نكتب رسائلهم البريئة له : سألنا الشباب والطلاب الصغار تحب تقول إيه لرئيس الجمهورية

رصدت الرسائل : آمال الشرابى
تحب تقول إيه للرئيس عبد الفتاح السيسى رئيس الجمهورية ؟
سؤال عادى وجهناه لعدد كبير من الشباب المصرى وطلاب المدارس ... راعنيا إنتقاء العينة من مختلف الطبقات .. ومن أماكن كثيرة ... بعضهم ضحك وتركنا ... بعضهم تحدث ... بعضهم طلب عدم ذكره أوتصويره ... بعضهم وافق على التصوير.. أحلامهم صغيرة مثل أجسادهم الفتية ... أجسادهم لم تتلوث بعد ... هم جزء من نسيج الشعب المصرى الحقيقى ... إجابتهم جاءت بسيطة وتكشف عن " البلاوى " اللى تحت مستخبيه ... آثرنا أن نضع أجاباتهم كما هى لكى يقرأ الرئيس وكل من يهمه الأمر الوضع كما جاء بلا رتوج ... أحلامهم صغيرة

محمد دكتوربشرى فى السنة الإمتياز من المنوفية .. دخلت وجلست ورمقته وهويمارس مهنة الطب بكل إهتمام مع كل المرضى ,ويكشف عليهم بضمير, ويدعوا لكل واحد منهم بالشفاء , .. تحدث الدكتور محمد وقال : أنا دخلت كلية الطب رغبة وحب , ذلك أنى أحب عمل الخير وألإقتراب من الناس , والطب يساعد على ذلك , فيأتينى الناس من كل الطبقات , والصفات والشخصيات , فيأتينى المجرم وبتاع الحشيش , فى الخارج مجرم ولكن تحت يدى لاحول له ولا قوة ,
سألته عن التخصص الذى يرغبه فى مجال الطب ؟ قال : النساء والتوليد .. وأنا فى الصف الثانى الثانوى كانت بعض النساء تقول دكتور فلان(......)أحسن دكتورنسا وتوليد ولا حد هيجى زيه أبدا , فقررت أن أدخل الطب وأتخصص فى هذا القسم , وكنت بطلع الاول كل سنة وأنا ألأول على دفعتى ,
قلت له ما هى الرسالة التى ترغب فى توجيهها للرئيس عبد الفتاح السيسى رئيس الجمهورية ؟
أجابنى الدكتور محمد بعد لحظة صمت : أنا باخد 250 جنية فى الشهر وواخد سكن ب250 جنية , وأكلى ومواصلاتى وكل إلتزاماتى يدفعها لى أبى كل شهر , الراتب لا يكفى إلا ثمن السكن ,أنا عندى 25 سنة , ولازم اخد ثلاث سنوات جيش وعلى ما أخلص كلية وجيش وأكون نفسي مش قبل 33 سنة, طب اتجوز منين ؟ وإزاى ؟ ثم ليه عندنا الطب سبع سنوات ؟ وكمان التخصص بعد السنه السابعة ليه ؟... ليه إحنا مش زى الدول اللى برة ؟ الطب عندهم اربع سنوات فقط .....


أما أحمد فهو نموذج أخر للشاب الطموح
احمد فى كلية تجارة ,فى السنة الثانية ,
قلت له ماهى أحلامك وأمنياتك وما هى رسالتك للرئيس السيسي ؟؟؟
قال : أنا حلمى مخطط له منذ فترة ,
أولا : أنا بشتغل وبساعد نفسى , فوالدى علمنى الإعتماد على النفس , وبعد ما اخلص متفق أنا وبعض من اصحابى نعمل مشروع كافية ملحق به مطعم .
كمان هاخد دبلومة وناوى أن شاء الله أكمل دراسات عليا ,
وعن رسالته للسيسى قال : أنا بحب بلدى وعايز إقتصادها أحسن من كده,وأملى تكون أحسن بلد , وبحب الرئيس ولازم كلنا نكون ايد واحدة عشان نحافظ على بلدنا داخليا وخارجيا ,ورسالتى للرئيس ألإهتمام بالتعليم فى كل المراحل , . وبقوله : التعليم ثم التعليم ثم التعليم ياريس لأن أساس نهضة أى أمة


