سلام مربع للدخان

■ مهندس من عشرين سنة.. وجايب تقدير محترم.. أبويا معيّشنى فى الهنا.. فى بلد أصوله بتتفرم.. معاشه مكفّيه هوّه وأنا.. بسّ كوز الميّة اتخرم.. لمّا هوّه ومعاشه اتفنى.. وأنا عاطل لحست الصرم.. شُفت زميلى أبوواسطة اتغنى.. وبياكل هُبَر فى البُرم.. وصاحب قصر ورانا اتبنى.. مبحبح وأنا اللى اتحرم.. ما هو قريب بتوع الطنطنة.. اللى ناقص يبيعوا الهرم.. بعت مخدّرات م الضنا.. وخدت تأبيدة مع الكرم!!
على قاسم - المكس
■ حرموها وجرموها.. وشاربها عقله غاب.. فلوسه طارت والصحة باظت.. والمتيم سايق العناد.. قاعد فى بيته ماشى فى غيطه ينفخ.. يبليك بالهباب.. تقوله مالك تقول عيالك.. هو عاشق الغياب.. ولما يتعب وجسمه يمرض.. يشكى لربه يبكى لغلبه.. يقول دعائى ليه مش مستجاب؟.. شارب يوماتى م الفقر حاكى يندب.. مصيره اللى خاب وجنازة ماشية.. عارف صاحبها كان برضه سايق فى العناد.. ماشى فى جنازته يعزم.. بخيبته سرطان وربو ع العباد.. ملعونة ياللى فى إديه تملى تحرق.. وتغتال فى الولاد.
مصطفى عبدالمنعم - القاهرة
■ يا غائبا عن وعيه.. كفانا بانجو.. الوقت وقت الصحو والعقل القويم.. لا وقت عندك للمغيب وهلوساتك والهراء.. الأرض تحتك تشتكى.. والغادرون على الحدود بلا انتهاء.. هذا زمان المخلصين.. المخلصين لرملهم.. لا وقت عندك للغباء.. ليس الزمان زمان نوم أو هراء.. ليس المكان مكان لهو أو خواء.. أنا هنا.. عند الحدود وخلفها أفعى تريدك للفناء.. يا غائبا عن وعيه.. العرض غال والوطن.. فالزم إباءك واستقم.
عماد على قطرى
emad.qatry@yahoo.com
■ سلام مربع للدخان.. أجمل حب وأحلى حنان.. المليارات راحت ياولاد.. من النهارده مافيش خرمان.. ألفين سيجارة لكل فم.. أما الأكل ده مش مهم.. مدام الصحة عال العال.. تبقى الخطة فساد الدم.. ناس بتحذر م الدخان.. عشان بيدمر الإنسان.. وناس معاها فلوس كتيرة.. قالت نزود فى السرطان.. يا ناس حرام المليارات.. تستثمروها فى مضرات.. إزاى تجيلكم البركة.. ده الرزق من رب السماوات.. كلمة فى ودن المدخنين.. ولادكم أولى بالملايين.. صحتكم فى الدنيا أمانة.. إبعدوا عن شر التدخين.. فكّر مرة بعقلك واطلب.. عفو الخالق الرحمن.. شكراً للصحة ع التحذير.. بس إزاى هيفيد تحذير.. وغيرنا عينه ع الأرباح.. باستثمار أضراره كتير.. آخر حاجة بقول للناس: خفوا شوية من الأنفاس.. حتصون مالك من التدخين.. يحميك بكره من الإفلاس.
أحمد الطويل - الجيزة