مسن للنظام: "هنموت ناقصين عمر بسبب غلاء الأسعار"

"متظلمناش ياريس الله يباركلك، هانموت ناقصين عمر بسبب غلاء الأسعار.. حسبنا الله ونعم الوكيل في اللي كان السبب، أنا مريض ومش معايا حق العلاج، حرام اللي بيحصلنا ده".. هذه الكلمات رددها كل من "بدر سيد بدر"، 70 سنة، وزوجته "سيده فوده عبد الرحيم"، 70 سنة، واللذين أصبحا غير قادرين علي تحمل غلاء الأسعار والتي تزداد يومًا بعد يوم، حيث أصبح سعر كيلو الطماطم 10 جنيهات، وكيلو الفراخ أكثر من 35، ووصول كيلو اللحمة لأكثر من 120 جنيهًا، والبيض تجاوزت سعر الواحدة جنيهان، في سوابق لم تحدث من قبل.
يشتكي عم "بدر"، ل"المصريون"، حال الأسرة السيئ الذي وصلت إليه، قائلا "أنا رجل مسن عندي 4 أولاد، وباخد معاش 1000 جنيه بدفع منهم كل شهر 600 جنيه ميه ونور وبعيش باقي الشهر أنا وأولادي ومراتي ب400 جنيه".
وتابع: "الناس اللي معاشها 10000 جنيه، تشتكي من غلاء الأسعار طب إحنا نعمل إيه ونعيش إزاي بعد اللي وصلنا له"، مستكملا "أصبحت مريض بالسكر وباخد علاج كتير ولما بطالب التأمين الصحي بعلاجي بيرفضوا وبشتري العلاج من جيبي".
واختتم حديثه: "مش قادر استحمل ارتفاع الأسعار اللي بقينا فيه ومحدش بيساعدني وحاسس بيا غير ربنا".
ووجهه "بدر "رسالة لرئيس الجمهورية قائلا :" نفسنا ياريس منبقاش مظلومين وعاوزين نرجع نعيش زى ماكنا عايشين من سنتين وحسبنا الله ونعم الوكيل في اللي كان السبب ".
وتقول زوجه :" كل حاجه حولينا سعرها بيزيد عن اليوم اللي قبله وعندي 70 سنه ولحد دلوقتي مطلعليش معاش وأنا صاحبة مرض عندي الكبد والسكر وأعاني من تضحم بعضله القلب وتابعت ببيع حبوب وسلع غذائية عشان اقدر أساعد في مصاريف البيت ومنطلبش مساعده من حد لان مفيش حد بيساعدنا ولازم نستحمل غصب عننا لان لو مستحملناش هنموت ناقصين عمر بسبب غلاء الأسعار ".