عبد الله فى مدرسة ثانوية ازهريه عايش فى المنوات يذهب يوميا الى المدرسة يشتكى من المدرسين ومن مدير المدرسة والفوضى ... يقول أن المدرس يأتى ولا يشرح الدرس ... الكتب لم تأتى كلها, المصاريف كثيرة ... لا يوجد اهتمام بهم .. أحمد مثلة يشكى من سوء معاملة المدرسين وعدم الاهتمام ليس لدية المال الكافى لكى يعوض النقص فى شرح المدرسين إن وجد,
ومحمود يرسب كل عام فى الثانويه ويشكى ان فى وسائط ,ويقول كا ن معايا واحد مش فاهم اى حاجة ف اى حاجة ونجحوه ,عشان هو من عيلة كبيرة وانا اتعقدت من المدرسين وكرهونى فى الدروس ومش فاهم حاجة منهم وممعيش الفلوس الكافية عشان اخد دروس ... جميعهم رسالتهم للرئيس : إحنا تعبنا من معاملة المدرسين وسوء الإدارة ... إنقذنا ياريس من اللى بيحصل

أما يارا فتبعث برسالة إلى الرئيس السيسى ,,,,,,, إن حد يخلصنا من أكوام القمامة إللى بجوار المدرسة ,وتقول فى رسالتها أيضا : نريد تبسيط المناهج حتى نفهمها ومراعاه إننا بنى أدمين لأن المدرسين بيعاملونا كأننا بهائم لا نفهم ... المدرسين أهم حاجة عندهم الدروس الخصوصية ... اللى بياخد عندهم دروس خصوصية بيحترموه وهو اللى بيتعاملوا معاه ف الفصل, واحنا مابيسألوش فينا فهمنا مفهمناش مش مهم ... وبنبقى قاعدين مكسوفين لما يسأل سؤال وهما يجاوبوا واحنا مش عارفين لأن المدرس بيكون شارح الدرس مسبقا ليهم فى الدرس فبيجاوبوا معاه ودول بيدوهم مكافأت وبيودوهم رحلات واحنا لأ . مع إن هما مابيكلفوش نفسهم ويحاولوا يفهمونا أو يشرحوا الدرس بضمير . ومدير المدرسة ولا بيسأل أهم حاجة عندة كبايه الشاى والقهوة . وكتير شكينا من الزبالة اللى جنب المدرسة اللى ريحتها وحشة جدا والحشرات بتأذينا ولافيه حد بيسأل فينا غير مدرسة البنين الموجودة بجوارنا ساعات بيحدفوا علينا طوب من الشبابيك ولا حد بيعبرنا بس يعدوا يشتموا فينا . عايزين ياريس حد يهتم بينا ويحسسنا إننا بنى آدمين فى دولة محترمة .

إسلام فى ثانوية عامة ,قال : رسالتى للرئيس السيسى : إن يكون فى إهتمام بالتعليم والمناهج تكون بسيطة عشان نعرف نذاكرها .
انا باخد دروس فى كل المواد وأهلى بيدفعولى مصاريف المدرسة , ما بفتحش كتب المدرسة إلا كتب التدريبات فقط , وكل إعتمادى على الدروس الخصوصية والكتب الخارجية , أنا الحمد لله أهلى بيوفروا لى كل حاجة والحياة مستقرة
سألته مصروفك كام فى اليوم ؟ قال 7 جنيه
قلتله نفسك تدخل كليه ايه ؟
قال : كليه الشرطة أطلع ظابط شرطة عشان نخلص البلد من المجرمين وننظفها منهم وحتى نحقق الأمن .


عمر ثانوية عامة رسالته للرئيس الإهتمام بالمرضى
قال : أنا نفسي أكون دكتور بشرى مش عشان هى من كليات القمة , ولا عشان مهنة فلوس , لأ , عشان ما بحبش اشوف حد مريض وبحب الناس وبحب اخدمهم .


سيد ثانوية عامة رسالته للرئيس يتمنى إن التعليم يكون أحسن , مناهج وشرح للمدرسين بضمير .
سيد بيحكى : بابا وماما بيشتغلوا عشان يوفرولى الحياة المستقرة , وعشان أقدر ادفع ثمن الكتب الدراسية والكتب الخارجية , وكمان باخد دروس فى كل المواد , وكمان ليا ثلاث إخوات تانين ,
سألته نفسك تكون إيه ؟
قال نفسى أكون مهندس بترول , عشان عايز اساعد بابا فى المصاريف ,
قلت مش عايز تسافر برة تشتغل ؟
قالى لأ ....أنا بحب بلدى وعايز أشتغل فى بلدى


حنان فى مدرسة خدمات ثانويه كانت فى مدرسة حكومية ولكن حدثت مشادة بينها وبين المدرس فشتمها بالأم فولى أمرها أخد الملف وحولها الى خدمات تدفع 500 جنيه فى السنة و700 جنية دروس خصوصية وتشتكى من الفوضى حيث لا اهتمام, البنين مع البنات فى فصل واحد نلبس كمانشاء لا قيود فى اللبس كما المدارس الحكومية رسالتى للرئيس السيسي :أرجو تبسيط المناهج وان المدرسين يعاملونا كويس وبصورة أدمية بدون شتم وسب .


