
أنا القيمة وأنا الهيبة
ومن غيرى الحياة كئيبة
أنا ذكرى وأنا حاضر
وطعم العيلة والأجداد
وانا فرحتكوا فى الأعياد
أنا الشمعة وأنا الزينة
ومركب عربى فى المينا
أنا ريحة الورد وموجودة
فى الهيصة ووقت الجد
أنا العمر اللى فيك اتمد.