«حدوتة قبل النوم».. «ندى تقلد البغبغان»

لكل أم تجد صعوبة في نوم أطفالها، إليكِ حلا سحريًا للأخذ بيد طفلك إلى عالم الأحلام والنوم الهادئ.. «شيماء عبد العال» تقدم مجموعة قصص يومية تساعدك على ذلك:
حدوتة النهاردة ... « ندى تقلد البغبغان»
كان يا ما كان، كان في زمان بنوتة جميلة اسمها ندى، ندى كانت بنت مؤدبة جدا و رقيقة وكانت بتحب اوووي تقلد البغبغان، كلنا طبعا يا ولاد عارفين ان البغبغان بيقلد اي صوت و اي كلام يتقال قدامه و يسمعه.
ندى كانت بتكرر اي كلام يتقال قدامها او تسمعه ودي كانت مشكلتها الوحيدة، لان مامتها و باباها كانوا بيحذروها كتير من التصرف ده لانه تصرف غلط، لكن ندى كانت فاكرة انها كدة بتهزر، و في يوم من الأيام مامتها راحت تجيبها من المدرسة وهما مروحين لاقوا مجموعه من الشباب بيتخانقوا مع بعض وبيشتموا بعض بالفاظ وحشة جدا في الشارع وده لانهم مش مؤدبين طبعا، ندي لقطت كام لفظ من الالفاظ الوحشة دي منهم وهما بيتخانقوا و قعدت ترددها بصوت واطي و هي ماشية جمب مامتها، مامتها مكنتش واخدة بالها ومركزة في الطريق وهما بيعدوا عشان العربيات، راحت ندي المدرسة تاني يوم، صحبتها سهيلة وهي معدية من جمبها غصب عنها وقعت شنطة ندي علي الارض، ندي اتضايقت جدا منها وقامت مزعقة في سهيلة بصوت عالي و قالتلها انتي وقعتي شنطتي علي الارض ليه يا ... و راحت قايلة لفظ شتيمة من اللي سمعتها وهي مروحة من المدرسة امبارح، المدرسة سمعتها و اصحابها كلهم سمعوها وهي رددت الكلمة وهي مش عارفه معنها طبعا زي البغبغان بالظبط، مكنتش تعرف ان لفظ غلط جدا وعيب و مينفعش بنت مؤدبة زي ندي تقوله طبعا.
المدرسة زعقتلها جدا واخدتها وديتها لمديرة المدرسة اللي عاقبتها و طلبت منها انها تجيب معاها باباه او مامتها عشان يقابلوا المديرة بكرة والا مش هيدخلوها الفصل بتاعها، ندي قعدت تعيط لانها بتتعاقب وهي مش فاهمه حجم الغلط اللي ارتكبته غير انها كررت كلمه سمعتها في خناقة في الشارع ومش فاهمه معناها ايه اصلا، ولما مامتها جت عشان تاخدها من المدرسة لاقت ندي شكلها زعلان وفضلت تسالها مالك يا ندي طول الطريق وندى مبتروديش لحد ما وصلت البيت وقعدت تعيط وبعدين قالتلها المديرة قالتلي لازم باباكي او مامتك يجوا يقابلوني بكرة ضرورة و لما مامتها سالتها عن السبب حكت لها ندى علي كل اللي حصل بينها و بين سهيلة صحبتها.
مامتها اتصدمت واستغربت معقول انتي قولتي الكلمة دي يا ندى، قالتلها ايوة ياماما، مامتها كانت هتتجن معقول يا ندى انتي بنت متربية ومؤدبة جبتي اللفظ ده منين وسمعتيه فين، انا متأكدة من تربيتي ليكي.
ندي اعترفت انها كررت الكلمة اللي سمعتها في اليوم اللي قبله وهي راجعه من المدرسة لما كان مجموعه من الشباب بيتخانقوا مع بعض، ساعتها بس مامتها فهمت الموضوع وعرفت ان اللي حصل لندى كان بسبب تقليدها للبغبغان و تكرارها لاي لفظ او كلمة تتقال قدامها و تسمعها.
مامتها فهمتها طبعا ان اللي عملته ده غلط كبير وده كان نتيجة لعدم سماع كلام مامتها و باباها بانها تبطل تكرر اي كلام يتقال قدامها و خلاص من غير ما تكون عارفه اصلا معناه، العقاب كان شديد خاصة ان المدرسة و اصحابها سمعوها و اخدوا عنها فكرة انها بنت مش مؤدبة.
راحت تاني يوم مامتها معها المدرسة و قابلت المديرة و شرحتلها الموقف كله، لكن برضه مديرة المدرسة حذرتها ان الموقف ده مينفعش يتكرر تاني والا هيكون في عقاب اكبر ممكن يوصل لفصلها من المدرسة، لان مينفعش الفاظ وحشة زي دي تتقال في مدرسة كل الاولاد فيها مؤدبين.
اعتذرت ندى طبعا للمديرة وللمدرسة بتاعتها ولسهيلة صحبتها ولكل الفصل بتاعها ووعدتهم انها كانت غلطة و مش هتتكرر تاني ابدا، لانها اتعلمت مترددش كلام و خلاص و هي مش عارفه معناه.