أين ذهب الدراويش ؟؟

ستظل جماهير الإسماعيلي تتذكر طويلا مجلس إدارة ناديها الحالي ، لن ينساه أبدا أي إسماعيلاوي ، ولن يغادر عقول أبناء السمسمية مدي الدهر ..
لكن لماذا لن يغادر الذاكرة .. ؟؟ .. يا سيدي لن يغادرها بسبب إنجازاته التي حققها مع الفريق ..؟
بالتأكيد معاليك مجنون ، أية إنجازات تلك التي تراها ، ولا يراها أحد غيرك ..؟؟
يا عم الحاقد يبدو أنك تري الدنيا بنظارة سوداء قاتمة ، أو يبدو ان سيادتك ( منفسن حبتين ) وال ( نفسنه ) تبعنا غير ( الأنفاس ) ، فالأخيرة تستطيع تمييزها بدخانها الأزرق النفاذ ماركة ( المنجاوي ) أو ( عيدك سعيد ) ، حيث جلسات الإنسجام والفرفشة ، أما الأولي فهي ذات دخان أسود قاتم مثل ما بداخل قلبلك تماما ..
يبدو أنك أنت الذي فقدت عقلك أو أن ( الأنفاس ) قد أطاحت بنافوخك ، لأنك تتحدث عن إنجازات ، بينما لا نري سوي سوءات ومصائب علي كل شكل ولون .. !!
لم أفقد عقلي بعد ، ولكنها الحقيقة ، الإسماعيلي الآن في المركز الخامس ، ولو إستمرت الإنجازات علي ما هي عليه ، أتوقع أن ينهي الموسم في المركز الأول بجدارة وعن إستحقاق ..
المركز الأول ...؟؟؟ .. يبدو أن الصنف الذي تستخدمه ( مضروب ) ، والأفضل لك أن تغيره ، أو تغير التاجر الغشاش ..
يا صديقي العزيز ، الصنف الذي أتعاطاه جديد تماما ، وهو ماركة ( المر ) ، وهي نفس الماركة التي بدأ جمهور الإسماعيلي إدمانها في الفترة الأخيرة ، وهو إصطف ( بيور ) ، وارد دولة ( فلسنجي ) العليا ، ألا تسمع عن دولة ( فلسنجي ) ..؟؟
طبعا سمعت عنها ، وعارفها كويس أوي ، حتي بص في جيبي كدا هاتلاقيه أبيض من ورق ( البفره ) ، لكن سيبك من ( اللف ) والدوران ، وقولي إزاي الإسماعيلي هايخلص الدوري وهو في المركز الأول ..؟؟
مش قولتلك انك حاقد و ( منفسن ) كما كل جماهير الإسماعيلي ، الحكاية لا علاقة لها بالشرح أو ( دياولو ) ، فبكل بساطة لو إستمرت النتائج كما هي الآن ، سيهبط الإسماعيلي للدرجة الثانية ، ويحتل المركز الأول في القسم الثاني ، ليسبق المقاصة والمريخ والشرقية ( للدخان ) ..
هاتقولي برضة ( دخان ) ، انت إيه حكايتك النهاردة ..؟؟ ، ثم تعالي هنا ، مين ( دياولو ) دا ، أوعي يكون محترف سنغالي جديد جاي الدراويش وانت مخبي علينا يا خبيث .. !!
محترف ..؟؟ .. أعوذ بالله .. بذمتك مين فينا اللي نافوخة ضارب .. مش باقولك حاقد وقلبك اسود ، الإحتراف دا رجس من عمل إتحاد الكورة ، وإحنا ناويين نغير المفاهيم القديمة الباليه دي ، لازم ننقل جماهير الإسماعيلي نقلة فنكوشية لولبية متفسخة ، نسبة للفسيخ ، وإحنا خلاص أهو داخلين علي شم النسيم ، كل سنه وانت طيب ، عاوزين إيه تاني أكتر من كدا ..؟ .. لكن خليك جرئ وإعترف ، مش كدا الإسماعيلي برضه هايبقي في المركز الأول ..
طبعا الأول .... لكن ... دا هايبقي في الدرجة التانية يعني دوري المظاليم .. ؟؟ الإسماعيلي التاريخ والشموخ والعظمة والفن ينزل درجة تانية ..؟؟
يا عم قول يا باسط ، تانية وإلا تالته ، أهم حاجة انه ( فرز ) أول ، مش أحسن من مافيش خالص ، وبعدين مالهم المظاليم ، كفروا يعني ، دول ولاد تسعة زينا بالظبط ، أهو انتوا كدا يا جمهور الدراويش طماعين طمع يا جدع ، عاوزين التراب عشان يملي عينكم ..
ياريت .... هو إحنا لاقيين التراب حتي ، .... لكن بالشكل دا الإسماعيلي سمعته ( تتقطع ) ، وشعبيته ( تتحرق ) ، والدنيا ( تولع ) ، ومش بعيد الأمن ( يشد ) حالة طوارئ ، وندخل مع الجمهور في ( غرز ) ومشاكل ..
ياعم فكك من ( رص ) المصطلحات الكبيرة أوي دي ، إحنا مش بتوع مراحل ، إحنا ( بنرفع ) كل حاجة مرة واحدة ، ولأننا ( كرسنا ) حياتنا من أجل ( سحب ) شأن نادينا لأعلي ، ممكن حضرتك تصحي الصبح تلاقي الإسماعيلي ( مترمل ) ، وبكدا نريح إتحاد الكورة من وجع ( الدماغ ) بتاعه ، ونخلصه من جمهوره ( المونون ) ، ونبقي صحاب ( سابقة ) ماحصلتش مع الدراويش ، و نضرب كل العصافير ب ( حجر ) واحد ..
( حجر ) .. ؟؟ ، شكلك ( فاصل ) ومش حاسس بحاجه خالص ..
والله انت اللي ( محششني ) إنك حاقد ، وقلبك اسود من ( الفحم ) ..