أسرة ضحية «جريمة موقف التجمع»: «سواق أنهى حياته وهو بيدافع عن واحدة ست» (قصة كاملة)

«كان أكتر من أخويا، حسيت وهو بيكلمنى يومها كأنه بيودعنى من غير ما أعرف.. اتقتل ب 3 طعنات بمفك على إيد سواق ميكروباص كان بيعاكس واحدة ست ما يعرفهاش، ولما وقف يدافع عنها نزل السواق ومعاه 3 وضربوه»، هكذا يروى «عبدالله»، أقرب أصدقاء عبدالرازق عبدالله، الساعات الأخيرة قبل الحادث الذي وقع في أحد مواقف الميكروباص بمنطقة التجمع الخامس في القاهرة: «الأصعب من موته إنه ما لحقش يفرح ببنته «تالا» اللى اتولدت من 45 يوم بس».
كان «عبدالرازق»، الشاب العشرينى، يعمل مشرف نظافة في شركة مقاولات بعد أن تخرج في دبلوم صنايع.. لم يكن يتوقع أن نزوله للعمل في يوم إجازة سيشكل الفصل الأخير في حياته، ولا أن مشادة عابرة بسبب كلمة حق ستقوده إلى مواجهة دامية مع سائق ميكروباص و3 من مرافقيه، إذ انتهت المواجهة ب 3 طعنات نافذة في الرقبة والجانب، أودت بحياته وهو يحاول أن يحمى سيدة لم يعرفها من قبل، فيما ألقت أجهزة الأمن القبض على اثنين من المتهمين، بينهم السائق، وقررت النيابة العامة حبسهما 4 أيام على ذمة التحقيقات.
«قابلته بالصدفة في الشارع، استغربت وقلت له: إنت رايح الشغل ليه النهارده مش الجمعة؟.. رد عليا وقال: الشركة كلمونى ولازم أنزل.. سلم على كأنه بيطمنى، وأنا ماكنتش عارف إن ده آخر لقاء بينا»، يقول «عبدالله»، في حديثه ل«المصرى اليوم»، بصوت تختلط فيه الدهشة بالوجع، إذ بعد ساعات قليلة، جاءه الخبر الصاعق: «عبدالرازق اتخانق مع سواق ميكروباص واتضرب واتوفى».
بحسب روايات شهود العيان، بدأت المشادة حين أطلق سائق ميكروباص ألفاظًا خادشة تجاه «سيدة» كانت تعبر الطريق، «قال له: اعتبرها زى أمك أو زى أختك.. عيب اللى بتعمله»، يروى شاهد.
لكن كلمات «عبدالرازق» لم تلق سوى غضب السائق، الذي ترجل من السيارة، ليتحول المشهد إلى اشتباك جسدى، سرعان ما تدخل 3 آخرون كانوا برفقة السائق، ليعتدى ال 4 معًا على الشاب.
«هو اتعور في رقبته وودانه، ولما شوفت جثته في المستشفى ماكنتش مصدق إن ده عبده.. الجدع اللى ما يسيبش حد في ضيق»، يقول «عبدالله» بصوت مخنوق.
«حمدى»، ابن خال المجنى عليه، يتذكر اللحظة التي تلقى فيها الخبر: «جالى تليفون قالولى (عبدالرازق) اتقتل.. ما صدقتش.. كل اللى عمله إنه دافع عن واحدة ست من التحرش.. قال للسواق عيب واعتبرها زى والدتك أو أختك، وبعدها السواق نزل وشتم وضربه بماسورة حديد، وبعدين طعنه بالمفك 3 طعنات».
ويضيف بحسرة، خلال حديثه ل«المصرى اليوم»: «(تالا) كانت أول فرحته.. مات قبل ما يتهنى بيها».
«محمد»، ابن عم المجنى عليه، يصف حال الأسرة بعد الحادث: «مراته في حالة انهيار.. لسه عروسة جديدة.. ووالده لما عرف انهار وما صدقش.. والدته برضه في صدمة.. مش متخيلة إنها فقدت ابنها اللى كان سندها»، ويتابع: «اللى شفناه في الكاميرات إن السواق و3 نزلوا من الميكروباص وضربوه هو وصاحبه اللى كان معاه على الموتوسيكل.. اتجمعوا عليه وضربوه عشان كلمة حق قالها».
بالنسبة لأصدقائه، كان «عبدالرازق» شخصًا حاضرًا دائمًا لمساعدة الآخرين.. «هو ما كانش بيسيب حد.. دى طبيعته.. اللى يعرفه عارف إنه جدع، حتى لو ما يعرفش الناس اللى بيدافع عنهم»، يعاود «عبدالله» كلامه، قائلًا إن ذلك الموقف العابر كلفه حياته، لكنه أيضًا جعل اسمه يتردد بين الناس بوصفه «الشهيد الجدع».
ابن خال المجنى عليه، حزين وهو يطالع الرضيعة «تالا»: «حق عبده مش هيرجع غير لما ياخدوا جزاءهم بالعقوبة المقررة قانونًا.. مش هنسكت على اللى حصل»، فيما الجدة تحمل الصغيرة بين ذراعيها وتروى: «كان مبسوط بيها جدًا.. كل يوم يشيلها ويقول دى اللى هتنسينى تعب الدنيا.. مات وما سمعش منها كلمة بابا.. ما لحقش يفرح ببنته المولودة من 45 يوم»، مرددة: «السواق قتله وهو بيدافع عن ست ما يعرفهاش»
في جنازته، كان المشهد مهيبًا، التف العشرات حول نعش «عبدالرازق» وهم يرددون: «كان جدع ومات مظلوم».