معلومة كارثية حول زيادة الاحتياطي النقدي

قلل سامح أبو عرايس - خبير في شؤون الاقتصاد والبورصة - من المعلومات التي تم تداولها أمس حول زيادة الاحتياطي النقدي المصري إلى 42 مليار دولار .
وقال "أبو عرايس" في تدوينة عبر حسابه ب"فيس بوك" : "احتياطي البنك المركزي اللي أعلنوا النهاردة وصوله الى 42 مليار دولار وانه أعلى مستوى في تاريخه هو احتياطي وهمي وزيادة وهمية لأنه كله قروض .. الزيادة الأخيرة دي مثلا بسبب قرض 4 مليار دولار اقترضته مصر بطرح سندات في الأسواق الدولية وبفائدة وصلت 8 % سنويا على الدولار والسندات دي هنسددها 7.25 مليار دولار .. والاحتياطي فيه قرض 20 مليار دولار اكتتاب أجانب في سندات الخزانة المصرية بفائدة وصلت 20 % سنويا .. وفيه قرض سابق بطرح سندات دولارية بحوالي 7 مليار دولار ( يعني مجموع شوية القروض اللي فاتوا دول 33 مليار دولار من الاحتياطي ال 42 مليار ) ده غير قروض صندوق النقد الدولي وغير الودائع الخليجية .. من الاخر يعني الاحتياطي ده مش احتياطي حقيقي لكن قروض".
وأضاف: "يعني احنا عاملين زي واحد بيستلف بفوائد ويحط جزء من القروض اللي استلفها في حسابه في البنك ويقول للناس أنا عندي فلوس في البنك .. ونتيجة سياسة الحكومة في الاقتراض المستمر من الخارج ارتفع الدين الخارجي المصري الى أعلى مستوى في تاريخه ليصل الى 85 مليار دولار ولو أضفنا عليه 20 مليار دولار دين خارجي في صورة داخلي اللي هو اكتتاب الأجانب في سندات الخزانة المصرية بفائدة 20 % على الدولة يصل الدين الخارجي الى 105 مليار دولار وهو أعلى مستوى في تاريخ مصر .. وطبعا المبلغ ده لو حسبنا الفوائد سنجد أننا سندفعه أكثر من 150 مليار دولار .. فيا ريت بلاش بيانات عنترية تحاول تصوير ارتفاع احتياطي البنك المركزي على انه إنجاز .. لأن الموضوع كله قروض مش دخل حقيقي .. ويا ريت تحترموا عقولنا شوية بقى" حسب تعبيره.