مواجهة بين "الصافعة والمصفوع" والإبراشي مصدوم

استضاف الإعلامي وائل الإبراشي كلًا من شريف السيد - مساعد رئيس حي ثانِ المحلة - و والمهندسة ناريمان خضر - نائبة رئيس حي ثانِ المحلة - على خلفية صفعها لزميلها الوراد اسمه قبلها ، أثناء ساعات العمل الرسمية .
وقال "السيد" في مداخلته : "هي ضربتني بالقلم قدام زملائنا مساعدين رئيس الحي والسواقين والعمال .. وكان رئيس المدينة موجود ونائبه كان موجود برضو".
و ردت "ناريمان" قائلة: "مفيش حاجة من دي حصلت ودي مش أخلاقي .. وكل دي ادعاءات كاذبة وأنا جالي تليفون إن فيه إضراب فتوجهت للجراج اللي هو تبع الحي فلقيت إن العمال والسواقين عاملين إضراب والباشمهندس (المجني عليه) تخلى عن دوره كمسوؤل وكمساعد رئيس حي .. ومفهمهمش إن الإجراءات بتاعت صرف مرتباتهم منتهية".
وقاطعها "الإبراشي" قائلًا: "كل دة كويس .. بس هل من بين العقوبات التي يجب أن تُطبق إن عندك لائحة تقولك اللي يخطيء اديله بالقلم على وشه؟" .. فردت قائلة : "لا يا فندم مانا بقولك إن دي ادعاءات كاذبة ومحصلتش " .. ورد "الإبراشي" : "ماهو زميلك بيقول إن دة حصل قدام الناس كلها مكانش في أوضة مغلقة يعني".. فردت : "ينفع إن أنا أضرب زميل قدام 30/40 عامل وسائق .. دانا كنت نازلة أحل أزمة مش أفتعل أزمة " .. وقال "الإبراشي": "أنا باخد اللقطة دي اللي قد يعتبر البعض إنها بسيطة لإنك لما تعملي كدة مع مسؤول أمال هتعملي ايه مع الناس الغلابة؟" .
وقال "السيد": "الصفع كان قدام الناس كلها وفيه شهود وأنا عملت محضر وشهد معايا 30 واحد على الواقعة " .. و رد "الإبراشي" : "يابشمهندسة ناريمان لو فيه خطأ يبقى عندك شجاعة الاعتذار يعني .. وتقولي أنا صفعته بالقلم إنما متقوليش أنا معملتش كدة .. القضية فيها شهود" .. فردت : "دة لما يكون حصل فعلا لكنه محصلش .. دة هو اتعرض ليا عشان يكتسب ثقة العمال والمفروض إن هو كان يقولهم الإجراءات وميعملش مشكلة ويحرضهم إن هما يقفوا ورغم كل دة هو اتهجم عليا و زقني بس أنا أخلاقي مسمحتليش إني أروح أعمل محضر ضده .. أنا اكتفيت إني عملت مذكرة في الشؤون القانونية" .. ورد "الإبراشي" : "30 شاهد هيدعوا عليكي ليه يا باشمهندسة ناريمان؟ ماهو بالتأكيد إن الناس هنا استفزهم إنك مسؤولة وتصفعي موظف تحت ايديكي ".
الفيديو: