خُرم الأوزون..! عبد العزيز محمود

رغم انه لم يكن أول مؤتمر عن خُرم الاوزون لكن الخلافات التي شهدها كانت غير عادية....
-يا جماعة انتو بالشكل ده عمركم ما ح تحلوا المشكلة!! لازم يكون فيه تنازلات عشان نقدر نحل!!! والا ايه يا عطعوط بيه؟؟!!
-طبعا !!! هوه من غير تنازلات الواحد يقدر يعيش ولا يمشي حاله!! ولا ياكل ولا يشرب ولا ينام في الدنيا دي!!! التنازلات يا اخوانا هيه الحل الوحيد!!
-خلاص احنا مستعدين نتنازل عشان الأمور تمشي!! بس ياريت تقولوا لنا ايه هيه التنازلات المطلوبة؟؟؟!!
فقال شاكر بيه فضله ..
-أبدا ولا حاجة احنا عايزين ننسي خلافاتنا ونشكل لجنة تقيس لنا خُرم الأوزون!! وتحدد لنا بالظبط ح نلحمه ازاي؟؟؟ وبإيه؟؟!! و يا دار ما دخلك شر!!!!!
وبعد الموافقة على الاقتراح بدأ الصراع ...
-ماحدش ح يرأس اللجنة غيري!! احنا اول ناس قدمنا تقرير عن خُرم الاوزون!! واحنا اللي ح نمسك اللجنة!!
-ليه هوه اتوبيس؟؟؟!!ما احنا كمان قدمنا تقرير عن الخرم!! والتقرير بتاعنا يضرب التقرير بتاعكم بالصرمة القديمة!!
فاقترح عتريس بيه أن يرأس اللجنة اكبر الاعضاء سنا ...
-ايه الكلام الفاضى ده!! هوه احنا قاعدين في دار للمسنين!! الموضوع ده يلزمه واحد فاهم وصحته حديد مش واحد كبير في السن وصحته على قده !!!
-يا جماعة التعامل مع الخُرم محتاج حكمة!! والحكمة يلزمها راجل مخضرم وعنده تجارب !!
وبعد شد وجذب تقرر أن يتولى الخربوطللي بيه رئاسة اللجنة بوصفه أكبر الاعضاء سنا على ان يساعده وائل بيه ممثلا لجيل العيال ..
-انا باقول بدال اللت والعجن!! اللجنة تعمل زيارة ميدانية لخُرم الاوزون عشان تقيسه وتحدد لنا ح يتلحم ازاي؟؟ وبإيه؟؟!!
-ايوه بس الموضوع ده يلزمه مكوك فضاء عشان اللجنة تقدر توصل للخُرم!! واحنا كلنا زي ما انتوا عارفين ما حيلتناش غير الستر!!! وصحتنا ما تستحملش السفر في الفضاء!!!!
فقال حلاوتهم بيه ...
-خلاص احنا نطلب مساعدة أمريكا!! هيه أكتر دولة فاهمة في موضوع الفضاء!! ومعاها 99 في المية من اوراق اللعبة!!! وكمان عندها سفن فضاء ورواد فضاء ممكن نأجرهم!!!
-ليه وهيه روسيا والصين راحوا فين؟!! انا مستحيل أتعاون مع الجماعة الامريكان دول اللي عايزين ياكلوها والعة!!!
فطرح الفطاطري بيه حلا وسطا...
-خلاص بلاها زيارة ميدانية !! وكفاية لجنة الخربوطللي تقيس لنا خُرم الاوزون من الارض!! وتحدد لنا ح نلحمه ازاي وبايه!!! وكده يبقا اللجنة عملت اللي عليها ويمكن أكتر شوية!!
وهكذا ظهرت أفكار جديدة....
-انا في تقديري الخُرم ده لا يمكن يقل قطره بأي حال من الأحوال عن خمسميت كيلومتر مربع!!!
-مين قال كده؟؟!! خُرم الأوزون مش كبير للدرجة دي!! انا أعتقد إنه مايزدش عن تلاتين كيلو متر مكعب!!
وفي ظل التباين الحاد في التقديرات قال عتريس بيه..
-انا شايف يا جماعة اننا نركز الأول على مكان الخُرم!! وبعدين نتكلم عن ابعاده!!
فاختلفت وجهات النظر ...
-أكيد الخُرم في الناحية البحرية!!!هوه حد جايب لنا المصايب ووجع الدماغ غير الناس المتقدمين اللي في الشمال دول؟؟
-بالعكس انا متهيألي والله اعلم انه في الناحية القبلية؟! ما انتو عارفين كويس البلاوي بتاعت دول الجنوب اللي نايمة على روحها!!!!
-انا بأقول يا جماعة ننسى شويه مكان الخرم!!! ونحاول نركز ح نلحمه بإيه؟؟!!
وهنا طالبت بعض الوفود بتشكيل لجان فرعية ..
-وايه لازمتها بس اللجان الفرعية دي؟؟؟ ما لجنة الخربوطللي ممكن تدرس لنا كل المسائل وترحمنا من المناهدة ووجع القلب ده ؟؟؟!
-بالعكس اللجان الفرعية ح تخلينا ندرس كل التفاصيل ونراضي الكل!! واهي فرصة نوزع اللجان دي على الوفود الزعلانة!!
ووسط خلافات حادة ومقاطعات من هنا وهناك طلب عتريس بيه الكلمة ...
-يا جماعة حرام عليكم انتو ما تعبتوش من الرغى !!! انا باطلب استراحة نعبي فيها (التنك) ونروق دماغنا!!!!
- خلاص يا بهوات اتفضلوا ع البوفيه المفتوح في القاعة الزرقا!! معلهش المكان واسع شوية ومساحته ميتين فدان !!! وياريت عشان ماحدش فينا يتوه ..كل واحد يمسك في ديل جلابية أو جاكيت اللي قدامه !!!
وبعد ساعات من الأكل المتواصل للخرفان المشوية والديوك الرومي والبط والاوز والحمام المحشي والسيمون فيميه والجمبري والاستاكوزا ...
-ياسلام ياجماعة لو ناخد لنا استراحة تانية نحلي فيها بصواني البسبوسة والبقلاوة وطواجن أم على !! وبعدين نرقع فناجيل الشاي بالنعناع ونخش ع الشيش العجمي!!!
وفور استئناف جدول الاعمال استمرت الخلافات ...
-واضح ان خرم الاوزون لسه عامل لنا توتر!!! والظاهر اننا محتاجين قعدة تانية في جو أهدا!!! عشان كده انا عازمكم كلكم بكرة على أكلة غزلان مشوية ح تاكلوا صوابعكم وراها!!!
وبعد اسبوع من الاجتماعات والاكل المتواصل وصل المؤتمر الى طريق مسدود ...
-أنا بأقول يا جماعة نرحل خُرم الاوزون للمؤتمر اللي جاي!!! وكفاية علينا النوبة دي اننا قضينا يومين حلوين مع بعض وشكلنا لجنة الخربوطللي !!!