تحرك عاجل من التعليم بعد احتجاز تلميذة لتأخرها عن سداد المصروفات بمدرسة في التجمع

وجه محمد عبداللطيف، وزير التربية والتعليم والتعليم الفني، بإرسال لجنة صباح غدٍ إلى احدى المدارس الخاصة بمنطقة التجمع الخامس للتحقيق في الوقائع محل الشكوى المتداولة على مواقع التواصل الاجتماعي، واتخاذ كافة الإجراءات القانونية حال ثبوتها.
كما وجه الوزير بالتعامل بمنتهى الحزم مع أي مخالفات قد تحدث بالمدارس الخاصة أو الدولية، مشددًا على أن الوزارة لن تتهاون في تطبيق القوانين واللوائح المنظمة حفاظًا على انتظام العملية التعليمية بكافة المدارس على مستوى الجمهورية.
جدير بالذكر أن ولي أمر تلميذة بالمدرسة محل التحقيق، وجه شكوى عبر صفحته الشخصية بموقع التواصل الاجتماعي فيسبوك ،أكد خلالها أن المدرسة قامت باحتجاز نجلته مرتين عدة ساعات بسبب التأخر في سداد المصروفات المدرسية ورفضهم تحصيل الرسوم إلكترونيا مطالبين بدفعها نقدي.
ونصت الشكوي على مايلي:
«اولا حابب اعتذر مقدما على البوست الطويل ده... وحقيقي مكنتش احب المسائل توصل للمرحلة دي... بس أهو كاس وداير.. والدور جه عليا.
وانا بقدم لفريدة بنتي في مدرسة New Capital school "C.G.S -2" من 4 سنين في الانترفيو اللي اتعمل معايا انا ومنى اتسألنا سؤال مهم.. اجابتي عليه كانت محددة وواضحة جدا!
اتسألنا انتوا منتظرين ايه من المدرسة تقدمه لفريدة؟!... وانا اجبت بمنتهى الصراحة: انا مش منتظر جودة تعليمية لأسباب كتير مش وقت الكلام فيها... ومش منتظر جودة تربوية لأن ده دور البيت في المقام الأول... الحاجة الوحيدة اللي عاوزها من المدرسة انها تكون بيئة امنة ونظيفة البنت تقدر تخوض تجربتها الاجتماعية وتبني علاقاتها الإنسانية بشكل سليم وآمن... لإنه في النهاية انا ومنى هدفنا الرئيسي اللي عاوزين نوصل ليه أولادنا انهم يكونوا سعداء وكويسين.. يحصل ده ازاي دي رحلتهم
طبعا لما فريدة اتقبلت وبدأت رحلتها في المدرسة كانت الأمور ماشية تمام... لحد السنة اللي فاتت واللي بدأت ملاحظة شوية حاجات مزعجة بعيدا عن المشاكل الإدارية المعتادة من أي مؤسسة تعليمية في مصر... ملاحظة متعلقة بنمط سلوكي تربوي المدرسة بتمارسه وهو العقاب الجماعي... طفل يخطئ.. ف الفصل كله يتعاقب بسببه!... حاجة انا فعلا مش قادر افهم أي جدوى تربوية ليها... مش شايف غير استسهال هايسبب مشاكل اكبر... ولما حاولت اتواصل معاهم ماوصلتش لعقاد نافع... ولما قلت لفريدة تحبي ننقلك مدرسة تانية رفضت بسبب صحابها وزمايلها... ف ابتديت انصحها ازاي تتعامل مع النمط ده!... وقلت خلاص طالما البنت مرتاحة ومش منزعجة يبقى خلاص... لحد لما ده كمان وقع أول امبارح!... ونيجي هنا لسبب البوست ده.
أول امبارح فريدة راجعة من المدرسة متضايقة بنسألها مالك... قالت ان مدرسة جت خدتها من فصلها... نزلتها فصل تاني فيه ولاد وبنات صغيرين وسابوها قاعدة ف الفصل ده ساعة ونص وبعدين طلعوها فصلها من غير مايردوا على سؤالها: انا عملت ايه؟!
لما عرفت الموضوع ده أول حاجة جت في دماغي انه بسبب تأخر دفع المصاريف... لان حد من الحسابات كان لسه مكلمني قبلها بيومين وسألني على المصاريف وقلتله اخر الشهر ده قالي تمام وقفل...