على كان فى ثانوى صنايع ومكملش
يعنى معاه الإعدادية على رسالتة للرئيس السيسي : ياريت ياريس تنضف البلد من الناس الى بتاخد رشاوى
وقال : كنت فى المدرسة لازم ادفع كل شهر للمدرسين 50 جنية وكنت بشترى الكتب وتفضل جديدة زى ما هى ولا بفتحها والمدرسين مابيشرحوش أهم حاجة عندهم الفلوس عشان ينجحونا أخر السنه كرهت المدرسة وطلعت منها , وقعدت أدور على شغل إشتغلت فى شركة حلويات 8 ساعات فى اليوم ب 70 جنية كان اليوم بيروح, وأجى مهدود من التعب والفلوس ما كانتش بتقضى عشان كنت بساعد فى البيت عشان أبويا كانت حصلت له حادثة فقد الذاكرة وما بيشتغلش وانا عندى اربع اخوات تانين اشتغلت امن 16 ساعة فى اليوم ب 20 جنية بس إتهديت من التعب إتعلمت السواقة وطلعت رخصة لكن الرخصة عايزة تتجدد عايزين 2000 جنية رشوة عشان يطلعوهالى كمان بيتنا عايز يتهد ويتبنى عشان مش هيستحمل أبنى عليه شقة عشان أتجوز قلت له عندك كام سنة قالى هتم 24 سنة.
رسالته هى أحلامه التى يتمنى تحقيقها

أما محمود عنده 20 سنة, وهو أمى لا يقرأ ولا يكتب .
قلت له لماذا لم تتعلم قال : يعنى اللى تعلموا عملوا إيه ؟ مش لاقين شغل ....!!!
قلت له وأنت بتكسب كويس ؟؟؟حيث أنة يبيع بلح , قال بصفى حوالى 60 جنية فى اليوم بس بعد ما الف طول اليوم فى الشوارع , أحيانا بيطلع لى أقل من كده , ساعات 20 جنية لكن البلدية بيمشونى لو شفونى , لو ادتهم حاجة بيسبونى , ولو روحت السوق بدفع 30 جنية حق مكانى , سواء بعت أو ما بعتش , حتى لو هقعد ساعة واحدة , عشان كدة ما بروحش الأسواق , وبلف فى الشوارع ,
قلت والدك بيشتغل ايه ؟ قالى فلاح
وإحنا أربعة وأنا الوحيد إلى بساعد والدى ,
قلت له ما الرسالة التى تحب أن توجهها إلى الرئيس السيسي ::: قال أنا بحب الرئيس كفاية وفرلنا رغيف العيش والتموين ما بقناش ندفع حاجة وليا طلب عايزة يخلصنا من بتوع الحشيش اللى بيطلعوا علينا بالليل يهددونا بالمطاوى لو مشترناش منهم , أنا حياتى مهددة بالخطر .


أحمد معاه دبلوم صنايع عندة 18 سنة سعيد فى حياته , والدة مهندس بترول ,
قال : أنا بشتغل بس والدى موفرلى كل اللى انا عايزة , قلت له : لماذا لم تكمل تعليمك طالما الظروف مهيأه ؟ قال مش عايز اكمل أنا عايز أتجوز , قلت إنت جاهز قال ايوه وهجيب شبكة ب 20 الف جنية انا معى 10 الاف ووالدى هيدفع لى 10 آلاف
سألته عن رسالته للسيى قال : إن البلد تستقر ده كل اللى أنا عايزة


محمود حسنى من النماذج المشرفة ,متفائل , طموح , كون نفسة بمجهودة ,يحكى لى :
أنا وأخى مشتركين فى هذا محل , موبايلات , منذ 15 سنة بعد وفاة والدى الذى ترك لنا منزل به شقة لكل واحد , ومن عائد هذا المحل تزوج أخى , واشترى عربية , وانا أيضا خاطب وسأتزوج قريبا , وكمان أنا مقدم فى الجامعة المفتوحة , لأنى إنقطعت فترة عن الدراسة بسبب إنشغالى بالمحل , لأن المحل مفتوح بصفة مستمرة حتى يغطى مصاريفى أنا وأخى , وكمان مصاريف المحل , قلت له ماهى مصاربف المحل ؟؟؟ قال بندفع كهرباء 500 جنية وضرائب وعوائد ,
قلت له أكيد بتغلى الموبايلات على الزبائن عشان تغطى التكاليف ....؟! قال لا والله أنا عارف ظروف الناس ...أنا ما باخدش كتير ,,,,
محمود رسالتة للرئيس السيسي .....قال الله يعينة وإحنا كمان لازم نكون معاه ونتعب شوية عشان البلد حالها يمشى .
ب