وهنا فيه نقطة مهمة جدا عاوز اقولها لأنها سبب مهم للتأخير ده... مدرسة نيوكابيتال جيت مش بتقبل المصاريف غير (كاش عدا ونقدا) بس... لا تحويل أو إيداع بنكي ولا فيزا ولا انستاباي ولا أي حاجة غير الكاش... ودي نقطة كانت بتعطلني وتخليني أنسى أو أكسل وبالتالي اتأخر... بس في النهاية دي مشكلتي انا... ازاي يدخلوا البنت في الموضوع... ف منى قالتلي لا صعب يعملوا كده... ولو عملوا مش هيقولوا انهم عملوا كده... قلت هاروح لهم بكرة وهاشوف...
رحت المدرسة تاني يوم الساعة 11 الصبح... دخلت قعدت مع مديرة العلاقات العامة وسألتها عن سبب اللي حصل لفريدة امبارح... وفاجأتني بمنتهى البساطة والهدوء «علشان خاطر تأخر دفع المصاريف»!!
قلتلها يعني انتوا خدتوا البنت من فصلها وحبستوها في فصل تاني ساعة ونص عشان ابوها متأخر في المصاريف؟!... انتي بتتكلمي بجد؟!!
قالت انا اسفة جدا على الموقف ده... احنا بس محتاجين من حضرتك تحدد لنا معاد للسداد!
قلتلها انسي المصاريف دي خالص مش هاتكلم فيها... انتي بتحبسي بنتي اللي انا مستأمنكم عليها عشان تأخر سداد الأب؟!... انتي واعية بتقولي ايه؟!...
انا مش هاكلمك في ظروف.. انا معايا الفلوس ومكسل أجيبها وادفعها... وكمان انا شغال سنين ف المبيعات وعارف مشاكل تأخر السداد بس كده كده علاقتي المالية بيكم بيحكمها قانون ولوائح... تقدري تضغطي عليا انا بكل الوسائل اللي القانون موفرها.. تقدري تحددي غرامات تأخير بمواعيد محددة... تقدري حتى تحجبي نتيجة البنت... إنما انكم تضغطوا عليا عن طريق إيقاع أذى بالبنت ده تجاوز للخطوط الحمرا ومش هاسمح بيه!
قالتلي انا اسفة جدا بس ايه الحل... قلتلها مالكوش عندي جنيه غير لما المسؤول عن القرار ده ومديرة المدرسة يروحوا لبنتي يعتذروا ليها ويوعدوها انها مش هاتتكرر تاني.. ساعتها نتكلم ونحدد مواعيد... وسبتها ومشيت... كانت الساعة 11ونص الصبح.
رحت اجيب فريدة من المدرسة لقيتها متضايقة وغضبانة اكتر.. بقولها ايه اللي حصل؟!.. عيطت وقالتلي انهم خدوها تاني من فصلها وقالولها هاتي شنطتك وقعدوها في فصل الحبس ده من 10 الصبح لحد 1ونص الضهر... 3 ساعات ونص!!... منهم ساعتين كاملين بعد ما مشيت.
كملت فريدة وهي لسه بتعيط: انه كان معاها ف الفصل ده 11 ولد وبنت... وكانوا بيكلموا بابا كل واحد فيهم واللي بيرد عليها كانوا بيطلعوا ابنه أو بنته فصله تاني... انت مارديتش عليهم ليه؟!!!
قلتلها عشان كنت عندهم وحكيتلها اللي حصل!!...رجعت البيت كانت Mona دخلت تولع الدنيا على جروب الماميز لقيتها مولعة وكذا أم بتشتكي وأب بنت في تالتة ابتدائي كانوا مانعين عن بنته الحمام والميه.. الاب ده راح عمل محضر... واغلبنا كده كده هايعمل محاضر ويلحقها بشكوى لوزارة التربية والتعليم.
الدافع بقى ورا البوست ده هو الاعتذار الخايب اللي المدرسة حاولت تضحك بيه عليا رغم انه مدخلش على فريدة اصلا... بعتوها للمديرة في مكتبها والسكرتيرة قالتلها احنا اسفين احنا اتلخبطنا بينك وبين فريدة تانية!!!!
ساعتها أدركت انه فيه مشكلة كبيرة جدا بتحصل في إدارة المدرسة دي... مش مجرد مخالفات مالية أو ادارية.. إنما خلل تربوي كبير ولازم يحصل فيه تحقيق موسع.. لانه كمان طريقتهم في التعامل مع الشكاوي في قدر كبير من العنجهية وكأن مش فارق معاهم ومتخيلين انه عادي اننا نحبس أطفال ونكدرهم ونهينهم ونحرجهم قصاد زمايلهم عشان نضغط على اهاليهم يدفعوا المصاريف كاش!!«